ಯುವಕನಿಗೆ ಚಪ್ಪಲಿಯೇಟು

Team Udayavani, Jul 26, 2017, 10:50 AM IST

ತಾಳಿಕೋಟೆ-ಮುದ್ದೇಬಿಹಾಳ: ತಾಲೂಕಿನ ದೇವರ ಹುಲಗಬಾಳ ಗ್ರಾಮದಲ್ಲಿ ವಿವಾಹಿತ ಮಹಿಳೆಯೊಬ್ಬಳ ಜೊತೆಗೆ ಅಸಭ್ಯವಾಗಿ ವರ್ತಿಸಿದ ಯುವಕನನ್ನು ಅಕ್ಕಪಕ್ಕದವರು ಹಾಗೂ ಗ್ರಾಮಸ್ಥರು ಹಿಗ್ಗಾಮುಗ್ಗವಾಗಿ ಥಳಿಸಿದ ಘಟನೆ ಮಂಗಳವಾರ ನಡೆದಿದೆ. 

ಮದ್ಯದ ಅಮಲಿನಲ್ಲಿ ಗ್ರಾಮಕ್ಕೆ ಬಂದ ಯುವಕ ತಾಳಿಕೋಟೆ-ಮುದ್ದೇಬಿಹಾಳ ಮುಖ್ಯ ರಸ್ತೆಯಲ್ಲಿ ತಾನು ತಂದ ಬೈಕ್‌ನ್ನು ನಿಲ್ಲಿಸಿ ಪಕ್ಕದಲ್ಲಿದ್ದ ಮನೆಯೊಂದರಲ್ಲಿ ಮಹಿಳೆಯೊಬ್ಬಳಿಗೆ ಕೈ ಮಾಡಿ ತನ್ನಲ್ಲಿಗೆ ಬಾ ಎಂಬ ರೀತಿಯಲ್ಲಿ ಸನ್ನೆ ಮಾಡಿದ್ದಾನೆ. ಅಲ್ಲದೇ ಬೈಕಿನಿಂದ ಶಬ್ದವನ್ನೂ ಮಾಡಿದ್ದಾನೆ. ವಿಷಯ ತಿಳಿಯುತ್ತಿದ್ದಂತೆ ಗ್ರಾಮಸ್ಥರು ಒಗ್ಗೂಡಿ ಯುವಕನಿಗೆ ಥಳಿಸಿದ್ದಾರೆ.

ಗ್ರಾಮಸ್ಥರಿಂದ ಥಳಿತಕ್ಕೊಳಗಾದ ಯುವಕ ತನ್ನ ತಪ್ಪಿನ ಅರಿವಾಗಿ ಜನರಲ್ಲಿ ಕ್ಷಮೆಯಾಚಿಸಿದ್ದಾನೆ. ಆದರೆ ಯುವಕನ ಕ್ಷಮೆ ಆಲಿಸದ ಗ್ರಾಮಸ್ಥರು ಯುವಕನನ್ನು ಪೊಲೀಸ್‌ ಠಾಣೆಗೆ  ಒಪ್ಪಿಸಬೇಕೆಂದು ನಿರ್ಧರಿಸಿದ್ದರು. ಆದರೆ ಮತ್ತೇ ಜನರಲ್ಲಿ ಕ್ಷಮೆ ಕೇಳಿದ ಯುವಕ ನಾನು ದೊಡ್ಡ ಮನೆತನದವನು ಹಾಗೂ ನನಗೆ ದೊಡ್ಡ ಜನರ ಪರಿಚಯವಿದೆ. ಆದ್ದರಿಂದ ನನ್ನ ಮಾನವನ್ನು ಕಳೆಯಬೇಡಿ. ದಯವಿಟ್ಟು ನನ್ನನ್ನು ಬಿಟ್ಟು ಬಿಡಿ ಎಂದು ಅಂಗಲಾಚಿದ್ದಾನೆ. ಯುವಕನ ಕ್ಷಮೆ ಕೇಳುವ ಪರಿಯನ್ನು ಗಮನಿಸಿದ ಪಾದಚಾರಿಗಳು ಗ್ರಾಮಸ್ಥರಿಗೆ ತಿಳಿಹೇಳಿ ಯುವಕನನ್ನು ಪೊಲೀಸ್‌ ಠಾಣೆಗೆ ಒಪ್ಪಿಸಬೇಡಿ. ಇದರಿಂದ ಅವನ ಭವಿಷ್ಯವೂ ಹಾಳಾಗುತ್ತದೆ ಹಾಗೂ
ಇಂತಹ ಪ್ರಕರಣಗಳು ಹೆಚ್ಚಾಗುತ್ತವೆ. ಆದ್ದರಿಂದ ಯುವಕನ ಮನೆಯವರನ್ನು ಕರೆಸಿ ಅವರಿಗೆ ಇವನು ಮಾಡಿದ ತಪ್ಪನ್ನು ತಿಳಿಸಿರಿ. ಇದರಿಂದ ಯುವಕನಿಗೂ ಪಶ್ಚಾತ್ತಾಪವಾಗುವುದು ಹಾಗೂ ಮನೆಯವರಿಗೂ ಇವನ ಘನತೆ ತಿಳಿಯುವುದು ಎಂದು ಹೇಳಿದ ನಂತರ ಗ್ರಾಮಸ್ಥರು  ಯುವಕನನ್ನು ಪೊಲೀಸರಿಗೆ ಒಪ್ಪಿಸುವ ನಿರ್ಧಾರ ಕೈಬಿಟ್ಟು ಯುವಕನ ಬೈಕ್‌ ಕಸಿದುಕೊಂಡು ನಿಮ್ಮ ಮನೆಯವರನ್ನು ಕರೆದುಕೊಂಡು ಬಂದು ಬೈಕ್‌ ತೆಗೆದುಕೊಂಡು ಹೋಗು ಎಂದು ಕಳುಹಿಸಿದ್ದಾರೆ. 

ಈ ಕುರಿತು ಪೊಲೀಸ್‌ ಠಾಣೆಯಲ್ಲಿ ಯಾವುದೇ ಪ್ರಕರಣ ದಾಖಲಾಗಿಲ್ಲ.