ಬೀದರ್: ಕೋವಿಡ್-19 ಸೋಂಕಿಗೆ ನಾಲ್ಕು ದಿನದಲ್ಲಿ 28 ಜನರು ಸಾವು!

Team Udayavani, Jul 7, 2020, 6:20 PM IST

ಬೀದರ್: ರಾಜ್ಯದಲ್ಲಿ ಕೋವಿಡ್-19 ಸಾವಿನ ಹಾಟ್‌ಸ್ಪಾಟ್ ಆಗಿ ಗುರುತಿಸಿಕೊಳ್ಳುತ್ತಿರುವ ಗಡಿ ಜಿಲ್ಲೆ ಬೀದರನಲ್ಲಿ ಸೋಂಕು ಸತತ ನಾಲ್ಕನೇ ದಿನವೂ ಮರಣ ಮೃದಂಗ ಬಾರಿಸಿದೆ. ಮಂಗಳವಾರ ಮತ್ತೆ ಐವರು ಜನರು ಸೋಂಕಿಗೆ ಬಲಿಯಾಗಿದ್ದು, ಇದರೊಂದಿಗೆ ಮೃತರ ಸಂಖ್ಯೆ 49ಕ್ಕೆ ಏರಿಕೆ ಕಂಡಿದೆ.

ಕೇವಲ ನಾಲ್ಕು ದಿನದಲ್ಲೇ ಹೆಮ್ಮಾರಿಯ ಅಟ್ಟಹಾಸದಿಂದ 28 ಜನರು ಸಾವಿನ ಕದ ತಟ್ಟಿರುವುದು ಜಿಲ್ಲೆಯ ಜನರನ್ನು ಬೆಚ್ಚಿ ಬಿಳಿಸಿದೆ. ಜು. ನಾಲ್ಕರಂದು ಆರು ಜನ, ಐದರಂದು ಒಂಬತ್ತು ಮತ್ತು ಆರನೇ ತಾರೀಕಿನಂದು ಎಂಟು ಮಂದಿ ಸಾವನ್ನಪ್ಪಿದ್ದಾರೆ. ಮೃತರಲ್ಲಿ ಬಹುತೇಕರು ಶುಗರ್, ರಕ್ತದೊತ್ತಡ ಜತೆಗೆ ಕಿಡ್ನಿ ಸಮಸ್ಯೆ ಇರುವ ರೋಗಿಗಳೇ ಆಗಿದ್ದು, ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾರೆ.

65 ವರ್ಷದ ಪುರುಷ, 68 ವರ್ಷದ ಮಹಿಳೆ, 70 ವರ್ಷದ ಪುರುಷ, 70 ವರ್ಷದ ಮಹಿಳೆ ಮತ್ತು 60 ವರ್ಷದ ಪುರುಷ ರೋಗಿಗಳು ಇಂದು ಸಾವನ್ನಪ್ಪಿದ್ದಾರೆ.

ಮತ್ತೆ 51 ಹೊಸ ಪ್ರಕರಣಗಳು: ಜಿಲ್ಲೆಯಲ್ಲಿ 51 ಹೊಸ ಪಾಸಿಟಿವ್ ಕೇಸ್‌ಗಳು ವರದಿಯಾಗಿದ್ದು, ಸೋಂಕಿತರ ಸಂಖ್ಯೆ 850ಕ್ಕೆ ತಲುಪಿದೆ. ಈ ಪೈಕಿ 561 ಮಂದಿ ಡಿಸ್ಚಾರ್ಜ್ ಆಗಿದ್ದರೆ, 240 ಸಕ್ರೀಯ ಪ್ರಕರಣಗಳಿವೆ.