ಮೋದಿ ಅಲೆ: ಸಿಎಂಗೆ ನಡುಕ

Team Udayavani, Feb 26, 2018, 6:20 AM IST

ಬೀದರ: ರಾಜ್ಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಪರ ಜನರ ಜೈಕಾರ ಹೆಚ್ಚುತ್ತಿರುವುದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯಗೆ ನಡುಕ ಹುಟ್ಟಿದೆ.

ಅದಕ್ಕಾಗಿ ಕೇಂದ್ರ ಸರ್ಕಾರದ ಜನಪರ ಯೋಜನೆಗಳನ್ನು ರಾಜ್ಯದಲ್ಲಿ ಕೆಳ ಹಂತದವರೆಗೆ ತಲುಪಿಸುವ ಕಾರ್ಯ ಮಾಡುತ್ತಿಲ್ಲ ಎಂದು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಆರೋಪಿಸಿದರು.

ಹುಮನಾಬಾದನಲ್ಲಿ ಭಾನುವಾರ ನಡೆದ ಕಬ್ಬು ಬೆಳೆಗಾರರೊಂದಿಗಿನ ಸಂವಾದದಲ್ಲಿ ಮಾತನಾಡಿದ ಅವರು, ರಾಜ್ಯ ಸರ್ಕಾರಗಳ ಸಹಾಯವಿಲ್ಲದೇ ಕೇಂದ್ರದ ಕಾರ್ಯಕ್ರಮದ ಲಾಭಗಳನ್ನು ಜನರಿಗೆ ಮುಟ್ಟಿಸಲು ಸಾಧ್ಯವಾಗುವುದಿಲ್ಲ. ಕೇಂದ್ರ ಮತ್ತು ರಾಜ್ಯ ಸರ್ಕಾರದ ನಡುವೆ ಸಂವಹನದ ಕೊರತೆ ಇದೆ. ರೈತರ ಆಶೀ ರ್ವಾದ ಇಲ್ಲದೇ ಸರ್ಕಾರ ರಚನೆ ಅಸಾಧ್ಯ.

2014ರ ನಂತರದ ಎಲ್ಲ ರಾಜ್ಯದ ಚುನಾವಣೆಯಲ್ಲಿ ರೈತರ ಬೆಂಬಲದೊಂದಿಗೆ ಜಯಭೇರಿ ಬಾರಿಸಿದೆ. ಕರ್ನಾಟಕದಲ್ಲೂ ಅನ್ನದಾತರ ಪರ ಕಾಳಜಿಯುಳ್ಳ ಬಿ.ಎಸ್‌.ಯಡಿಯೂರಪ್ಪ ನೇತೃತ್ವದಲ್ಲಿ ಸರ್ಕಾರ ಅಧಿಕಾರಕ್ಕೆ ಬಂದು ಆ ಕೊರತೆಯನ್ನು ನೀಗಿಸಲಿದೆ ಎಂದರು.

ದೇಶದಲ್ಲಿ ಈ ಹಿಂದೆ ರೈತರಿಗೆ ಯೂರಿಯಾ ಕೊರತೆ ಕಾಡುತ್ತಿತ್ತು. ಬಿಜೆಪಿ ಸರ್ಕಾರ ಬಂದ ಮೇಲೆ ಬೇವು ಲೇಪಿತ ಯೂರಿಯಾ ತಯಾರಿಸುತ್ತಿ ರುವುದರಿಂದ ಕೈಗಾರಿಕೆಗಳಿಗೆ ಅಕ್ರಮವಾಗಿ ಹೋಗುವುದು ತಪ್ಪುತ್ತಿದ್ದು,ಇದರಿಂದ ರೈತರಿಗೆ ಸಮಯಕ್ಕೆ 
ಲಭ್ಯವಾಗುತ್ತಿದೆ. ಕೇಂದ್ರದ ನರೇಂದ್ರ ಮೋದಿ ಸರ್ಕಾರ ಅನ್ನದಾತರಿಗೆ ಹಿತ ಆಗುವಂಥ ನೀತಿ ಮತ್ತು ಯೋಜನೆಗಳನ್ನು ಜಾರಿಗೆ ತರುತ್ತಿದೆ ಎಂದರು.

ಬಿಜೆಪಿ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಸಂತೋಷ, ಸಂಸದ ಭಗವಂತ ಖೂಬಾ, ಶಾಸಕರಾದ ಪ್ರಭುಚವ್ಹಾಣ, ರಘುನಾಥ ಮಲ್ಕಾಪುರೆ, ಇನ್ನಿತರರು ವೇದಿಕೆಯಲ್ಲಿದ್ದರು.

ಕಾಟಾಚಾರಕ್ಕಾಗಿ ನಡೆದ  ಸಂವಾದ?: ಹುಮನಾಬಾದನಲ್ಲಿ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಕಬ್ಬು ಬೆಳೆಗಾರರೊಂದಿಗೆ ನಡೆಸಿದ ಸಂವಾದ ಕಾರ್ಯಕ್ರಮ ಕಾಟಾಚಾರಕ್ಕೆ ಎಂಬಂತಿತ್ತು. ಕೇವಲ ನಾಲ್ಕೆçದು ರೈತರ ಪ್ರಶ್ನೆಗಳನ್ನು ಮಾತ್ರ ಆಲಿಸಿ, ಉತ್ತರಿಸಿರುವುದು ರೈತರನ್ನು ಕೆರಳಿಸಿತು. ಸಾಕಷ್ಟು ರೈತರು ತಮ್ಮ ಅಳಲನ್ನು ಹೇಳಿಕೊಳ್ಳಲು ಆಗಮಿಸಿದ್ದರಾದರೂ ಶಾ ಆಲಿಸಲಿಲ್ಲ.

ಶಾಗೆ ಸಿಗದ ಅಮ್ಮನ ದರ್ಶನ ಭಾಗ್ಯ
ಗುರುಮಠಕಲ್‌: ಅಮಿತ್‌ ಶಾ ಯಾನಾಗುಂದಿಗೆ ಭೇಟಿ ನೀಡಿ 35 ನಿಮಿಷ ಮಾತಾ ಮಾಣಿಕೇಶ್ವರಿ ದರ್ಶನಕ್ಕಾಗಿ ಕಾಯ್ದು ಕುಳಿತರೂ ದರ್ಶನ ಭಾಗ್ಯ ಪಡೆಯದೆ ಹಿಂತಿರುಗಿದರು. ಭಾನುವಾರ ಯಾನಾಗುಂದಿಯಲ್ಲಿ ಅಮ್ಮನವರ ದರ್ಶನ ಹಾಗೂ ಮುಖಂಡರೊಂದಿಗೆ ಸಮಾಲೋಚನೆ ಸಭೆಗೆ ಅಗಮಿಸಿದ್ದ ಶಾ ಅವರು ಮಾತಾ ಮಾಣಿಕೇಶ್ವರಿ ದರ್ಶನ ಪಡೆಯಲು ಗೇಟ್‌ ಹತ್ತಿರ ನಿಂತರೂ ಬಾಗಿಲು ತೆರೆಯಲಿಲ್ಲ.

ಮಾತಾಜಿ ದರ್ಶನಕ್ಕಾಗಿ ಮಧ್ಯಾಹ್ನ 3.15ಕ್ಕೆ ನಿಗದಿಯಾಗಿತ್ತು ಆದರೆ ಸುರಪುರದಲ್ಲಿ ಕಾರ್ಯಕ್ರಮ ಮುಗಿಸಿಕೊಂಡು 5 ಗಂಟೆಗೆ ಯಾನಾಗುಂದಿಗೆ ಆಗಮಿಸಿದರು.ಮಾತಾಜಿ ಅವರು ದರ್ಶನಕ್ಕೆ ನೀಡಿದ ಅವಧಿ ಮುಗಿದು ತಡವಾಗಿ ಆಗಮಿಸಿದ ಪರಿಣಾಮ ದರ್ಶನದ ಭಾಗ್ಯ ತಪ್ಪಿತು ಎನ್ನಲಾಗಿದೆ.