ಬೆಳಗಾವಿ: ಪತಿಯನ್ನು ಹತ್ಯೆಗೈದು ಎಮ್ಮೆ ಕರು ಸತ್ತಿತೆಂದು ಜೆಸಿಬಿಯಿಂದ ಹೂತು ಹಾಕಿದ ಪತ್ನಿ!

Team Udayavani, Sep 5, 2020, 9:47 PM IST

ಸಾಂದರ್ಭಿಕ ಚಿತ್ರ

ಚಿಕ್ಕೋಡಿ: ಅಕ್ರಮ ಸಂಬಂಧದ ಬಗ್ಗೆ ಪ್ರಶ್ನೆ ಮಾಡಿದ ಗಂಡನನ್ನು ಪತ್ನಿ ಕೊಲೆ ಮಾಡಿ ಎಮ್ಮೆ ಕರು ಸತ್ತಿದೆಂದು ಜೆಸಿಬಿ ಮೂಲಕ ಮನೆ ಅಂಗಳದಲ್ಲಿ ಹೂತು ಹಾಕಿದ ಘಟನೆ ನಿಪ್ಪಾಣಿ ತಾಲೂಕಿನ ಹಂಚನಾಳ ಗ್ರಾಮದಲ್ಲಿ ತಡವಾಗಿ ಬೆಳಕಿಗೆ ಬಂದಿದೆ.

ಮಹಾರಾಷ್ಟ್ರ ಕೊಲ್ಲಾಪೂರ ಜಿಲ್ಲೆಯ ಕಾಗಲ ತಾಲೂಕಿನ ನೇರ್ಲಿ ಗ್ರಾಮದ ಸಚಿನ ಸದಾಶಿವ ಭೋಪಳೆ(35). ಕೊಲೆಯಾದ ವ್ಯಕ್ತಿ.

ಪತಿ ಸಚಿನ ಹಾಗೂ ಪತ್ನಿ ಅನಿತಾ ನಡುವೆ ಆಗಾಗ ಅಕ್ರಮ ಸಂಬಂಧದ ಬಗ್ಗೆ ಗಲಾಟೆ ನಡೆಯುತ್ತಿತ್ತು. ಕಳೆದ ಎರಡು ದಿನಗಳ ಹಿಂದೆ ಇಬ್ಬರ ನಡುವೆ ಜಗಳ ನಡೆದು ವಿಕೋಪಕ್ಕೆ ಹೋದಾಗ ಪತ್ನಿ ಕಟ್ಟಿಗೆಯಿಂದ ಹೊಡೆದು ಪತಿಯನ್ನು ಕೊಲೆ ಮಾಡಿದ್ದಾಳೆ.

ಎಮ್ಮೆ ಕರು ಸತ್ತಿದೆಂದು ರಾತ್ರೋರಾತ್ರಿ ಜೆಸಿಬಿ ಚಾಲಕನನ್ನು ಕರೆಯಿಸಿಕೊಂಡು ತಗ್ಗಾ ತೆಗೆಯಿಸಿಕೊಂಡು ಬೆಳಿಗ್ಗೆ ಎಮ್ಮೆ ಕರು ತಗ್ಗಿನಲ್ಲಿ ಮುಚ್ಚುತ್ತೇನೆ ಎಂದು ಜೆಸಿಬಿ ಚಾಲಕನನ್ನು ಕಳಿಸಿಕೊಟ್ಡಿದ್ದಾರೆ. ಈಕೆಗೆ ಸಹಾಯ ಮಾಡಿದ ಸಹೋದರ ಕೃಷ್ಣಾ ಘಾಟಗೆ, ಸಹೋದರಿ ವನಿತಾ ಮತ್ತು ಕೊಲೆ ಮಾಡಿದ ಪತ್ನಿ ತಲೆ ಮರೆಯಿಸಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೂರು ದಿನ ಆದ ಬಳಿಕ ವ್ಯಕ್ತಿ ಕಾಣದೇ ಇದ್ದಾಗ ಸಂಶಯ ಮೂಡಿದ ಜೆಸಿಬಿ ಚಾಲಕ ಪೊಲೀಸರಿಗೆ ವಿಷಯ ತಿಳಿಸಿದ್ದಾರೆ. ಪೊಲೀಸರು ಮತ್ತು ಕಂದಾಯ ಅಧಿಕಾರಿಗಳು ಗುಂಡಿ ತೆರೆದಾಗ ವ್ಯಕ್ತಿಯ ಶವ ಸಿಕ್ಕಿದೆ. ಸ್ಥಳದಲ್ಲಿ ಪಂಚನಾಮೆ ನಡೆಸಿ ಕೊಲೆ ಮಾಡಿ ತಲೆ ಮರೆಯಿಸಿಕೊಂಡಿರುವ ಮೂವರ ಪತ್ತೆಗೆ ಪೊಲೀಸರು ಹುಡುಕಾಟ ನಡೆಸಿದ್ದಾರೆ. ನಿಪ್ಪಾಣಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.