ನಷ್ಟದ ಭೀತಿಯಲ್ಲಿ ಪಪ್ಪಾಯಿ ಬೆಳೆಗಾರ

Team Udayavani, Apr 19, 2020, 12:05 PM IST

ಸಂಡೂರು: ತಾಲೂಕಿನ ಕೃಷ್ಣಾನಗರ ಗ್ರಾಮದ ಹತ್ತಿರ ರೈತ ಕೆ.ಬಿ. ಚಂದ್ರೇಗೌಡ ಬೆಳೆದ ಪಪ್ಪಾಯಿ ಬೆಳೆ.

ಸಂಡೂರು: ಈರುಳ್ಳಿ ಕೈ ಕೊಟ್ಟಿತು, ಎಲೆ ತೋಟ ಗಾಳಿಗೆ ಬಿದ್ದಿತು ಎಂದು ಮರು ಪ್ರಯತ್ನದೊಂದಿಗೆ ನೂತನ ತೋಟಗಾರಿಕಾ ಬೆಳೆಯಾಗಿ ಪಪ್ಪಾಯಿ ಬೆಳೆದರೆ ಹಣ್ಣಿಗೆ ಬಂದಾಗ ಕೋವಿಡ್ ಬಂದಿತು ಮಾರುಕಟ್ಟೆ ಇಲ್ಲದೆ, ಕೊಳ್ಳುವವರು ಇಲ್ಲದೆ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ ತಾಲೂಕಿನ ಕೃಷ್ಣಾನಗರ ಹತ್ತಿರ ತೋಟದಲ್ಲಿ ಬೆಳೆದ ಕೆ.ಬಿ. ಚಂದ್ರಗೌಡ ಅವರ ಸ್ಥಿತಿ.

ತಾಲೂಕಿನಾದ್ಯಂತ ಗಣಿಗಾರಿಕೆ ಹೆಚ್ಚು ಇದ್ದು ಕೃಷಿ ಭೂಮಿ ಕಡಿಮೆ. ಇರುವ ಭೂಮಿಯಲ್ಲಿ ಹೆಚ್ಚಾಗಿ ಈರುಳ್ಳಿ, ಮೆಕ್ಕೆಜೋಳ ಬೆಳೆಯುವ ಈ ಸಂದರ್ಭದಲ್ಲಿ ಹಲವಾರು ಬಾರಿ ಕೈ ಸುಟ್ಟುಕೊಂಡು 8 ಲಕ್ಷ ರೂ. ವೆಚ್ಚದಲ್ಲಿ ಮಹಾರಾಷ್ಟ್ರದಿಂದ ನೂತನ ತಳಿಯಾದ ಥೈಯಲ್ಯಾಂಡ್‌ ರೆಡ್‌ ಲೇಡಿ ಪಪ್ಪಾಯಿಯನ್ನು ಕಳೆದ 1 ವರ್ಷದಿಂದ ಬೆಳೆಸಿದರು. ಈಗ ಬಹು ಫಲವತ್ತಾಗಿಯೇ ಬಂದಿದೆ, 4 ಎಕರೆ 5 ಸೆಂಟ್ಸ್‌ ಜಮೀನಿನಲ್ಲಿ ಹಾಕಿದ್ದು ತಾಲೂಕಿನಲ್ಲಿಯೇ ಅತಿ ಹೆಚ್ಚು ಪಪ್ಪಾಯಿ ಹಾಕಿದ ಇವರು ತೋಟಗಾರಿಕಾ ಇಲಾಖೆಯ ಮಾರ್ಗದರ್ಶನದಲ್ಲಿ ಬೆಳೆದರು.

ಇಂದು ಬಹು ಉತ್ತಮವಾಗಿ ಬಂದಂತಹ ಬೆಳೆಯನ್ನು ಕೊಳ್ಳುವವರೂ ಇಲ್ಲದೆ ವಿಪರೀತ ನಷ್ಟಕ್ಕೆ ಗುರಿಯಾಗುವ ಸ್ಥಿತಿ ಬಂದಿದೆ, ಕಾರಣ ಚಿಲ್ಲರೆ ಮಾರಾಟ ಮಾಡಲು ಪರವಾನಿಗೆ ಬೇಕು, ದೂರದ ನಗರಗಳಿಗೆ ಸಾಗಿಸಲು ವಾಹನಗಳಿಲ್ಲ, ತೋಟದಲ್ಲಿಯೇ ಬಿಟ್ಟರೆ ಹಣ್ಣಾಗಿ ಉದುರುತ್ತಿವೆ ಒಟ್ಟಾರೆಯಾಗಿ 9-10 ಲಕ್ಷ ರೂ. ಮೌಲ್ಯದ ಪಪ್ಪಾಯಿ ನಷ್ಟವಾಗುವ ಸ್ಥಿತಿಗೆ ಬಂದಿದೆ, ತೋಟಗಾರಿಕೆ ಇಲಾಖೆಯವರು ಮಾರಾಟಗಾರರ ಪಟ್ಟಿ ಕೊಟ್ಟಿದ್ದಾರೆ ಅದರೆ ಕೊಳ್ಳುವವರು ಮುಂದೆ ಬರುತ್ತಿಲ್ಲ, ಬಂದರೂ ಬಹು ಕಡಿಮೆ ಬೆಲೆಗೆ ಕೇಳುತ್ತಿದ್ದು ಹಾಕಿದ ಕೂಲಿಯೂ ಆಗುವುದ ಕಷ್ಟವಾಗಿದೆ.

ಸರ್ಕಾರದಿಂದ ಕೈಗೊಳ್ಳುವ ಕ್ರಮಗಳ ಬಗ್ಗೆ ತಕ್ಷಣ ಮಾಹಿತಿ ನೀಡುತ್ತಿದ್ದೇವೆ. ಪಟ್ಟಣದಲ್ಲಿ ಮಾರಲು ಪರವಾನಗಿ ಕೊಡಿಸಲು ವ್ಯವಸ್ಥೆ ಮಾಡುತ್ತಿದ್ದೇವೆ.
ಕುಬೇರ್‌ ಆಚಾರ್‌,
ತೋಟಗಾರಿಕಾ ಇಲಾಖೆಯ ಸಹಾಯಕ ನಿರ್ದೇಶಕ