ದೇವದಾಸಿಯರಿಗೆ ಆರ್ಥಿಕ ನೆರವು ನೀಡಲು ಆಗ್ರಹ

Team Udayavani, Jun 9, 2020, 2:18 PM IST

ಹಗರಿಬೊಮ್ಮನಹಳ್ಳಿ: ವಿವಿಧ ಬೇಡಿಕೆ ಈಡೇರಿಸಲು ಆಗ್ರಹಿಸಿ ದೇವದಾಸಿ ವಿಮೋಚನೆ ಸಂಘದ ಪದಾಧಿಕಾರಿಗಳು ತಹಶೀಲ್ದಾರ್‌ಗೆ ಮನವಿ ಸಲ್ಲಿಸಿದರು.

ಹಗರಿಬೊಮ್ಮನಹಳ್ಳಿ: ಕೋವಿಡ್ ವೈರಸ್‌ ಸಮರ್ಪಕವಾಗಿ ಎದುರಿಸಲು ದೇವದಾಸಿ ಮತ್ತು ಬಡ ಕುಟುಂಬಗಳಿಗೆ ಕನಿಷ್ಠ 6 ತಿಂಗಳು 7500 ರೂ. ಧನ ಸಹಾಯ ನೀಡುವಂತೆ
ಒತ್ತಾಯಿಸಿ ದೇವದಾಸಿ ವಿಮೋಚನೆ ಸಂಘದ ತಾಲೂಕು ಪದಾ ಧಿಕಾರಿಗಳು ತಹಶೀಲ್ದಾರ್‌ ಕಚೇರಿ ಎದುರು ಪ್ರತಿಭಟಿಸಿದರು. ದೇವದಾಸಿ ವಿಮೋಚನಾ ಸಂಘದ ರಾಜ್ಯ ಕಾರ್ಯದರ್ಶಿ ಬಿ.ಮಾಳಮ್ಮ ಮಾತನಾಡಿ, ಬಡ ಕುಟುಂಬದವರಿಗೆ ಮತ್ತು ದೇವದಾಸಿ ಮಹಿಳೆಯರಿಗೆ ತಲಾ 10 ಕೆಜಿ ಅಕ್ಕಿ ಮತ್ತು ಆರೋಗ್ಯದ ಉಚಿತ ತಪಾಸಣೆ ನಡೆಸಬೇಕು. ಕೋವಿಡ್‌-19 ಪರಿಸ್ಥಿತಿ ಎದುರಿಸಲಾಗದಷ್ಟು ಆರ್ಥಿಕ ಸಂಕಷ್ಟಕ್ಕೆ ದೇವದಾಸಿ ಕುಟುಂಬಗಳು ಸಿಲುಕಿವೆ.

ಲಾಕ್‌ಡೌನ್‌ನಿಂದ ಈವರೆಗೂ ಬಡ ಕುಟುಂಬಗಳು ಚೇತರಿಸಿಕೊಳ್ಳದಂತಾಗಿದೆ. ಈ ಹಿನ್ನೆಲೆಯಲ್ಲಿ ಶೋಷಿತ ದೇವದಾಸಿಯರಿಗೆ ಕನಿಷ್ಠ 6 ತಿಂಗಳು 7500 ರೂ. ಧನ
ಸಹಾಯ ಕಲ್ಪಿಸಬೇಕು ಎಂದು ಒತ್ತಾಯಿಸಿದರು. ನಂತರ ತಹಶೀಲ್ದಾರ್‌ ಆಶಪ್ಪ ಪೂಜಾರ್‌ಗೆ ಮನವಿ ಸಲ್ಲಿಸಲಾಯಿತು. ಸಂಘದ ಮುಖಂಡರಾದ ಹುಲಿಗೆಮ್ಮ, ಹನುಮಂತಪ್ಪ ರತ್ನಮ್ಮ, ಹನುಮಕ್ಕ, ಪುಷ್ಪಾ ಇದ್ದರು.