ಸುದೀಪ್‌ ಭೇಟಿಗಾಗಿ ಆತ್ಮಹತ್ಯೆ ಬೆದರಿಕೆ

Team Udayavani, Mar 9, 2017, 3:45 AM IST

ಬೆಳಗಾವಿ: ಖ್ಯಾತ ನಟ ಸುದೀಪ್‌ ಅವರನ್ನು ಭೇಟಿ ಮಾಡಲೇಬೇಕು, ಇಲ್ಲದಿದ್ದರೆ ಸಾಯುತ್ತೇವೆ ಎಂದು ಹಟ ಹಿಡಿದ ಇಬ್ಬರು ಯುವಕರು ಮೈಮೇಲೆ ಪೆಟ್ರೋಲ್‌ ಸುರಿದುಕೊಂಡು ಆತ್ಮಹತ್ಯೆಗೆ ಮುಂದಾದ ಘಟನೆ ನಗರದಲ್ಲಿ ಬುಧವಾರ ನಡೆದಿದೆ.

ಭೂತರಾಮನಹಟ್ಟಿ ಗ್ರಾಮದಿಂದ ಬಂದಿದ್ದ ಸಚಿನ್‌ ಪಾಟೀಲ ಹಾಗೂ  ಪ್ರವೀಣ ಪಾಟೀಲ ನಗರದ ಕನ್ನಡ ಸಾಹಿತ್ಯ ಭವನದ ಆವರಣದಲ್ಲಿ ಪೆಟ್ರೋಲ್‌ ಬಾಟಲಿಗಳನ್ನು ಹಿಡಿದುಕೊಂಡು ಸಂಚರಿಸುತ್ತಿದ್ದಾಗ ಈ ಸಂಗತಿ ಬೆಳಕಿಗೆ ಬಂತು. ಮೈಮೇಲೆ ಕಿಚ್ಚ ಸುದೀಪ್‌ ಎಂದು ಬರೆದುಕೊಂಡಿದ್ದ ಈ ಯುವಕರು, ಸುದೀಪ್‌ ಅವರನ್ನು ಭೇಟಿ ಮಾಡದಿದ್ದರೆ ಇಲ್ಲಿಯೇ ಸಾಯುವುದಾಗಿ ಎಚ್ಚರಿಕೆ ನೀಡಿದರು.

ಆಗ ತಕ್ಷಣ ಅಲ್ಲೇ ಇದ್ದ ಪೊಲೀಸರು ಯುವಕರ ಕೈಲಿದ್ದ ಪೆಟ್ರೋಲ್‌ ಬಾಟಲಿಗಳನ್ನು ವಶಪಡಿಸಿಕೊಂಡು ಅನಾಹುತ ತಪ್ಪಿಸಿದರು. ಮಹಿಳಾ ಸಂಘಟನೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಬಂದಿದ್ದ ಡಿಸಿಪಿ ರಾಧಿಕಾ ಯುವಕರ ವಿಚಾರಣೆ ನಡೆಸಿ ಇಬ್ಬರನ್ನೂ ಸೂಕ್ತ ಸಮಾಲೋಚನೆಗೆ ಒಳಪಡಿಸುವಂತೆ ಪೊಲೀಸ್‌ ಅಧಿಕಾರಿಗಳಿಗೆ ಸೂಚಿಸಿದರು.

ದಯವಿಟ್ಟು ನನ್ನನ್ನು ಕ್ಷಮಿಸಿ. ಕಾರಣಾಂತರಗಳಿಂದ ಅಲ್ಲಿಗೆ ಬರಲು ಸಾಧ್ಯವಾಗಲಿಲ್ಲ. ಅಭಿಮಾನಿಗಳೇ, ನಾನು ಬರದಿದ್ದಕ್ಕೆ ಇಂತಹ ತಪ್ಪು ಕೆಲಸಗಳನ್ನು ಮಾಡಬೇಡಿ. ಸದ್ಯದಲ್ಲೇ ನಾನು ರಾಜ್ಯಾದ್ಯಂತ ಪ್ರವಾಸ ಮಾಡುತ್ತೇನೆ. ಅಭಿಮಾನಿಗಳಾÂರೂ ಇಂತಹ ಕೆಲಸಕ್ಕೆ ಮುಂದಾಗಬಾರದು.
– ಸುದೀಪ್‌ (ವಿಡಿಯೋ ಸಂದೇಶ ಮೂಲಕ ಮನವಿ )