ಹೊಲದಲ್ಲಿ ವಿದ್ಯುತ್‌ ಸ್ಪರ್ಶಿಸಿ ಗಂಡಾನೆ ಸ್ಥಳದಲ್ಲೇ ಸಾವು

Team Udayavani, Dec 15, 2021, 11:28 AM IST

ಹನೂರು: ಜಮೀನಿನಲ್ಲಿ ಬೆಳೆ ರಕ್ಷಣೆಗೆ ಅಕ್ರಮವಾಗಿ ಹರಿಬಿಟ್ಟಿದ್ದ ವಿದ್ಯುತ್‌ ತಂತಿಗೆ ಸಿಲುಕಿ 30 ವರ್ಷ ಪ್ರಾಯದ ಗಂಡಾನೆಯೊಂದು ಮೃತಪಟ್ಟಿರುವ ಘಟನೆ ಹನೂರು ತಾಲೂಕಿನ ಉದ್ದಟ್ಟಿ ಗ್ರಾಮದಲ್ಲಿ ಜರುಗಿದೆ.

ತಾಲೂಕಿನ ಪಿ.ಜಿ.ಪಾಳ್ಯ ಸಮೀಪದ ಉದ್ದಟ್ಟಿ ಗ್ರಾಮದ ಅರಣ್ಯದಂಚಿನಲ್ಲಿ ಜಮೀನು ಹೊಂದಿರುವ ಶಿವಕುಮಾರ್‌ ಎಂಬಾತನ ತನ್ನ ಜಮೀನಿನಲ್ಲಿ ಬೆಳೆದಿದ್ದ ಜೋಳದ ಫ‌ಸಲಿನ ರಕ್ಷಣೆಗೆ ಅಕ್ರಮವಾಗಿ ವಿದ್ಯುತ್‌ ತಂತಿ ಬಿಟ್ಟಿದ್ದರು ಎನ್ನಲಾಗಿದೆ. ಸೋಮವಾರ ಕಾಡಾನೆಯೊಂದು ಮೇವನ್ನು ಅರಸಿ ಜಮೀನಿನತ್ತ ಬರುತ್ತಿದ್ದಾಗ ಅಕ್ರಮ ವಿದ್ಯುತ್‌ ಸಂಪರ್ಕಕ್ಕೆ ಸಿಲುಕಿ ಸ್ಥಳದಲ್ಲಿಯೇ ಮೃತಪಟ್ಟಿದೆ.

ಸುದ್ದಿ ತಿಳಿಯುತ್ತಿದ್ದಂತೆ ಎಸಿಎಫ್ ರಮೇಶ್‌ ಮತ್ತು ಆರ್‌ಎಫ್ಒ ರಮೇಶ್‌, ಸೆಸ್ಕ್ ಎಇಇ ಶಂಕರ್‌, ಗ್ರಾಮಲೆಕ್ಕಿಗ ವಿನೋದ್‌ ಸ್ಥಳಕ್ಕೆ ಆಗಮಿಸಿ ಸ್ಥಳ ಪರಿಶೀಲನೆ ನಡೆಸಿ ಮೈಸೂರಿನಿಂದ ಪಶು ವೈದ್ಯಾಧಿಕಾರಿಗಳನ್ನು ಕರೆಯಿಸಿ ಮರಣೋತ್ತರ ಪರೀಕ್ಷೆ ನಡೆಸಿ ಆನೆಯ ಕಳೇಬರವನ್ನು ಸ್ಥಳದಲ್ಲೇ ಸುಡಲಾಯಿತು. ಇತ್ತ ಅಕ್ರಮವಾಗಿ ವಿದ್ಯುತ್‌ ತಂತಿ ಬಿಟ್ಟು ಆನೆಯ ಸಾವಿಗೆ ಕಾರಣವಾದ ಶಿವಕುಮಾರನ ವಿರುದ್ಧ ಅರಣ್ಯಾಧಿಕಾರಿ ಗಳು ಪ್ರಕರಣ ದಾಖಲಿಸಿಕೊಂಡು ನಾಪತ್ತೆಯಾಗಿರುವ ಆರೋಪಿಯ ಬಂಧನಕ್ಕೆ ಬಲೆ ಬೀಸಿದ್ದಾರೆ.