ಹರಪನಹಳ್ಳಿ: ನಾಲ್ವರಿಗೆ ಪಾಸಿಟಿವ್‌

Team Udayavani, Jul 26, 2020, 10:43 AM IST

ಹರಪನಹಳ್ಳಿ: ಪಟ್ಟಣದ ಕಂದಾಯ ವಿಭಾಗ ಉಪವಿಭಾಗಾಧಿಕಾರಿ ಕಚೇರಿ ಸಿಬ್ಬಂದಿ, ಕೆಎಸ್‌ ಆರ್‌ಟಿಸಿ ಸಿಬ್ಬಂದಿ ಸೇರಿದಂತೆ ಶನಿವಾರ ತಾಲೂಕಿನಲ್ಲಿ 4 ಕೋವಿಡ್ ಪಾಸಿಟಿವ್‌ ವರದಿ ಬಂದಿವೆ. ಗೌರಿಹಳ್ಳಿ ಗ್ರಾಮದ 48 ವರ್ಷದ ಪುರುಷ ಆಟೋ ಖರೀದಿಗಾಗಿ ದಾವಣಗೆರೆ ನಗರಕ್ಕೆ ಹೋಗಿ ಬಂದಿದ್ದು ಜು.17ರಂದು ಗಂಟಲು ದ್ರವ ಪರೀಕ್ಷೆಗೆ ನೀಡಿದ್ದು ಶನಿವಾರ ಪಾಸಿಟಿವ್‌ ವರದಿ ಬಂದಿದೆ.

ಈತನಿಗೆ 11 ಪ್ರಾಥಮಿಕ ಸಂಪರ್ಕ ಗುರುತಿಸಲಾಗಿದೆ. ಶುಕ್ರವಾರ ಸಂಜೆ ಗೋವೇರಹಳ್ಳಿಯಲ್ಲಿ ನಡೆದ ಮುಖ್ಯ ಪೇದೆ ಅಂತ್ಯಕ್ರಿಯೆಯಲ್ಲಿಯೂ ಈತನು ಭಾಗವಹಿಸಿದ್ದು ಹರಪನಹಳ್ಳಿ ಠಾಣೆಯ ಇಬ್ಬರು ಎಎಸ್‌ಐ ಅವರನ್ನು ಪ್ರಾಥಮಿಕ ಸಂಪರ್ಕದಲ್ಲಿ ಗುರುತಿಸಲಾಗಿದೆ. ಹರಪನಹಳ್ಳಿ ಪಟ್ಟಣದ ಗುಡೆಕಟ್ಟೆಕೇರಿಯ 37 ವರ್ಷದ ಪುರುಷ ದಾವಣಗೆರೆ ಕೆಎಸ್‌ಆರ್‌ಟಿಸಿ ಡಿಪೋದಲ್ಲಿ ಮೆಕಾನಿಕ್‌ ಆಗಿ ಕೆಲಸ ನಿರ್ವಹಿಸುತ್ತಿದ್ದು ಇವರಿಗೆ ಶನಿವಾರ ಕೋವಿಡ್ ದೃಢಪಟ್ಟಿದೆ. ಇವರಿಗೆ 6 ಪ್ರಾಥಮಿಕ ಸಂಪರ್ಕಿತರನ್ನು ಗುರುತಿಸಲಾಗಿದೆ.

ಪಟ್ಟಣದ ಚಿತ್ತಾರಗೇರಿ 20 ವರ್ಷದ ಯುವಕನಿಗೆ ಕೋವಿಡ್ ದೃಢವಾಗಿದ್ದು, ಈತನು ದಾವಣಗೆರೆಗೆ ಹೋಗಿ ಬಂದಿದ್ದು 1 ಪ್ರಾಥಮಿಕ ಸಂಪರ್ಕಿತರನ್ನು ಗುರುತಿಸಲಾಗಿದೆ. ಪಟ್ಟಣದ ಕುರುಬರಗೇರಿಯ 40 ವರ್ಷದ ಪುರುಷನಿಗೆ ಕೋವಿಡ್ ದೃಢವಾಗಿದ್ದು ಪಟ್ಟಣದ ಉಪವಿಭಾಗಾಧಿಕಾರಿಗಳ ಕಚೇರಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ಇವರು ಜು. 24ರಂದು ನಡೆದ ಸ್ನೇಹಿತನ ಜನ್ಮದಿನದ ಸಮಾರಂಭದಲ್ಲಿ ಭಾಗವಹಿಸಿದ್ದು ಕಾರ್ಯಕ್ರಮದಲ್ಲಿ ಭಾಗವಹಿಸಿದ 10 ಜನ ಸ್ನೇಹಿತರು ಮತ್ತು ಕುಟುಂಬದವರು ಸೇರಿ ಒಟ್ಟು 14 ಪ್ರಾಥಮಿಕ ಸಂಪರ್ಕಿತರನ್ನು ಗುರುತಿಸಲಾಗಿದೆ