ಮಾನಸಿಕ ಅಸ್ವಸ್ಥನಿಂದ ತಾಯಿಯ ಹತ್ಯೆ ; ಕುಟುಂಬ ಸದಸ್ಯರ ಮೇಲೂ ಹಲ್ಲೆ

Team Udayavani, Jun 25, 2020, 10:44 PM IST

ಘಟನೆಯ ಬಳಿಕ ಆರೋಪಿಯನ್ನು ಸ್ಥಳೀಯರ ನೆರವಿನಿಂದ ಹಗ್ಗಗಳಿಂದ ಬಂಧಿಸಿರುವ ಕುಟುಂಬಸ್ಥರು.

ವಿಜಯಪುರ: ಜಿಲ್ಲೆಯ ಇಂಡಿ ತಾಲೂಕಿನ ಹಿರೇಬೇವನೂರ ಗ್ರಾಮದಲ್ಲಿ ಮಾನಸಿಕ ಅಸ್ವಸ್ಥನೊಬ್ಬ ತನ್ನ ಹೆತ್ತ ತಾಯಿಯನ್ನೇ ಹತ್ಯೆ ಮಾಡಿರುವ ದಾರುಣ ಘಟನೆ ವರದಿಯಾಗಿದೆ.

ಹೀಗೆ ತನ್ನ ತಾಯಿಯನ್ನೇ ಅಮಾನುಷವಾಗಿ ಹತ್ಯೆ ಮಾಡಿರುವ ಆರೋಪಿಯನ್ನು ರಫೀಕ್ ಮೋಮಿನ್ (30) ಎಂದು ಗುರುತಿಸಲಾಗಿದ್ದು, ಹತ್ಯೆಯಾದ ತಾಯಿಯನ್ನು 49 ವರ್ಷದ ಬಾನು ಮೊಮಿನ್ ಎಂದು ಗುರುತಿಸಲಾಗಿದೆ.

ಹಾರೆಯಿಂದ ತಲೆಗೆ ಹೊಡೆದು ತಾಯಿಯ ಕೊಲೆಗೈದ ಮಗ
ರಫೀಕ್ ತನ್ನ ತಾಯಿಯನ್ನು ಹತ್ಯೆ ಮಾಡುವುದಕ್ಕೂ ಮೊದಲು ತನ್ನದೇ ಕುಟುಂಬ ಸದಸ್ಯರ ಮೇಲೆ ಹಲ್ಲೆ ನಡೆಸಿದ್ದ. ಪತಿಯ ಕಿರುಕುಳವನ್ನು ತಾಳಲಾದೆ ಈತನ ಪತ್ನಿ ಗುರುವಾರ ಬೆಳಿಗ್ಗೆಯಷ್ಟೇ ತವರಿಗೆ ಮರಳಿದ್ದಳು.

ಇಂದು ಮದ್ಯಾಹ್ನ ರಫೀಕ್ ತನ್ನ ತಂದೆಯ ಮೇಲೆ ಹಲ್ಲೆ ಮಾಡಿದ್ದ, ಬಳಿಕ ಸಾಯಂಕಾಲ ಅಜ್ಜಿ ಮೇಲೂ‌ ಹಲ್ಲೆಗೆ ಮುಂದಾಗಿದ್ದ. ಈ ಸಂದರ್ಭದಲ್ಲಿ ಅಜ್ಜಿಯ ಮೇಲೆ ಈತ ಹಲ್ಲೆ ಮಾಡುವುದನ್ನು ತಡೆಯಲು ಮುಂದಾದ ಸಂದರ್ಭದಲ್ಲಿ ಆರೋಪಿ ತಾಯಿಯ ಮೇಲೆಯೇ ಹಲ್ಲೆ ನಡೆಸಿ, ಹತ್ಯೆ ಮಾಡಿದ್ದಾನೆ ಎಂದು ತಿಳಿದುಬಂದಿದೆ.

ಈ ಘಟನೆ ಬಳಿಕ ಮಾನಸಿಕ ಅಸ್ವಸ್ಥ ರಫೀಕ್ ನನ್ನು ಸ್ಥಳೀಯರ ಸಹಾಯದಿಂದ ಕುಟುಂಬ ಸದಸ್ಯರು ಕಟ್ಟಿ ಹಾಕಿ ಥಳಿಸಿದ್ದರು. ಸುದ್ದಿ ತಿಳಿದು ಸ್ಥಳಕ್ಕೆ ಆಗಮಿಸಿದ ಇಂಡಿ‌ ಗ್ರಾಮೀಣ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದು ಸರ್ಕಾರಿ ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ.