Gurlapura: ಕಾರು – ದ್ವಿಚಕ್ರ ವಾಹನಗಳ ನಡುವೆ ರಸ್ತೆ ಅಪಘಾತ: ಓರ್ವ ಯುವಕ ಸಾವು

Team Udayavani, Aug 4, 2023, 9:34 PM IST

ಮೂಡಲಗಿ: ತಾಲೂಕಿನ ಗುರ್ಲಾಪೂರ ಬಳಿಯ ನಿಪ್ಪಾಣಿ ಮೂಧೋಳ ರಾಜ್ಯ ಹೆದ್ದಾರಿಯಲ್ಲಿ ಶುಕ್ರವಾರ ಸಂಜೆ ದ್ವಿಚಕ್ರ ಮತ್ತು ಕಾರುಗಳ ಮಧ್ಯೆ ಜರುಗಿದ ಭೀಕರ ಅಪಘಾತದಲ್ಲಿ ಸ್ಥಳದಲ್ಲೇ ಓರ್ವ ಯುವಕ ಸಾವನ್ನಪ್ಪಿದ್ದು ಹಾಗೂ ಚಿಂತಾಜನಕ ಸ್ಥಿತಿಯಲ್ಲಿರುವನ್ನು ಓರ್ವ ಯುವಕನನ್ನು ಮೂಡಲಗಿ ಪಟ್ಟಣದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ರಸ್ತೆ ಅಪಘಾತದಲ್ಲಿ ರಬಕವಿ ಬನಹಟ್ಟಿ ತಾಲೂಕಿನ ಕೆಸರಗೋಪ್ಪ ಗ್ರಾಮದ ಯುವಕ ದ್ವಿಚಕ್ರ ಸವಾರ ಬಸವರಾಜ ಶ್ರೀಶೈಲ್ ಸಸಾಲಟ್ಟಿ (18), ಶಿಕ್ಷಣಕ್ಕಾಗಿ ರಾಯಬಾಗ ತಾಲೂಕಿನ ಕಂಕಣವಾಡಿ ಗ್ರಾಮದ ದೊಡ್ಡಮ್ಮನ ಮನೆಯಲ್ಲಿ ವಾಸಗಿದ್ದನು. ಚಿಂತಾಜನಕ ಸ್ಥಿತಿಯಲ್ಲಿ ಇರುವ ಸಂದೀಪ ಇಂಗಳಗಾವಿ (18) ರಾಯಬಾಗ ತಾಲೂಕಿನ ಸವಸುದ್ದಿ ಗ್ರಾಮದ ಯುವಕ ಎಂದು ಗುರುತಿಸಲಾಗಿದೆ.

ಇಬ್ಬರು ಮೂಡಲಗಿ ಪಟ್ಟಣದ ಸಾಯಿ ಕಾಲೇಜದಲ್ಲಿ ಓದುತ್ತಿರುವ ವಿದ್ಯಾರ್ಥಿಗಳಾಗಿದ್ದು, ತಮ್ಮ ಶಿಕ್ಷಣದ ದಾಖಲಾತಿ ಪಡೆಯಲು ಮೂಡಲಗಿಗೆ ತೆರಳಿ, ಮರಳಿ ಮನೆಗೆ ಹೋಗುವಾಗ ನಡೆದ ಘಟನೆ ಎಂದು ತಿಳಿದು ಬಂದಿದೆ.

ಘಟನಾ ಸ್ಥಳಕ್ಕೆ ಮೂಡಲಗಿ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.