ಪ್ರತ್ಯೇಕ ಅಪಘಾತ; ಇಬ್ಬರು ಪತ್ರಕರ್ತರ ಸಾವು

Team Udayavani, Jan 15, 2018, 6:30 AM IST

ಖಾನಾಪುರ/ಹಾನಗಲ್ಲ: ಪ್ರತ್ಯೇಕ ರಸ್ತೆ ಅಪಘಾತದಲ್ಲಿ ಇಬ್ಬರು ಪತ್ರಕರ್ತರು ಮೃತಪಟ್ಟಿದ್ದು, ಒಬ್ಬ ಪತ್ರಕರ್ತರ
ಶವವನ್ನು ಕಸದ ವಾಹನದಲ್ಲಿ ಸಾಗಿಸಿದ ಘಟನೆ ಜರುಗಿದೆ. 

ಖಾಸಗಿ ಸುದ್ದಿ ವಾಹಿನಿಯ ಮೌನೇಶ ಪೋತರಾಜ(28), ಬಾಗಲಕೋಟೆ ಬಿವಿವಿ ಕಾಲೇಜಿನ ಪತ್ರಿಕೋದ್ಯಮ ವಿಭಾಗದ ಅಧ್ಯಾಪಕ, ಹಿರಿಯ ಪತ್ರಕರ್ತ ಡಾ.ವೀರೇಶ ಹಿರೇಮಠ (34) ಮೃತರು.

ಹಾನಗಲ್ಲ ತಾಲೂಕಿನ ಗುಂಡೂರು ಗ್ರಾಮದ ಬಳಿ ಶನಿವಾರ ರಾತ್ರಿ ಮರಕ್ಕೆ ಬೈಕ್‌ ಡಿಕ್ಕಿ ಹೊಡೆದ ಪರಿಣಾಮ ಖಾಸಗಿ ಸುದ್ದಿವಾಹಿನಿ ವರದಿಗಾರ ಮೌನೇಶ ಹನುಮಂತಪ್ಪ ಪೋತರಾಜ (28) ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. 

ಸಂಕ್ರಾಂತಿ ನಿಮಿತ್ತ ಶನಿವಾರ ರಾತ್ರಿ ಶಿರಸಿಯಿಂದ ಸ್ವಗ್ರಾಮಕ್ಕೆ ಬೈಕ್‌ನಲ್ಲಿ ತೆರಳುತ್ತಿದ್ದಾಗ ಘಟನೆ ಜರುಗಿದೆ. ಸ್ಥಳಕ್ಕೆ ಭಾನುವಾರ ಬೆಳಗ್ಗೆ 9ಗಂಟೆ ಆಗಮಿಸಿದ ಪೊಲೀಸರು ಹಾನಗಲ್ಲ ಪುರಸಭೆಯ ಕಸ ತುಂಬುವ ವಾಹನದಲ್ಲಿ ಮೃತದೇಹ ಸಾಗಿಸಿದ್ದಾರೆ.

ಮಧ್ಯಾಹ್ನದವರೆಗೂ ವೈದ್ಯರೂ ಮರಣೋತ್ತರ ಪರೀಕ್ಷೆ ಕೈಗೊಳ್ಳದಿರುವುದರಿಂದ ಸಾರ್ವಜನಿಕರು ಹಾಗೂ ಮೃತರು ಸಂಬಂಧಿಕರು ಆಕ್ರೋಶ ವ್ಯಕ್ತಪಡಿಸಿ, ಕೊನೆಗೆ ಶವ ಊರಿಗೆ ತೆಗೆದುಕೊಂಡು ಹೋಗಿದ್ದಾರೆ.

ಇನ್ನೊಂದು ಪ್ರಕರಣದಲ್ಲಿ ಕುಟುಂಬ ಸಮೇತ ಗೋವಾಕ್ಕೆ ತೆರಳಿದ್ದ ಹಿರಿಯ ಪತ್ರಕರ್ತ ಡಾ.ವೀರೇಶ ಹಿರೇಮಠ ವಾಪಸ್‌ ಬರುವಾಗ ಖಾನಾಪುರ ತಾಲೂಕಿನ ನಂದಗಡ ಸಮೀಪದ ಗುಂಡೊಳ್ಳಿ ಗ್ರಾಮದ ಹತ್ತಿರ ಕಾರು ಅಪಘಾತವಾಗಿ ಮೃತಪಟ್ಟಿದ್ದಾರೆ. ಪತ್ನಿ, ಪುತ್ರರಿಗೂ ಗಾಯಗಳಾಗಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ. ಸ್ವಗ್ರಾಮ ಬಾದಾಮಿ ತಾಲೂಕು ಹೊಸೂರಿನಲ್ಲಿ ಭಾನುವಾರ ಸಂಜೆ ಅಂತ್ಯಕ್ರಿಯೆ ನೆರವೇರಿಸಲಾಗಿದೆ. ಈ ಕುರಿತು ನಂದಗಡ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಡಾ.ವೀರೇಶ ಹಿರೇಮಠ ವಿವಿಧ ರಾಜ್ಯ ಪತ್ರಿಕೆಗಳಲ್ಲಿ ಕೃಷಿ ಮಾಡಿದ್ದು, ಈ ನಡುವೆ ಬಾದಾಮಿ ತಾಲೂಕಿನಲ್ಲಿ “ಓದುಗ ದೊರೆ’ ಎಂಬ ಮಾಸ ಪತ್ರಿಕೆ ಪ್ರಾರಂಭಿಸಿದ್ದರು.