ಮಲೆ ಮಾದಪ್ಪನ ಲಾಡು ಪ್ರಸಾದಕ್ಕೆ 5 ರೂ. ಹೆಚ್ಚಳ !

Team Udayavani, Nov 9, 2020, 6:22 PM IST

ಹನೂರು: ಶ್ರೀ ಕ್ಷೇತ್ರ ಮಲೆ ಮಹದೇಶ್ವರ ಬೆಟ್ಟದ ಲಾಡು ಪ್ರಸಾದದ ಬೆಲೆಯನ್ನು 5 ರೂ. ಏರಿಕೆ ಮಾಡಿ ಪ್ರಾಧಿಕಾರದಿಂದ ಆದೇಶ ಹೊರಡಿಸಲಾಗಿದೆ.

ಶ್ರೀ ಕ್ಷೇತ್ರ ಮಲೆ ಮಹದೇಶ್ವರ ಬೆಟ್ಟದಲ್ಲಿ ಲಾಡು ಪ್ರಸಾದವನ್ನು ಭಕ್ತಾದಿಗಳಿಗೆ ವಿತರಿಸುತ್ತಾ ಬರಲಾಗಿದ್ದು, ಈವರೆಗೆ ಪ್ರತಿ ಲಾಡುಗೆ 20ರೂಗಳಂತೆ ಮಾರಾಟ ಮಾಡಲಾಗುತಿತ್ತು. ಇದೀಗ ಪ್ರತಿ ಲಾಡಿನ ಬೆಲೆಯನ್ನು 25ರೂಗಳಿಗೆ ಏರಿಕೆ ಮಾಡಿ ಪ್ರಾಧಿಕಾರದ ಕಾರ್ಯದರ್ಶಿ ಜಯವಿಭವಸ್ವಾಮಿ ಆದೇಶ ಹೊರಡಿಸಿದ್ದಾರೆ.

ಬೆಲೆ ಏರಿಕೆಗೆ ಕಾರಣ?: 

ಶ್ರೀ ಕ್ಷೇತ್ರ ಮಲೆ ಮಹದೇಶ್ವರ ಬೆಟ್ಟದಲ್ಲಿ 2015ರವರೆಗೂ ಪ್ರತಿ ಲಾಡು ಪ್ರಸಾದವನ್ನು 15ರೂ. ಗಳಂತೆ ಮಾರಾಟ ಮಾಡಲಾಗುತಿತ್ತು. ಬಳಿಕ 2015ರಲ್ಲಿ ಇದರ ಬೆಲೆಯನ್ನು 20ರೂ.ಗೆ ಏರಿಕೆ ಮಾಡಲಾಗಿತ್ತು. 2015 ರಿಂದೀಚೆಗೆ ಯಾವುದೇ ಬೆಲೆ ಏರಿಕೆ ಮಾಡಿರಲಿಲ್ಲ. ಇದೀಗ ಲಾಡು ತಯಾರಿಕೆಗೆ ಅವಶ್ಯಕವಾದ, ಕಚ್ಚಾವಸ್ತುಗಳ ಬೆಲೆಯು ಶೇ.50ರಷ್ಟು ಏರಿಕೆಯಾಗಿದೆ.

ಇದನ್ನೂ ಓದಿ: ಮಲ್ಪೆ: ಸಮುದ್ರದಲ್ಲಿ ಮುಳುಗುತ್ತಿದ್ದ ಯುವತಿಯ ರಕ್ಷಿಸಲು ಹೋದ ಯುವಕನೂ ನೀರುಪಾಲು; ರಕ್ಷಣೆ

ಲಾಡು ತಯಾರಿಕೆ ವಿಭಾಗದಲ್ಲಿ ಕಾರ್ಯನಿರ್ವಹಿಸುವ ಖಾಯಂ ಸಿಬ್ಬಂದಿಗಳ ವೇತನ 6ನೇ ವೇತನ ಆಯೋಗದ ಮಾನದಂಡದಲ್ಲಿ ವಿತರಿಸಲಾಗುತ್ತಿದ್ದು ಶೇ.35ರಷ್ಟು ಹೆಚ್ಚಳವಾಗಿದೆ. ಅಲ್ಲದೆ ದಿನಗೂಲಿ ನೌಕರರ ವೇತನವೂ ಶೇ.30ರಷ್ಟು ಏರಿಕೆಯಾಗಿದೆ. ಈ ಹಿನ್ನೆಲೆ ಲಾಡಿನ ದರವನ್ನು ಹೆಚ್ಚಳ ಮಾಡಿ ಪ್ರತಿ 100ಗ್ರಾಂ ತೂಕದ ಲಾಡಿಗೆ 25ರೂ ದರ ನಿಗದಿಪಡಿಸಿ ಆದೇಶ ಹೊರಡಿಸಲಾಗಿದೆ.

ಇದನ್ನೂ ಓದಿ:  ಕಾವೇರಿ ನದಿಯಲ್ಲಿ ಪ್ರಿವೆಡ್ಡಿಂಗ್ ಫೋಟೊಶೂಟ್‌: ತೆಪ್ಪ ಮುಳುಗಿ ಜೋಡಿ ಸಾವು

ಲಾಡು ತಯಾರಿಕೆಯ ಕಚ್ಚಾ ಸಾಮಾಗ್ರಿ, ಸಿಬ್ಬಂದಿ ವೇತನ ಸೇರಿದಂತೆ ತಯಾರಿಕೆ ವೆಚ್ಚ ಹೆಚ್ಚಳವಾಗಿರುವ ಹಿನ್ನೆಲೆ ಕನಿಷ್ಠ ಲಾಭಾಂಶವೂ ಇಲ್ಲದೆ ನಷ್ಟ ಅನುಭವಿಸುವಂತಹ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಈ ಹಿನ್ನೆಲೆ ಲಾಡಿನ ದರವನ್ನು 25ರೂ.ಗೆ ಹೆಚ್ಚಳ ಮಾಡಲಾಗಿದ್ದು ಭಕ್ತಾದಿಗಳು ಸಹಕರಿಸಬೇಕು.

-ಜಯವಿಭವಸ್ವಾಮಿ, ಪ್ರಾಧಿಕಾರದ ಕಾರ್ಯದರ್ಶಿ