ನಿಸರ್ಗದಿಂದ ಮಾತ್ರ ತಾಪಮಾನ ನಿಯಂತ್ರಣ

Team Udayavani, Jun 8, 2020, 7:58 AM IST

ಕಂಪ್ಲಿ: ಜಾಗತಿಕ ತಾಪಮಾನ ತಡೆಗಟ್ಟಬೇಕಾದರೆ ಅದು ಪರಿಸರ ಸಂರಕ್ಷಣೆಯಿಂದ ಮಾತ್ರ ಸಾಧ್ಯ ಎಂದು ಬಳ್ಳಾರಿ ಜಿಲ್ಲಾ ಗ್ರಂಥಾಲಯದ ಸಹಾಯಕ ಗ್ರಂಥಪಾಲಕ ಕೆ.ಬಸವರಾಜ ಅಭಿಪ್ರಾಯ ವ್ಯಕ್ತಪಡಿಸಿದರು.

ಪಟ್ಟಣದ 22ನೇ ವಾರ್ಡ್‌ನ ಶಿರಡಿ ಸಾಯಿಬಾಬಾ ದೇವಸ್ಥಾನ ಬಳಿಯ ಸಿಂಧೋಳ್‌ ಕಾಲೋನಿಯ ಅಲೆಮಾರಿ ಗ್ರಂಥಾಲಯ ಆವರಣದಲ್ಲಿ ನಡೆದ ಪರಿಸರ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಹನಿಹನಿ ಕೂಡಿದರೆ ಹಳ್ಳ ಎಂಬಂತೆ ಪ್ರಕೃತಿಯನ್ನು ಉಳಿಸುವಲ್ಲಿ ನಾವು ಮಾಡುವ ಸಣ್ಣ-ಪುಟ್ಟ ಕಾರ್ಯವೇ ದೊಡ್ಡದಾಗಿ ಪರಿವರ್ತನೆಯಾಗಲಿದೆ ಎಂದರು.

ಅಲೆಮಾರಿ ಗ್ರಂಥಾಲಯದ ಮೇಲ್ವಿಚಾರಕ ಎಚ್‌.ಪಿ. ಶಿಕಾರಿರಾಮು ಮಾತನಾಡಿ, ಪರಿಸರದಿಂದ ಭೂಮಿ ಮೇಲೆ ಉತ್ತಮ ಮಳೆ, ಬೆಳೆ ಕಾಣಲು ಸಾಧ್ಯ. ಪ್ರತಿಯೊಬ್ಬರು ಮನೆಯ ಮುಂದೆ ಸಸಿಗಳನ್ನು ನೆಡುವ ಮೂಲಕ ಪರಿಸರ ಉಳಿಸಬೇಕಿದೆ ಎಂದರು.

ಎಸ್‌.ಟಿ. ಪ್ರಭಾಕರ, ಡಿ.ವಿರೇಶ್‌ಬಾಬು, ಗನಿಸಾಬ್‌, ಪ್ರಹ್ಲಾದ್‌, ಶ್ರೀನಿವಾಸ, ಆರ್‌. ಶಿವು, ಉದಯಕಿರಣ್‌, ಎಚ್‌.ಪಿ. ಸುರೇಶ್‌, ಗೌತಮ್‌ ಸೇರಿದಂತೆ ಇತರರು ಪಾಲ್ಗೊಂಡಿದ್ದರು.