ದೇಶದ ಆಹಾರ ಸಮಸ್ಯೆ ನೀಗಿಸಲಿದೆ ಮೀನು: ವಿಜಯಕುಮಾರ

Team Udayavani, Aug 25, 2018, 11:30 AM IST

ವಿಜಯಪುರ: ದೇಶದಲ್ಲಿ ಹೆಚ್ಚುತ್ತಿರುವ ಜನಸಂಖ್ಯೆ, ಮತ್ತೂಂದೆಡೆ ಕೃಷಿ ಭೂಮಿ, ಕೃಷಿಯೇತರ ಚಟುವಟಿಕೆಗೆ ಬಳಕೆ ಕಾರಣ ಭಾರತದಲ್ಲಿ ಉಂಟಾಗಬಹುದಾದ ಆಹಾರ ಸಮಸ್ಯೆ ನೀಗಿಸುವಲ್ಲಿ ಮೀನು ಉತ್ಪಾದನೆ ಪ್ರಮುಖ ಪಾತ್ರ ವಹಿಸಲಿದೆ ಎಂದು ಭೂತನಾಳದ ಮೀನುಗಾರಿಕೆ ಸಂಶೋಧನೆ ಹಾಗೂ ಮಾಹಿತಿ ಕೇಂದ್ರದ ಮುಖ್ಯಸ್ಥ ಡಾ| ಎಸ್‌. ವಿಜಯಕುಮಾರ ಅಭಿಪ್ರಾಯಪಟ್ಟರು.

ಕರ್ನಾಟಕ ಪಶು ಸಂಗೋಪನಾ ಹಾಗೂ ಪಶುಪಾಲನಾ, ಮೀನುಗಾರಿಕೆ ವಿಶ್ವವಿದ್ಯಾಲಯದ ಭೂತನಾಳ ಮೀನುಗಾರಿಕೆ ಸಂಶೋಧನೆ ಹಾಗೂ ಮಾಹಿತಿ ಕೇಂದ್ರದಲ್ಲಿ ಕೇಂದ್ರ ಸರ್ಕಾರದ ಕೌಶಲ್ಯಾಭಿವೃದ್ಧಿ ತರಬೇತಿ ಹಾಗೂ ಮೀನುಗಾರಿಕೆ ಇಲಾಖೆ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ಕೊಳಗಳಲ್ಲಿ ತೀವ್ರ ಸಾಂದ್ರತೆಯ ಮೀನು ಕೃಷಿ ತರಬೇತಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ದೇಶ ಸ್ವಾತಂತ್ರ್ಯಾ ಪಡೆಯುವ ಸಂದರ್ಭದಲ್ಲಿ ಭಾರತದಲ್ಲಿದ್ದ 30 ಕೋಟಿ ಜನಸಂಖ್ಯೆ ಇದೀಗ ಶತ ಕೋಟಿ ಮೀರಿದೆ. ಆದರೆ ಭಾರತದ ಕೃಷಿ ಭೂಮಿ ಮಾತ್ರ ಕೃಷಿಯೇತರ ಚಟುವಟಿಕೆಗಳಿಂದಾಗಿ ಆಹಾರ ಉತ್ಪಾದನೆ ಕೊರತೆ ಆಗಲಿದೆ. ಹೀಗಾಗಿ ಭಾರತೀಯ ಜನಸಂಖ್ಯೆಯ ಆಹಾರ ಬೇಡಿಕೆಯಲ್ಲಿ ಪೌಷ್ಟಿಕ ಆಹಾರ ಒದಗಿಸಿ, ಆಹಾರ ಸಮಸ್ಯೆ ನೀಗುವಲ್ಲಿ ಮೀನು ಪಾತ್ರ ಮಹತ್ವದ್ದಾಗಿದೆ ಎಂದು ವಿಶ್ಲೇಷಿಸಿದರು.
 
ಒಂದು ಎಕರೆ ಕೊಳದಲ್ಲಿ ಉತ್ಪಾದಿಸುವ ಮೀನನ್ನು ವಿಯಟ್ನಾಂ ಎಂಬ ಪುಟ್ಟ ದೇಶದಲ್ಲಿ ಇದರ 15 ಪಟ್ಟು ಮೀನು ಉತ್ಪಾದಿಸಲಾಗುತ್ತಿದೆ. ಸಿಂಗಲೂರ ಎಂಬ ಪುಟ್ಟ ದ್ವೀಪರಾಷ್ಟ್ರ ಕೇವಲ ಅಲಂಕಾರಿಕ ಮೀನುಗಾರಿಕೆಯಿಂದಲೇ ವಾರ್ಷಿಕ 120 ಕೋಟಿ ರೂ. ಲಾಭ ಗಳಿಸುತ್ತಿದೆ ಎಂದರೆ ಆ ದೇಶದ ಮೀನಿನ ಇತರೆ ಉತ್ಪನ್ನಗಳ ಕುರಿತು ಅಂದಾಜಾಗುತ್ತದೆ ಎಂದರು.

ವಾತಾವರಣ, ನೀರಿನ ಗುಣಮಟ್ಟ, ಪರಿಸರ, ಪರಿಸ್ಥಿತಿ, ನಿರ್ವಹಣಾ ಕ್ರಮಗಳು ಭಾರತೀಯ ಮೀನು ಉತ್ಪಾದನೆಯಲ್ಲಿ ಪ್ರಮುಖ ಕಾರಣವಾಗಿದ್ದರೂ, ಆಧುನಿಕ ತಾಂತ್ರಿಕತೆಯ ವೈಜ್ಞಾನಿಕ ಕ್ರಮ ಇಲ್ಲಿ ಪ್ರಮುಖವಾಗಿದೆ. ರೈತರು ತಮ್ಮ ಜಮೀನಿನಲ್ಲಿ ಇರುವ ಕೃಷಿ ಹೊಂಡ, ನೀರಿನ ಕೊಳಗಳಲ್ಲೂ ಮೀನುಗಾರಿಕೆ ಮಾಡಿ ಹೆಚ್ಚಿನ ಶ್ರಮ ಹಾಗೂ ವೆಚ್ಚ ಇಲ್ಲದೇ ಕೃಷಿ ಪೂರಕ ಆದಾಯ ಗಳಿಸಲು ನೆರವಾಗಲಿದೆ.

ಭಾರತೀಯ ಪರಿಸರದಲ್ಲಿ ಅನುಪುಯುಕ್ತ ಎಂದು ಕರೆಸಿಕೊಳ್ಳುವ ಬಂಜರು ಭೂಮಿ ಮೀನುಗಾರಿಕೆ ಮಾಡಲು ಯೋಗ್ಯ ಪರಿಸರವಾಗಿದೆ. ಇದಕ್ಕಾಗಿ ರೈತರು ಆಧುನಿಕ ಸುಧಾರಿತ ವೈಜ್ಞಾನಿಕ ಕ್ರಮಗಳ ಕುರಿತು ಮಾಹಿತಿ ಪಡೆದು ಲಾಭದಾಯಕವಾಗಿರುವ ಮೀನುಗಾರಿಕೆಯಲ್ಲಿ ತೊಡಗಿಕೊಳ್ಳಿ ಎಂದು ಸಲಹೆ ನೀಡಿದರು.
 
ಗಲಕೋಟೆ ಕೃಷಿ ವಿಜ್ಞಾನ ಕೇಂದ್ರದ ಪಶುವಿಭಾಗದ ಡಾ| ಮಹೇಶ ಕಟಕೆ ತರಬೇತಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಮೀನುಗಾರಿಕೆ ತರಬೇತಿ ಕೇಂದ್ರದ ಸಹಾಯಕ ಪ್ರಾಧ್ಯಾಪಕ ಡಾ| ವಿಜಯ ಅತನೂರು, ಜಿ.ಎಸ್‌. ಕಮತರ ವೇದಿಕೆಯಲ್ಲಿದ್ದರು. ಇದೇ ವೇಳೆ ವಿಜಯಪುರ-ಬಾಗಲಕೋಟೆ ರೈತರಿಗೆ ಮೀನು ಮರಿಗಳನ್ನು ವಿತರಿಸಲಾಯಿತು.