ಮಾಸ್ಕ್ ಧರಿಸಿಯೇ ಸರಳ ವಿವಾಹ

Team Udayavani, Apr 27, 2020, 1:59 PM IST

ಕಲಬುರಗಿ: ಮಾಸ್ಕ್ ಧರಿಸಿ ವಿವಾಹವಾದ ಜೋಡಿ.

ಕಲಬುರಗಿ: ಕೋವಿಡ್ ವೈರಸ್‌ ಹೊಡೆದೊಡಿಸಲು ಮನೆಯಲ್ಲೇ ಇರಿ, ಕಡ್ಡಾಯವಾಗಿ ಮಾಸ್ಕ್ ಧರಿಸಿ ಎನ್ನುವ ಸಂದೇಶಕ್ಕನುಗುಣವಾಗಿ ಬಸವ ಜಯಂತಿಯಂದು ಸರಳವಾಗಿ ಮನೆಯಲ್ಲೇ ಮಾಸ್ಕ್ ಧರಿಸಿ ವಧು-ವರರು ಹಸೆಮಣೆ ಏರಿದ್ದಾರೆ.

ಶಿಕ್ಷಣ ಇಲಾಖೆಯ ಬಿಆರ್‌ಪಿ ಆಗಿರುವ ಲಕ್ಷ್ಮೀಕಾಂತ ಡಿ. ಪಾಟೀಲ್‌ ಹಾಗೂ ಎಂಎಸ್ಸಿ ಪದವಿ ಹೊಂದಿರುವ ಸೌಮ್ಯ ಎನ್ನುವವರೇ ನಗರದ ವಿವೇಕಾನಂದ ನಗರದ ಎನ್‌ಜಿಒ ಕಾಲೋನಿಯಲ್ಲಿನ ಸ್ವಗೃಹದಲ್ಲಿ ತಂದೆ-ತಾಯಿ ಸಮ್ಮುಖದಲ್ಲೇ ಹೊಸ ಜೀವನಕ್ಕೆ ಕಾಲಿಟ್ಟರು. ಕೇವಲ 10 ನಿಮಿಷದಲ್ಲಿ ಸರಳವಾಗಿ ಮದುವೆಯಾದರು.

ಮಾಸ್ಕ್ ಧರಿಸಿಯೇ ಮದುವೆಯ ಎಲ್ಲ ವಿಧಿ-ವಿಧಾನ ನೆರವೇರಿಸಿದರು. ದೇವಾಲಯದಲ್ಲಿ ಮದುವೆ ಕಾರ್ಯಕ್ರಮ ಆಯೋಜಿಸಲು 12 ಜನರು ಪಾಲ್ಗೊಳ್ಳಲು ಅನುಮತಿ ಪಡೆಯಲಾಗಿತ್ತು. ಆದರೆ ಮನೆಯಲ್ಲಿದ್ದುಕೊಂಡೇ ಮದುವೆಯಾಗೋಣ ಎಂದು ಪದವೀಧರರಾಗಿರುವ ವಧು-ವರರು ಮನೆಯಲ್ಲೇ ಮದುವೆಯಾಗುವ ಮೂಲಕ ಸರಳತೆ ನಿರೂಪಿಸಿದರು.

ಮಾಸ್ಕ್ ಧರಿಸಿಯೇ ದಾಂಪತ್ಯ ಜೀವನಕ್ಕೆ ಹೊಸ ಜೋಡಿ ಕಾಲಿಟ್ಟಿರುವುದು ಹಾಗೂ ಈ ನಿಟ್ಟಿನಲ್ಲಿ ಕೊರೊನಾ ಹೊಡೆದೊಡಿಸಲು ಎಲ್ಲರೂ ಕೈ ಜೋಡಿಸೋಣ ಎಂಬ ಸಂದೇಶ ಸಾರಿರುವುದು ಮಾದರಿ ಎಂದೇ ಹೇಳಬಹುದು.