Vijayapura; ಕೋರ್ಟ್ ಬಳಿ ತಲ್ವಾರ್ ದಾಳಿ: ಯುವಕನಿಗೆ ಗಂಭೀರ ಗಾಯ

Team Udayavani, Feb 5, 2024, 10:38 PM IST

ವಿಜಯಪುರ : ನಗರದ ಕೋರ್ಟ್ ಬಳಿ ಯುವಕನೊಬ್ಬನ ಮೇಲೆ ತಲ್ವಾರ್ ನಿಂದ ಅಪರಿಚಿತ ದಾಳಿ ನಡೆಸಿದ್ದು, ಗಾಯಾಳುವನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಾಳುವನ್ನು ನಗರದ ಹೂವಿನ ವ್ಯಾಪಾರಿ ಫಿರೋಜ್ ಮುಲ್ಲಾ(32) ಎಂದು ಗುರುತಿಸಲಾಗಿದೆ.

ಸೋಮವಾರ ರಾತ್ರಿ 8-30 ರ ಸುಮಾರಿಗೆ ನಗರದ ಬಾಗಲಕೋಟ ರಸ್ತೆಯ ಕೋರ್ಟ್ ಬಳಿ ಅಪರಿಚಿತನಿಂದ ತಲ್ವಾರನಿಂದ ದಾಳಿ ನಡೆದಿದೆ. ದಾಳಿ ಮಾಡಿರುವ ವ್ಯಕ್ತಿ ಯಾರು, ದಾಳಿ ನಡೆಯಲು ಕಾರಣವೇನು ಎಂದು ನಿಖರವಾಗಿ ತಿಳಿದು ಬಂದಿಲ್ಲ.

ಫಿರೋಜ್ ಕತ್ತಿನ ಬಳಿ ತಲ್ವಾರನಿಂದ ದಾಳಿ ನಡೆದಿದ್ದು, ದೇಹದಿಂದ ರಕ್ತ ಸೋರುತ್ತಿದ್ದರೂ ರಸ್ತೆ ಪಕ್ಕದ ಅಂಡಗಿ ಮಳಿಗೆ ಎದುರು ಕುಳಿತು ಒದ್ದಾಡುತ್ತಿದ್ದ. ವಿಷಯ ತಿಳಿದು ಸ್ಥಳಕ್ಕೆ ಧಾವಿಸಿದ ಜಲನಗರ ಠಾಣೆ ಪೊಲೀಸರು ಗಾಯಾಳುವನ್ನು ಕೂಡಲೇ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದು, ಪರಿಶೀಲನೆ ನಡೆಸಿದ್ದಾರೆ.