‘ಸೋಂಕು ಬಂದಿದೆ’ ಎಂದು‌ ಆಸ್ಪತ್ರೆಯಲ್ಲಿ ನಗುತ್ತ ಡ್ಯಾನ್ಸ್ ಮಾಡಿದ‌ ತಬ್ಲಿಘಿ ಶಂಕಿತ ವ್ಯಕ್ತಿ

Team Udayavani, Apr 5, 2020, 11:43 AM IST

ಬೆಳಗಾವಿ: ಕೋವಿಡ್-19 ಮಹಾಮಾರಿಗೆ ಇಡೀ ಜಗತ್ತೇ ತಲ್ಲಣಿಸಿದ್ದು, ಬೆಳಗಾವಿಯಲ್ಲೂ ಮೂವರಿಗೆ ಸೋಂಕು ದೃಢವಾಗಿರುವಾಗ ದೆಹಲಿ ನಿಜಾಮುದ್ದೀನ್ ದಿಂದ ಬಂದ ಶಂಕಿತ ವ್ಯಕ್ತಿ ಜಿಲ್ಲಾಸ್ಪತ್ರೆಯ ಕ್ವಾರಂಟೈನ್ ನಲ್ಲಿ ‘ನಮಗೆ ಕೋವಿಡ್-19 ಸೋಂಕು ಬಂದಿದೆ’ ಎಂದು‌ ಹೇಳಿ ನಗುತ್ತ ಡ್ಯಾನ್ಸ್ ಮಾಡಿರುವುದು ಉದ್ಧಟತನ ಮೆರೆದಿದ್ದಾನೆ.

ಜಿಲ್ಲಾಸ್ಪತ್ರೆಯ ಮೊದಲನೇ ಮಹಡಿಯಲ್ಲಿ ಕೋವಿಡ್-19 ಸೋಂಕು ಶಂಕಿತರನ್ನು ಕ್ವಾರಂಟೈನ್ ನಲ್ಲಿ‌ ಇಡಲಾಗಿದೆ. ಒಬ್ಬ ಶಂಕಿತ ವಿಡಿಯೋ ಮಾಡುತ್ತಿರುವಾಗ ಇನ್ನೊಬ್ಬ ಬಂದು ಕೈ ಮುಗಿದು, ‘ನಮಗೆ ಕೋವಿಡ್-19 ಸೋಂಕು ಬಂದಿದೆ’ ಎನ್ನುತ್ತ ಡ್ಯಾನ್ಸ್ ಮಾಡಿದ್ದಾನೆ. ವಾರ್ ರೂಮ್ ನಲ್ಲಿಯೇ ಈ ತರಹದ ಶಂಕಿತ ವ್ಯಕ್ತಿಯ ವರ್ತನೆ ಜನಸಾಮಾನ್ಯರಿಗೆ ಬೇಸರ ತಂದಿದೆ.

ಕೋವಿಡ್-19 ಸೋಂಕು ಹರಡದಂತೆ ವೈದ್ಯರು ಹಗಲಿರುಳು ಶ್ರಮಿಸುತ್ತಿದ್ದಾರೆ.‌ಇಂಥದ್ದರಲ್ಲಿ ನಮಗೆ ಯಾವುದೇ  ಉಪಚಾರ ನೀಡುತ್ತಿಲ್ಲ.‌ ವೈದ್ಯರು ಆರೈಕೆ‌ ಮಾಡುತ್ತಿಲ್ಲ ಎಂದು ಕೆಲವರು ತಗಾದೆ ತೆಗೆದಿದ್ದಾರೆ.‌ ಮೂವರು ವ್ಯಕ್ತಿಗಳು ಸೋಂಕು ಪಾಸಿಟಿವ್ ಇದ್ದರೂ ಅವರಿಗೂ ಸರಿಯಾದ ಚಿಕಿತ್ಸೆ ಸಿಗುತ್ತಿಲ್ಲ ಎಂದು ಸುಳ್ಳು ಆರೋಪ ಮಾಡಿದ್ದಾರೆ.‌