ಹೊಸ ಚಿಂತನೆಗಳಿಂದ ಕ್ಯಾಂಪಸ್‌ಗಳ ಬೆಳವಣಿಗೆ

Team Udayavani, Dec 9, 2021, 2:25 PM IST

ಬಸವಕಲ್ಯಾಣ: ಹೊಸ ಚಿಂತನೆ ಸಂಶೋಧನಾತ್ಮಕ ಆಲೋಚನೆ ಮತ್ತು ಆವಿಷ್ಕಾರಗಳಿಂದ ವಿದ್ಯಾಸಂಸ್ಥೆಯ ಕ್ಯಾಂಪಸ್‌ ಗಳು ಬೆಳವಣಿಗೆಯಾಗುತ್ತವೆ. ಸಾಂಸ್ಕೃತಿಕ ಸಿದ್ಧಾಂತಗಳ ಅರಿವು ವಿದ್ಯಾರ್ಥಿಗಳ ಲವಲವಿಕೆ ಮತ್ತು ಉತ್ಸಾಹಕ್ಕೆ ಕಾರಣವಾಗಿದೆ ಎಂದು ಅಕ್ಕಮಹಾದೇವಿ ಕಾಲೇಜು ಉಪನ್ಯಾಸಕ ಡಾ| ಭೀಮಾಶಂಕರ ಬಿರಾದಾರ ಹೇಳಿದರು.

ನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಪದವಿ ವಿದ್ಯಾರ್ಥಿಗಳ ಬೀಳ್ಕೊಡುವ ಸಮಾರಂಭದಲ್ಲಿ ಮಾತನಾಡಿದ ಅವರು ಬದುಕು, ಸಮಾಜ ಮತ್ತು ನಿಸರ್ಗದೊಂದಿಗೆ ನಮ್ಮ ಸಂಬಂಧ ಬೆಳೆಸದಿದ್ದರೆ ಮನುಷ್ಯನಲ್ಲಿ ಅನಾಥ ಪ್ರಜ್ಞೆ ಕಾಡುತ್ತದೆ. ನೆಲ ನೀರು ನಿಸರ್ಗದ ಜತೆಗೆ ಆಪ್ತತೆ ಹೊಂದಿಸುವ ಕಲಿಕೆಯ ನಡೆಯಬೇಕು ಕೇವಲ ಆಧುನೀಕರಣ, ನವೀಕರಣಗಳು ಬದುಕಿನಲ್ಲಿ ಶುಷ್ಕತೆ ರೂಪಿಸುತ್ತಿವೆ. ನಮ್ಮ ಓದಿಗೆ ತಾತ್ವಿಕ ಹುಡುಕಾಟವಿದ್ದರೆ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ಸತ್ಯಗಳು ಧಕ್ಕುತ್ತವೆ. ತಾತ್ವಿಕ ಅಧ್ಯಯನದಿಂದ ಅರಿವಿನ ವಿಸ್ತಾರವಾಗುತ್ತದೆ. ಬಹುಶಿಸ್ತಿಯ ಮತ್ತು ಬಹು ಬಹುಸಂಸ್ಕೃತಿಕ ಅಧ್ಯಯನದಿಂದ ಜ್ಞಾನ ವಿಸ್ತರಿಸುತ್ತವೆ ಎಂದರು.

ನಿವೃತ್ತ ಪ್ರಾಚಾರ್ಯ ಪ್ರೊ| ನಾಗೇಂದ್ರ ಢೋಲೆ ಮಾತನಾಡಿ, ತಾಯಿಯೇ ಮೊದಲು ಗುರು, ಅವಳು ಕೊಡುವ ಜ್ಞಾನ ಯಾವಗುರುವಿನ ಜ್ಞಾನಕ್ಕೂ ಸಾಟಿ ಇಲ್ಲ. ದೇಶ ಕಟ್ಟಲು, ಸೇವೆ ಮಾಡಲು ನೆಲದ ನಂಟು ಗಟ್ಟಿಯಾಗಿಸಲು ತಾಯಿ ನುಡಿಯಿಂದ ಸಾಧ್ಯ ಎಂದರು.

ಕಾಲೇಜಿನ ಹಳೆ ವಿದ್ಯಾರ್ಥಿ ಸಂಘದ ಸದಸ್ಯ ಲೋಕೇಶ ಮೋಳಕೇರೆ ಮಾತನಾಡಿದರು. ಪ್ರಾಚಾರ್ಯ ಡಾ| ಬಲರಾಮ ಹುಡೆ ಅಧ್ಯಕ್ಷತೆ ವಹಿಸಿದ್ದರು. ಚಿತ್ರಶೇಖರ ಚಿರಳ್ಳಿ, ಶೈಲಜಾ ಬಿರಾದಾರ, ಪುಷ್ಪಾ ಕೋರೆ, ಮೀನಾಕ್ಷಿ ಬಿರಾದಾರ, ಸುನಂದಾ ತಾಯಪ್ಪ, ಡಾ| ಚಂದ್ರಕಾಂತ ಗಾಯಕವಾಡ, ವೀರಶೆಟ್ಟಿ ಚಿಟ್ಟಗುಪ್ಪಾ, ದೀಪಕಗೌಡ, ಬಸವರಾಜ ಬಿರಾದಾರ, ಶರಣಪ್ಪ ಜನ್ನಾ ಇದ್ದರು.‌