ಕಳ್ಳರ ವದಂತಿ: ಯುವಕರಿಂದ ಪಹರೆ

Team Udayavani, May 19, 2018, 5:14 PM IST

ಸಿರುಗುಪ್ಪ: ತಾಲೂಕಿನ ಕರೂರು ಗ್ರಾಮದಲ್ಲಿ ಕಳೆದ 10 ದಿನಗಳಿಂದ ಕಳ್ಳರ ಕಾಟ ಹೆಚ್ಚಾಗಿದೆ ಎನ್ನುವ ವದಂತಿಯಿಂದ ಗ್ರಾಮಸ್ಥರೇ ಕೈಯಲ್ಲಿ ಬಡಿಗೆ ಹಿಡಿದು ಹಲಗೆ ಬಾರಿಸುತ್ತಾ ಕಳ್ಳರನ್ನು ಕಾಯುವ ಕೆಲಸ ನಿರ್ಮಾಣವಾಗಿದೆ.

ಸೀಮಾಂಧ್ರ ಪ್ರದೇಶದ ಗಡಿಭಾಗ ಗ್ರಾಮದ ಸಮೀಪವೇ ಇರುವುದರಿಂದ ಕಳ್ಳರು ರಾತ್ರಿವೇಳೆ ಕಳ್ಳತನ ಮಾಡಲು
ಮತ್ತು ಮಕ್ಕಳನ್ನು ಕದ್ದೊಯ್ಯಲು ಬರುತ್ತಾರೆನ್ನುವ ಸುದ್ದಿಯು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಗ್ರಾಮಸ್ಥರು ಆತಂಕಗೊಂಡಿದ್ದಾರೆ. ಹೇಗಾದರೂ ಮಾಡಿ ಕಳ್ಳರನ್ನು ಹಿಡಿಯಬೇಕೆನ್ನುವ ಉದ್ದೇಶದಿಂದ ಗ್ರಾಮದ ನೂರಾರು
ಯುವಕರು ರಾತ್ರಿ 10 ಗಂಟೆಯಿಂದ ಬೆಳಗಿನ ಜಾವ 4 ಗಂಟೆಯವರೆಗೂ ತಮಟೆ ಹೊಡೆಯುತ್ತಾ ಓಣಿ, ಓಣಿಗಳಲ್ಲಿ
ಗಸ್ತು ತಿರುಗುತ್ತಾ ಕಳ್ಳರನ್ನು ಕಾಯುವ ಕೆಲಸ ಮಾಡುತ್ತಿದ್ದಾರೆ.

ತಾಲೂಕಿನ ಉತ್ತನೂರು, ದರೂರು, ಸಿರಿಗೇರಿ ಗ್ರಾಮಗಳಲ್ಲಿ ಕಳೆದ ಮೂರು ದಿನಗಳ ಹಿಂದೆ ಕಳ್ಳರು ಕಾಣಿಸಿಕೊಂಡಿದ್ದು, ಹಿಡಿಯಲು ಹೋದ ಗ್ರಾಮಸ್ಥರ ಕೈಗೆ ಸಿಗದೇ ತಪ್ಪಿಸಿಕೊಂಡಿದ್ದಾರೆ ಎನ್ನುವ ಸುದ್ದಿಯು ಈ ಗ್ರಾಮಸ್ಥರನ್ನು ಕಂಗೆಡಿಸಿದ್ದು, ಕಳ್ಳರನ್ನು ಕಾಯಲು ಪಹರೆ ನಡೆಸುತ್ತಿದ್ದಾರೆ.

ಗ್ರಾಮದಲ್ಲಿ ಭಯಭೀತರಾದ ಜನರಿಗೆ ಎಚ್ಚರಿಕೆ ಕೊಡಲು ರಾತ್ರಿ ಹಲಗೆ ಹೊಡೆಯುತ್ತಾ ಯುವಕರ ತಂಡ ಗಸ್ತು
ತಿರುಗುತ್ತಿದೆ. ಇದರಿಂದ ಜನ ನೆಮ್ಮದಿಯಾಗಿ ನಿದ್ದೆ ಮಾಡಲು ಅನುಕೂಲವಾಗಿದೆ ಎಂದು ಗ್ರಾಮಸ್ಥ ವೀರಾರೆಡ್ಡಿ ತಿಳಿಸಿದ್ದಾರೆ.