ಪೊಲೀಸ್‌ ಸೇವೆ ಸ್ಮರಣಾರ್ಹ: ಜೋಶಿ

Team Udayavani, Oct 22, 2018, 12:28 PM IST

ವಿಜಯಪುರ: ಸಮಾಜದ ನೆಮ್ಮದಿ ಹಾಗೂ ಶಾಂತಿಯುತ ಬದುಕಿಗೆ ಹಗಲಿರುಳು ಶ್ರಮಿಸುತ್ತಿರುವ ಪೊಲೀಸರ್‌ ಸೇವೆ ಅನನ್ಯ ಹಾಗೂ ಸ್ಮರಣಾರ್ಹ. ಹೀಗಾಗಿ ಸಮಾಜದ ರಕ್ಷಣೆಗೆ ಪೊಲೀಸ್‌ ಇಲಾಖೆ ಇನ್ನೂ ಬಲಗೊಳ್ಳುವ ಅಗತ್ಯವಿದೆ ಎಂದು ಎರಡನೇಯ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಶ
ವೆಂಕಟೇಶ ಜೋಶಿ ಹೇಳಿದರು.

ರವಿವಾರ ಜಿಲ್ಲಾ ಪೊಲೀಸ್‌ ಇಲಾಖೆಯಿಂದ ನಗರದ ಜಿಲ್ಲಾ ಪೊಲೀಸ್‌ ಪರೇಡ್‌ ಮೈದಾನದಲ್ಲಿ ಹಮ್ಮಿಕೊಂಡಿದ್ದ ಪೊಲೀಸ್‌ ಹುತಾತ್ಮ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಸಮಾಜದ ಸ್ವಾಸ್ಥ್ಯ ಕಾಪಾಡುವಲ್ಲಿ ಪೊಲೀಸ್‌ ಸೇವೆ ಮಹತ್ವದ್ದಾಗಿದೆ. ಸಮಾಜದಲ್ಲಿ ನಡೆಯುತ್ತಿರುವು ಅನ್ಯಾಯ ಸರಿಪಡಿಸಿ ಒಳ್ಳೆ ದಾರಿಗೆ ತರುವಲ್ಲಿ ಪೊಲೀಸ್‌ ಪಾತ್ರ ಮಹತ್ವದ್ದಾಗಿದೆ ಎಂದರು.

ಪೊಲೀಸರು ತಮ್ಮ ಮನೆ, ಮಠ, ತಂದೆ-ತಾಯಿ, ಹೆಂಡತಿ, ಮಕ್ಕಳು ಹಾಗೂ ವೈಯಕ್ತಿಕ ಬದುಕನ್ನು ಬದಿಗೊತ್ತಿ ಸಮಾಜದಲ್ಲಿ ಕಾನೂನು ಹಾಗೂ ಸುವ್ಯವಸ್ಥೆ ಕಾಪಾಡಲು ದುಡಿಯುತ್ತಾರೆ. ನಿಜಕ್ಕೂ ಅವರ ಸೇವೆ ಅಭಿನಂದನಾರ್ಹ. ಸಮಾಜದ ಸ್ವಾಸ್ಥ್ಯಕ್ಕಾಗಿ ಅನೇಕ ಆರಕ್ಷಕರು ತಮ್ಮ ಪ್ರಾಣ ಅರ್ಪಿಸಿದ್ದಾರೆ.

ಸಮಾಜ ಘಾತುಕ ಶಕ್ತಿಗಳ ವಿರುದ್ಧ ಹೋರಾಡುವ ಸಂದರ್ಭದಲ್ಲಿ ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟಿದ್ದಾರೆ, ಅವರೆಲ್ಲರ ತ್ಯಾಗ, ಬಲಿದಾನವನ್ನು ನಾವು ನಿತ್ಯ ಸ್ಮರಣೆ ಮಾಡಬೇಕಾದ ಅವಶ್ಯಕತೆ ಇದೆ ಎಂದರು.

ಪೊಲೀಸರ ತ್ಯಾಗ ಪರಿಶ್ರಮವನ್ನು ಜನಸಾಮಾನ್ಯರಿಗೆ ತಲುಪಿಸಲು ತಾಲೂಕು ಮಟ್ಟದಲ್ಲಿ ಪೊಲೀಸ್‌ ಹುತಾತ್ಮರ ದಿನಾಚರಣೆ ನಡೆಸಬೇಕು. ಆ ಮೂಲಕ ಪೊಲೀಸರಿಗೆ ಗೌರವ ಸಲ್ಲಿಸುವ ಮಹತ್ತರ ಕಾರ್ಯ ನಡೆಯಬೇಕು ಎಂದು ಸಲಹೆ ನೀಡಿದರು. 

ಜಿಲ್ಲಾ ಪೊಲೀಸ್‌ ಅಧೀಕ್ಷಕ ಪ್ರಕಾಶ ನಿಕ್ಕಂ ಮಾತನಾಡಿ, ಪ್ರಸ್ತುತ ವರ್ಷದಲ್ಲಿ ಕರ್ತವ್ಯದಲ್ಲಿ ನಿರತರಾಗಿ ಹುತಾತ್ಮರಾಗಿರುವ ರಾಜ್ಯದ 15 ಜನ ಪೊಲೀಸರು ಸೇರಿದಂತೆ ದೇಶಾದ 414 ಹುತಾತ್ಮ ಪೊಲೀಸರ ನಾಮಸ್ಮರಣೆ ಮಾಡಿ ಗೌರವ ಸಲ್ಲಿಸಿದರು.

1959 ಅಕ್ಟೋಬರ್‌ 21ರಂದು ಹಾಟ್‌ ಸ್ಟ್ರಿಂಗ್ಸ್‌ ಪೋಸ್ಟ್‌ ಹತ್ತಿರ ಗಡಿ ಭಾಗದಲ್ಲಿ ಭಾರತದ ಸಿಆರ್‌ಪಿಎಫ್‌ ಪೊಲೀಸ್‌ ದಳ, ಡಿಎಸ್‌ಪಿ ಕರಣ್‌ ಸಿಂಗ್‌ ಅವರ ನೇತೃತ್ವದಲ್ಲಿ ಪಹರೆ ಮಾಡುತ್ತಿರುವ ಸಮಯದಲ್ಲಿ ಆಧುನಿಕ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಚೀನಾ ಸೈನಿಕರು ಹಠಾತ್‌ ದಾಳಿ ನಡೆಸಿದರು. ಆದರೆ ನಮ್ಮ ಪೊಲೀಸ್‌ ಕೆಲವೇ ಶಸ್ತ್ರಾಸ್ತ್ರಗಳಿಂದ ದಾಳಿ ನಡೆಸಿ ವೀರ ಮರಣ ಹೊಂದಿದ್ದರು. ದೇಶಕ್ಕಾಗಿ ವೀರ ಮರಣ ಹೊಂದಿದ್ದ ಪೊಲೀಸರ ಸ್ಮರಣೆಗಾಗಿ ಈ ದಿನಾಚರಣೆ ಮಾಡಲಾಗಿದೆ ಎಂದು ಹುತಾತ್ಮ ದಿನಾಚರಣೆಯ ಕುರಿತು ವಿವರಣೆ ನೀಡಿದರು.

ನಂತರ ಪಥ ಸಂಚಲನ ಬಳಿಕ ಪೊಲೀಸರು ಗಾಳಿಯಲ್ಲಿ ಮೂರು ಸುತ್ತು ಗುಂಡು ಹಾರಿಸಿ ಹುತಾತ್ಮ ಪೋಲಿಸರಿಗೆ ಗೌರವ ಸಮರ್ಪಿಸಿದರು. ಜಿಲ್ಲಾಧಿಕಾರಿ ಸಂಜಯ ಶೆಟ್ಟೆಣ್ಣವರ, ಡಿವೈಸ್ಪಿ ಡಿ.ಅಶೋಕ ಇದ್ದರು.