ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ವೈದ್ಯ ಡಾ| ಪದಕಿ ನಿಧನ

Team Udayavani, Aug 4, 2018, 12:31 PM IST

ಮುದ್ದೇಬಿಹಾಳ: ಪಟ್ಟಣದಲ್ಲಿ ವೈದ್ಯ ನಾರಾಯಣ ಎಂದೇ ಖ್ಯಾತಿ ಪಡೆದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತರಾದ ಡಾ| ಆರ್‌.ಆರ್‌. ಪದಕಿ (94) ಶುಕ್ರವಾರ ನಿಧನರಾದರು. ವೈದ್ಯಕೀಯ ಕ್ಷೇತ್ರದಲ್ಲಿ ಬಡ ರೋಗಿಗಳಿಗೆ ಒಂದು ರೂಪಾಯಿ ಹಣ ಪಡೆಯದೇ ಉಚಿತವಾಗಿ ಚಿಕಿತ್ಸೆ ನೀಡುತ್ತಿದ್ದ ಇವರು ಮುದ್ದೇಬಿಹಾಳ ತಾಲೂಕು ಮಾತ್ರವಲ್ಲದೇ ಜಿಲ್ಲಾದ್ಯಂತ ಪ್ರಸಿದ್ಧಿ ಪಡೆದಿದ್ದರು.

ಎಂಬಿಬಿಎಸ್‌ ಪದವೀಧರರಾಗಿದ್ದ ಡಾ| ಪದಕಿ ಅವರು ಸರಕಾರಿ ಕೆಲಸಕ್ಕೆ ಆಸೆ ಪಡೆದೆ ಖಾಸಗಿಯಲ್ಲಿಯೇ ರೋಗಿಗಳಿಗೆ ಉಚಿತ ತಪಾಸಣೆ ಮಾಡುತ್ತಿದ್ದರು. ಮೃತರರಿಗೆ ಇಬ್ಬರು ಪುತ್ರರು, ಇಬ್ಬರು ಪುತ್ರಿಯರು ಹಾಗೂ ಪತ್ನಿ ಇದ್ದು ಓರ್ವ ಮಗ ವಾಹನ ಅಪಘಾತದಲ್ಲಿ ನಿಧನರಾಗಿದ್ದರು. ತಮ್ಮ 90 ವಯಸ್ಸಿನವರೆಗೂ ಆರೋಗ್ಯವಂತರಾಗಿದ್ದು ಅವರು
ಮಗನ ಅಪಘಾತದಿಂದ ಆರೋಗ್ಯದಲ್ಲಿ ಏರುಪೇರು ಮಾಡಿಕೊಂಡಿದ್ದರು. ಅಲ್ಲದೇ ಇತ್ತಿಚಿಗೆ ಮನೆಯಲ್ಲಿ ಕಾಲು ಜಾರಿ ಬಿದ್ದ ಕಾರಣ ಕಾಲಿಗೆ ಪೆಟ್ಟಾಗಿ ಹಾಸಿಗೆ ಹಿಡಿದಿದ್ದರು.
 
ಬಂದ್‌ ಮೂಲಕ ಸಂತಾಪ: ಡಾ| ಪದಕಿ ಅವರ ನಿಧನದ ಹಿನ್ನೆಲೆ ಪಟ್ಟಣದ ಬಟ್ಟೆ, ಕಿರಾಣಿ, ಹೊಟೇಲ, ಸೇರಿದಂತೆ ಸಣ್ಣಪುಟ್ಟ ವ್ಯಾಪಾರಸ್ಥರು ತಮ್ಮ ಅಂಗಡಿಗಳನ್ನು ಬಂದ್‌ ಮಾಡಿ ಸಂತಾಪವನ್ನು ಸೂಚಿಸಿದರು. ಮೊದಲಿಗೆ ಸ್ಥಳೀಯ ಎಲ್ಲ ಖಾಸಗಿ ಆಸ್ಪತ್ರೆಯ ವೈದ್ಯರು ತಮ್ಮ ಆಸ್ಪತ್ರೆ ಕಾರ್ಯ ಸ್ಥಗಿತಗೊಳಿಸಿ ಸಂತಾಪ ಸೂಚಿಸಿದರು. 

ಅಂತಿಮ ದರ್ಶನಕ್ಕೆ ಆಗಮಿಸಿದ ಅಭಿಮಾನಿಗಳು: ಡಾ| ಪದಕಿ ನಿಧರಾಗಿದ್ದಾರೆ ಎಂಬ ವಿಷಯ ತಿಳಿಯುತ್ತಿದ್ದಂತೆ
ಬೆಳಿಗ್ಗೆಯಿಂದಲೇ ಅವರ ದರ್ಶನಕ್ಕೆ ಅಪಾರ ಪ್ರಮಾಣದಲ್ಲಿ ಅಭಿಮಾನಿಗಳು ಆಗಮಿಸಿದ್ದರು. ಕೇವಲ ಮುದ್ದೇಬಿಹಾಳ ಪಟ್ಟಣದವಲ್ಲದೇ ತಾಲೂಕಿನ ಗ್ರಾಮೀಣ ಪ್ರದೇಶಗಳಿಂದಲೂ ಡಾ| ಪದಕಿ ಅವರ ಅಂತಿಮ ದರ್ಶನಕ್ಕೆ ಆಗಮಿಸಿ ಸಂತಾಪವನ್ನು ಸೂಚಿಸಿದರು.

ಶಾಲಾ ಕಾಲೇಜಿಗೆ ರಜೆ: ಪದಕಿ ಅವರ ನಿಧನ ಹಿನ್ನೆಲೆ ಮುದ್ದೇಬಿಹಾಳ ತಾಲೂಕಿನ ಗ್ರಾಮೀಣ ಪ್ರದೇಶ ಶಾಲೆಗಳನ್ನು ಬಿಟ್ಟು ಎಲ್ಲ ಪಟ್ಟಣದ ಖಾಸಗಿ ಶಾಲೆಗಳಿಗೆ ರಜೆ ಘೋಷಣೆ ಮಾಡಲಾಗಿತ್ತು. ಸರಕಾರಿ ಶಾಲಾ ಕಾಲೇಜುಗಳಲ್ಲಿ ಶೋಕಾಚರಣೆ ಮಾಡಿ ಎಂದಿನಂತೆ ಕಲಿಕೆಯನ್ನು ಮುಂದುವರಿಸಿದರು. 

ಗಣ್ಯರ ಆಗಮನ: ಡಾ| ಪದಕಿ ಅವರ ನಿಧನ ಹಿನ್ನೆಲೆಯಲ್ಲಿ ಸ್ಥಳೀಯ ಶಾಸಕ ಎ.ಎಸ್‌. ಪಾಟೀಲ ನಡಹಳ್ಳಿ, ಜಿಪಂ ಉಪಾಧ್ಯಕ್ಷ ಪ್ರಭುಗೌಡ ದೇಸಾಯಿ (ಮಡಿಕೇಶ್ವರ), ಹೇಮರಡ್ಡಿ ಮಲ್ಲಮ್ಮ ಸಂಸ್ಥೆ ಅಧ್ಯಕ್ಷ ಎಸ್‌.ಜಿ. ಪಾಟೀಲ (ಶೃಂಗಾರಗೌಡ), ಪುರಸಭೆ ಅಧ್ಯಕ್ಷ ಬಸನಗೌಡ ಪಾಟೀಲ, ಬಿಜೆಪಿ ಜಿಲ್ಲಾ ಪ್ರಧಾನಕಾರ್ಯದರ್ಶಿ ಆರ್‌.ಎಸ್‌. ಪಾಟೀಲ ಕೂಚಬಾಳ, ಕಸಾಪ ಅಧ್ಯಕ್ಷ ಮಹಾಂತಪ್ಪ ನಾವದಗಿ, ಎಂಜಿವಿಸಿ ಕಾಲೇಜ್‌ ಚೇರ್‌ ಮನ್‌ ಅಶೋಕ ತಡಸದ, ಎಪಿಎಂಸಿ ಅಧ್ಯಕ್ಷ ಗುರುಣ್ಣ ತಾರನಾಳ, ಕಾರ್ಯನಿತರ ಪತ್ರಕರ್ತ ಸಂಘದ ಜಿಲ್ಲಾ ಉಪಾಧ್ಯಕ್ಷ ಡಿ.ಬಿ. ವಡವಡಗಿ, ಆರ್‌.ಎಂ.ಕೆ. ಟ್ರಸ್ಟ್‌ ಅಧ್ಯಕ್ಷ ಚೇತನ ಕೆಂದೂಳಿ, ಆಯುಷ್‌ ಫೇಡರೇಶನ್‌ ಆಫ್‌ ಇಂಡಿಯಾ ಅಧ್ಯಕ್ಷ ಡಾ.ವಿಜಯ ನಾಯಕ, ಔಷದ ಅಂಗಡಿ ವ್ಯಾಪಾರಸ್ಥರ ಸಂಘದ ಜಿಲ್ಲಾಧ್ಯಕ್ಷ ಕೆ.ಆರ್‌.ಎತ್ತಿನಮನಿ(ದಾದಾ), ದಲಿತ ಮುಖಂಡ ಡಿ.ಬಿ.ಮುದೂರ, ಸಿ.ಜಿ.ವಿಜಯಕರ್‌, ಶರಣಬಸ್ಸು ಚಲವಾದಿ, ಹರೀಶ ನಾಟಿಕರ್‌, ವಾಯ್‌.ಎಚ್‌. ವಿಜಯಕರ ಸೇರಿದಂತೆ ಎಲ್ಲ ಸ್ಥಳೀಯ ಸಂಘ ಸಂಸ್ಥೆಯ ಪದಾಧಿಕಾರಿಗಳು ಅಂತಿಮ ದರ್ಶನಕ್ಕೆ ಆಗಮಿಸಿದ್ದರು.