ಈಜಲು ತೆರಳಿದ್ದ ಯುವಕ ಸಾವು

Team Udayavani, Mar 17, 2021, 8:30 PM IST

ಕಂಪ್ಲಿ: ಸ್ಥಳೀಯ ಕೋಟೆಯ ತುಂಗಭದ್ರಾ ನದಿಯಲ್ಲಿ ಸ್ನೇಹಿತರ ಜೊತೆಯಲ್ಲಿ ಈಜಲು ತೆರಳಿದ್ದ ಯುವಕನೋರ್ವ ಮಂಗಳವಾರ ಸಾವನ್ನಪ್ಪಿದ ಘಟನೆ ಕೋಟೆ ತುಂಗಭದ್ರಾ ನದಿಯಲ್ಲಿ ಸಂಭವಿಸಿದೆ.

ಪಟ್ಟಣದ ಕಲ್ಗುಡಿ ಓಣಿ ವೀರಶೈವ ಸಮಾಜದ 23 ವರ್ಷದ ಚೇತನ್‌ ಎನ್ನುವ ಯುವಕನೇ ಈಜಲು ತೆರಳಿ ಸಾವನ್ನಪ್ಪಿದ್ದಾನೆ. ಮಧ್ಯಾಹ್ನ ಮನೆಯಲ್ಲಿ ಮಲಗಿದ್ದ ಚೇತನ್‌ನನ್ನು ಆತನ ಸ್ನೇಹಿತರ ನದಿಗೆ ಈಜಲು ಕೋಟೆಯ ಇನ್ನೊಂದು ತೀರ ಅಂದರೆ ಗಂಗಾವತಿ ತಾಲೂಕಿನ ಚಿಕಜಂತಕಲ್‌ ಭಾಗಕ್ಕೆ ಕರೆದುಕೊಂಡು ಹೋಗಿದ್ದಾರೆ. ಈಜುವ ಸಂದರ್ಭದಲ್ಲಿ ನದಿಯಲ್ಲಿ ಮುಳುಗಿರುವ ಯುವಕ ಕಣ್ಮರೆಯಾಗಿದ್ದು, ನಂತರ ಪಟ್ಟಣದ ನೂರಾರು ಯುವಕರು ಚೇತನ ಪತ್ತೆಗಾಗಿ ನದಿಯಲ್ಲಿ ಹುಡುಕಾಡಿದ್ದು ಬಹಳ ಸಮಯದ ನಂತರ ದೇಹ ಪತ್ತೆಯಾಗಿದೆ.

ಚಿಕಿತ್ಸೆಗಾಗಿ ಪಟ್ಟಣದ ಸಮುದಾಯ ಆರೋಗ್ಯ ಕೇಂದ್ರಕ್ಕೆ ಕರೆದುಕೊಂಡು ಬಂದಿದ್ದಾರೆ. ಆದರೆ ನೀರಿನಲ್ಲಿಯೇ ಯುವಕ ಸಾವನ್ನಪ್ಪಿದ್ದಾನೆಂದು ವೈದ್ಯರು ತಿಳಿಸಿದ್ದಾರೆ. ಈ ಬಗ್ಗೆ ಗಂಗಾವತಿ ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಗಂಗಾವತಿ ಗ್ರಾಮೀಣ ಪೊಲೀಸರು ಕಂಪ್ಲಿ ಆಸ್ಪತ್ರೆಗೆ ಭೇಟಿ ನೀಡಿ ತನಿಖೆ ಕೈಗೊಂಡಿದ್ದಾರೆ.