ಬಸವಣ್ಣನ ಮಾನವ ಧರ್ಮ ನಮ್ಮದಾಗಲಿ

Team Udayavani, Aug 28, 2017, 4:10 PM IST

ಬಳ್ಳಾರಿ: ಪ್ರಸ್ತುತ ಸಮಾಜದಲ್ಲಿ ದೇವ ಮಾನವರೆಂದು ಕರೆಸಿಕೊಂಡವರ ಆಟಾಟೋಪಗಳ ನಡುವೆ ಬಸವಣ್ಣ ಹೇಳಿದ ಮಾನವ ಧರ್ಮ ನಮ್ಮದಾಗಬೇಕು ಎಂದು ಸುಪ್ರೀಂಕೋರ್ಟ್‌ನ ನಿವೃತ್ತ ನ್ಯಾಯಮೂರ್ತಿ ಶಿವರಾಜ್‌ ಪಾಟೀಲ್‌ ಹೇಳಿದರು. ನಗರದ ಹೊರವಲಯದ ಅಲ್ಲೀಪುರ
ಶ್ರೀ ಸದ್ಗುರು ಮಹಾದೇವ ತಾತನವರ ಟ್ರಸ್ಟ್‌ ಸಮಿತಿ, ಮೂಲಮಠ ಜ್ಞಾನ ರಂಭಾಪುರಿ ಶಿವ ಕ್ಷೇತ್ರದಲ್ಲಿ ಭಾನುವಾರ 63 ಪುರಾತನರ ದೇಗುಲ ಹಾಗೂ ಬಸವಣ್ಣನ ಶಿಲಾಮಯ ಮಂಟಪ ಉದ್ಘಾಟಿಸಿ ಅವರು ಮಾತನಾಡಿದರು. ನಮಗೆ ದೇವ ಮಾನವರು ಬೇಕಾಗಿಲ್ಲ. ಆದರೆ ಮಾನವ ದೇವರು ಬೇಕು. ಜಗಜ್ಯೋತಿ ಬಸವಣ್ಣ ಒಂದು ಜಾತಿ, ಮತ, ಪಂಥ ಹಾಗೂ ಧರ್ಮಗಳಿಗೆ ಸೀಮಿತರಲ್ಲ. ಅವರೊಬ್ಬ ವಿಶ್ವಮಾನವ. ಅವರನ್ನು ಒಂದು ಸೀಮಿತ ಜನಾಂಗಕ್ಕೆ  ಸಲಾಗಿಸೋದು ಬಸವಣ್ಣನ ವಿಶ್ವ ಮಾನವ ತತ್ವಗಳಿಗೆ ನಾವು ಮಾಡುವ ಅಪಚಾರ ಎಂದರು. ಬಸವಣ್ಣ ಇವನ್ಯಾರು ಇವನ್ಯಾರು ಎಂದು ಪ್ರಶ್ನಿಸದೇ ಇವ ನಮ್ಮವ, ಇವ ನಮ್ಮವ ಎಂದವರು. ಆದರೆ, ಇತ್ತೀಚೆಗೆ ಈ ತತ್ವಗಳಿಂದ ಕೆಲವರು ದೂರಾಗುತ್ತಿದ್ದಾರೆ. ಎಲ್ಲರಲ್ಲಿ ಇರುವ ಮಾನವೀಯ ಮೌಲ್ಯಗಳಲ್ಲಿ ಬಸವಣ್ಣನನ್ನು ಕಾಣಬೇಕು ಎಂದು ಹೇಳಿದರು. ಬಸವಣ್ಣನ ಕುರಿತು ಜರುಗುತ್ತಿರುವ ಸಂಘಟನೆಗಳನ್ನು ನಮ್ಮ ಆತ್ಮಸಾಕ್ಷಿಯ ನೆಲೆಗಟ್ಟಿನಲ್ಲಿ ಪರಿಶೀಲಿಸಬೇಕು. ಬಸವಣ್ಣನ ಅನುಯಾಯಿಗಳು ಬಸವೇಶ್ವರರ ವಿಚಾರಧಾರೆ ಅಳವಡಿಸಿಕೊಳ್ಳಬೇಕು. ಲಿಂಗಾಯತ ಒಂದು ಸೀಮಿತ ಜಾತಿ, ಜನಾಂಗಕ್ಕೆ ಸೇರಿದ ಧರ್ಮ ಆಗಬಾರದು. ಅದು ಸರ್ವ ಧರ್ಮೀಯರ, ಜಾತಿ ಸಮುದಾಯದ ಶಾಂತಿಯ ತೋಟ
ಆಗಬೇಕು ಎಂದರು. ಸಂಸ್ಕೃತ ನಮ್ಮ ದೇಶದ ದೇವ ಭಾಷೆ ಎನಿಸಿದೆ. ಆದರೆ, ಅದು ಜನರ ಭಾಷೆ ಆಗಲಿಲ್ಲ. ಆದ್ದರಿಂದ ಅದು ಅವಸಾನದ ಅಂಚಿನತ್ತ ಸಾಗುತ್ತಿದೆ. ಆದರೆ, ಬಸವಣ್ಣ ಆಡು ಭಾಷೆಯನ್ನೇ ದೇವ ಭಾಷೆಯನ್ನಾಗಿಸಿದ. ಜನವಾಣಿಯನ್ನೇ ದೇವವಾಣಿಯನ್ನಾಗಿಸಿದ ಮಹಾಪುರುಷ ಎಂದರು. ಎಲ್ಲ ಜಾತಿ, ಜನಾಂಗದ ಜನರ ನಡುವೆ ಸಮಾನತೆ, ಸತ್ಯ-ಶುದ್ಧವಾದ ಕಾಯಕ ಹಾಗೂ ಸನ್ನಡತೆ ಸಾರಿದ ಮಹಾನುಭಾವ ಬಸವಣ್ಣ. ಅಂಥವರ ಮೂರ್ತಿ ಅನಾವರಣಗೊಳಿಸಿದರೆ ಸಾಲದು. ಅವರ ಕಾಯಕ ತತ್ವ, ನಡೆ, ನುಡಿಗಳನ್ನು ನಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಆಗಮಾತ್ರ ಬಸವಣ್ಣ ಕಂಡ ಆದರ್ಶ ಸಮಾಜದ ಪರಿಕಲ್ಪನೆ ಸಾಕಾರವಾಗುತ್ತದೆ ಎಂದರು. ನಮ್ಮ ದೇಶದಲ್ಲಿ ಸಾವಿರಾರು ಪುಣ್ಯ ಪುರುಷರು ನಡೆದಾಡಿದ್ದಾರೆ. ಅಪಾರ ಪ್ರಮಾಣದಲ್ಲಿ ದೇವಸ್ಥಾನಗಳು ನಮ್ಮ ನಡುವೆ ಇವೆ. ಆದರೆ, ಬಹುತೇಕ ದೇವಸ್ಥಾನಗಳು ದೇವತಾರ್ಚನೆಗೆ ಸೀಮಿತವಾಗಿವೆ. ಅದಕ್ಕಿಂತ ಹೆಚ್ಚಾಗಿ ದೇವಾಲಯಗಳು ಜ್ಞಾನ ಪ್ರಸಾರ ಮಾಡುವ, ಮಾನವೀಯ ಅನುಕಂಪ, ಪರೋಪಕಾರ ಭಾವನೆ ಬೆಳೆಸುವ ಕಾರ್ಯ ಮಾಡಬೇಕು. ಅದೇ ನಾವು ಸಲ್ಲಿಸಬಹುದಾದ ಮಹಾಪೂಜೆ ಎಂದು ಹೇಳಿದರು. ಉತ್ತಮ ಕಾರ್ಯ ಮಾಡುವವರಿಗೆ 365 ದಿನಗಳೂ ಒಳ್ಳೆಯ ದಿನಗಳು. ಮುಹೂರ್ತಕ್ಕಾಗಿ ಕಾಯುತ್ತಾ ಕುಳಿತುಕೊಳ್ಳುವ ಮನಸ್ಥಿತಿ ಬದಲಾಗಬೇಕು. ಆಗ ಮಾತ್ರ ಮೌಡ್ಯ ಮತ್ತು ಕಂದಾಚಾರ ಮುಕ್ತ ಸಮಾಜ ನಿರ್ಮಿಸಲು ಸಾಧ್ಯವಾಗಲಿದೆ. ನಾವು ಭಾಷಣ ಮತ್ತು ಘೋಷಣೆ ಮಾಡುವುದನ್ನು ಕಡಿಮೆ ಮಾಡಬೇಕು. ಆಚಾರ, ಅನುಷ್ಠಾನಗಳನ್ನು ಅಳವಡಿಸಿಕೊಳ್ಳಬೇಕು ಎಂದರು. ಬಳ್ಳಾರಿ ಜಿಲ್ಲಾ ಪ್ರಧಾನ ಹಾಗೂ ಸತ್ರ ನ್ಯಾಯಾ ಧೀಶ ಎಚ್‌.ಆರ್‌. ಶ್ರೀನಿವಾಸ ಮಾತನಾಡಿ, ಒಂದು ಮಠದ ಆಡಳಿತದಲ್ಲಿ ಸಂಘಟನೆ ಇರಬೇಕು. ಆಗ ಆ ಮಠದ ಧ್ಯೇಯ ಸಾ ಧಿಸಲು, ಉನ್ನತ ಸ್ಥಾನಕ್ಕೆ ಹೋಗಲು ಸಾಧ್ಯ. ಒಂದು ವೇಳೆ ಒಡಕಾದರೆ ಆಶಯ ವ್ಯರ್ಥವಾಗುವುದು. ನ್ಯಾ| ಶಿವರಾಜ್‌ ಪಾಟೀಲ್‌ ಅವರ ಸಲಹೆಗಳನ್ನು ಪಡೆದು ಮಹಾದೇವ ತಾತನವರ ಮಠವನ್ನು ರಾಜ್ಯದಲ್ಲಿಯೇ ಮಾದರಿ
ಮಠವನ್ನಾಗಿಸಬೇಕು ಎಂದರು. ಕೃತಿ ಲೋಕಾರ್ಪಣೆ: ಶರಣ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷ ಕೆ.ಬಿ.ಸಿದ್ಧಲಿಂಗಪ್ಪ ರಚಿಸಿದ ಅರವತ್ತಮೂರು ಪುರಾತನರು ಎಂಬ ಕೃತಿಯನ್ನು ಎಮ್ಮಿಗನೂರಿನ ಹಂಪಿ ಸಾವಿರ ದೇವರ ಮಠದ ವಾಮದೇವ ಶಿವಾಚಾರ್ಯ ಸ್ವಾಮೀಜಿ ಲೋಕಾರ್ಪಣೆ ಮಾಡಿದರು. ವಚನ ಶಿರೋಮಣಿ ಬಸವಣ್ಣ ಕಿರುಕೃತಿಯನ್ನು ಜಿಲ್ಲಾ ಪ್ರಧಾನ ಮತ್ತು ಸೆಷನ್ಸ್‌ ನ್ಯಾಯಾಲಯದ ನ್ಯಾಯಾಧಿಧೀಶ ಎಚ್‌.ಆರ್‌. ಶ್ರೀನಿವಾಸ ಲೋಕಾರ್ಪಣೆ ಮಾಡಿದರು. ಸಮಾರಂಭದಲ್ಲಿ 63 ಪುರಾತನರ ಹಾಗೂ ಬಸವಣ್ಣನ ವಿಗ್ರಹ ದಾನಿಗಳಾದ ಸಂಗನಕಲ್ಲು ಬಸವರಾಜ ದಂಪತಿಯನ್ನು ಸನ್ಮಾನಿಸಲಾಯಿತು. ಟ್ರಸ್ಟ್‌ ಕಮಿಟಿಯ ಅಧ್ಯಕ್ಷ ಎಸ್‌. ಚೆನ್ನನಗೌಡ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.