ನೌಕರರು ಜನ ಗುರುತಿಸುವ ಕೆಲಸ ಮಾಡಿ

Team Udayavani, Jul 31, 2017, 2:41 PM IST

ಕಂಪ್ಲಿ: ಸರ್ಕಾರಿ ನೌಕರರಿಗೆ ವರ್ಗಾವಣೆ ಎನ್ನುವುದು ಸಾಮಾನ್ಯವಾಗಿದ್ದು, ನೌಕರರು, ಅಧಿಕಾರಿಗಳು ಎಲ್ಲಿಯೇ ಹೋದರೂ ಅಲ್ಲಿಯ ಜನತೆ ಗುರುತಿಸುವಂತ ಕಾರ್ಯ ಮಾಡಬೇಕು ಎಂದು ಹಂಪಿ ಉಪವಿಭಾಗದ ಡಿವೈಎಸ್‌ಪಿ ಸಿ.ಆರ್‌. ಹೊನವಾಡ್ಕರ್‌ ಹೇಳಿದರು.

ಪಟ್ಟಣದ ಪೊಲೀಸ್‌ ಠಾಣೆಯಲ್ಲಿ ಆಯೋಜಿಸಿದ್ದ ವರ್ಗಾವಣೆಗೊಂದ ಕಂಪ್ಲಿ ವೃತ್ತ ನಿರೀಕ್ಷರಿಗೆ ಬೀಳ್ಕೊಡುಗೆ ಮತ್ತು ಕಂಪ್ಲಿ ವೃತ್ತಕ್ಕೆ ಆಗಮಿಸಿದ ನೂತನ ವಲಯ ನಿರೀಕ್ಷಕರಿಗೆ ಸ್ವಾಗತ ಸಮಾರಂಭದ ಅಧ್ಯಕ್ಷ ವಹಿಸಿ ಅವರು ಮಾತನಾಡಿದರು. ಕಂಪ್ಲಿ ವೃತ್ತದಲ್ಲಿ ಕಳೆದ ಒಂದು ವರ್ಷದಲ್ಲಿ ವೃತ್ತ ನಿರೀಕ್ಷಕರಾಗಿ ಕಾರ್ಯನಿರ್ವಹಿಸದ ಸಿದ್ದೇಶ್ವರ ಕೃಷ್ಣಾಪುರ ಉತ್ತಮವಾಗಿ ಕಾರ್ಯನಿರ್ವಹಿಸಿ ಎಲ್ಲರ ಮನಗೆದ್ದಿದ್ದಾರೆ. ವಲಯದಲ್ಲಿ ಸಮರ್ಪಕವಾಗಿ ಶಾಂತಿ ಸುವ್ಯವಸ್ಥೆ ಕಾಪಾಡಿದ್ದಾರೆ ಎದರು.  

ಪುರಸಭೆ ಅಧ್ಯಕ್ಷ ಎಂ.ಸುಧೀರ್‌ ಮಾತನಾಡಿ, ಪುರಸಭೆ ಸದಸ್ಯರು ಹಾಗೂ ಕಂಪ್ಲಿ ಬ್ಲಾಕ್‌ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷ ಸಿ.ಆರ್‌. ಹನುಮಂತ ಹಾಗೂ ಇತರರು ವೃತ್ತ ನಿರೀಕ್ಷಕರ ಕಾರ್ಯಕ್ಷಮತೆಯನ್ನು ಶ್ಲಾಘಿಸಿದರು. ಸನ್ಮಾನ ಸ್ವೀಕರಿಸಿ ಮಾತನಾಡಿದ ವೃತ್ತ ನಿರೀಕ್ಷಕ ಸಿದ್ದೇಶ್ವರ ಕೃಷ್ಣಾಪುರ, ಕಂಪ್ಲಿ ವಲಯದಲ್ಲಿ ಅಧಿಕಾರಿಗಳು, ಸಿಬ್ಬಂದಿಗಳು ಹಾಗೂ ಸಾರ್ವಜನಿಕರ ಸಹಕಾರದಿಂದ ಉತ್ತಮವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಯಿತು. ಪ್ರತಿಯೊಬ್ಬರೂ ಶಾಂತಿ ಸುವ್ಯವಸ್ಥೆ ಕಾಪಾಡುವಲ್ಲಿ ಸಹಕಾರ ನೀಡಬೇಕು ಎಂದರು. 

ಕಂಪ್ಲಿ ವಲಯಕ್ಕೆ ವೃತ್ತ ನಿರೀಕ್ಷಕರಾಗಿ ಆಗಮಿಸಿರುವ ಎಚ್‌. ದೊಡ್ಡಣ್ಣ ಮಾತನಾಡಿ, ಸಾರ್ವಜನಿಕರ ಸಹಕಾರ ಇಲ್ಲದಿದ್ದರೆ ಕಾನೂನು ಸುವ್ಯವಸ್ಥೆ ಕಾಪಾಡುವುದು ಕಷ್ಟಸಾಧ್ಯ. ಶಾಂತಿಸುವ್ಯವಸ್ಥೆ ಕಾಪಾಡಲು ಪ್ರತಿಯೊಬ್ಬರೂ ಸಹಕರಿಸಬೇಕು ಎಂದರು. ಕಮಲಾಪುರ ಪಿಎಸ್‌ಐ ಬೇರಿ ಭೀಮನಗೌಡ ಮಾತನಾಡಿ, ಪೊಲೀಸ್‌ ಇಲಾಖೆಯಲ್ಲಿ ಒಂದೇ  ವರ್ಷಕ್ಕೆ ವರ್ಗಾವಣೆಗೆ ಅರ್ಹರಾಗುತ್ತಾರೆ. ಆದರೆ, ಈ ವರ್ಗಾವಣೆ ನೀತಿಯನ್ನು ಬದಲಾಯಿಸಬೇಕು. ಒಂದು ಠಾಣೆಯಿಂದ ಮತ್ತೂಂದು ಠಾಣೆಗೆ ಬಂದಾಗ ಅಲ್ಲಿಯ ಪರಿಸ್ಥಿತಿ ಅರಿಯಲು ಸಮಯಬೇಕಾಗುತ್ತದೆ. ಇನ್ನು ಉತ್ತಮವಾಗಿ
ಕಾರ್ಯನಿರ್ವಹಿಸಬೇಕೆನ್ನುವಾಗಲೇ ಒಂದು ವರ್ಷವಾಗಿರುತ್ತದೆ.ಹಾಗೂ ವರ್ಗಾವಣೆ ಮಾಡುತ್ತಾರೆ. ಇದರಿಂದ ಕುಟುಂಬದ ಪರಿಸ್ಥಿತಿ ಏನಾಗಬೇಕು ಎಂದು ಪ್ರಶ್ನಿಸಿದರು. ಪುರಸಭೆ ಮುಖ್ಯಾಧಿಕಾರಿ ಎಂ. ವಿಜಯಲಕ್ಷ್ಮೀ, ಪಿಎಸ್‌ಐ ಬಿ. ನಿರಂಜನ್‌ ಮಾತನಾಡಿದರು.

ನಂತರ ಕಂಪ್ಲಿ ಮತ್ತು ಕಮಲಾಪುರ ಠಾಣೆಯ ಸಿಬ್ಬಂದಿಗಳ ಪರವಾಗಿ ವರ್ಗಾವಣೆಗೊಂಡ ಸಿಪಿಐ ಸಿದ್ದೇಶ್ವರ ಕೃಷ್ಣಾಪುರ ಅವರನ್ನು ಸನ್ಮಾನಿಸಲಾಯಿತು. ನೂತನವಾಗಿ ಕಂಪ್ಲಿಗೆ ಆಗಮಿಸಿರುವ ಸಿಪಿಐ ಎಚ್‌ .ದೊಡ್ಡಣ್ಣನವರನ್ನು ಸ್ವಾಗತಿಸಲಾಯಿತು. ಎಎಸ್‌ ಐಗಳಾದ ಎಜೆ ಚೆನ್ನವೀರಣ್ಣ, ಹಗರಪ್ಪ, ರಫಿಕ್‌, ಕಂಪ್ಲಿ, ಕಮಲಾಪುರ ಠಾಣೆಗಳ ಸಿಬ್ಬಂದಿಗಳು, ಪಟ್ಟಣದ ವಿವಿಧ ಸಂಘ-ಸಂಸ್ಥೆಗಳ ಮುಖಂಡರು, ವಿವಿಧ ಗ್ರಾಮಗಳ ಮುಖಂಡರು ಭಾಗವಹಿಸಿದ್ದರು.