ಸಾಲೂರು ಮಠದ ಉತ್ತಾರಾಧಿಕಾರಿ ನೇಮಕ ವಿಚಾರ ಬೇಡಗಂಪಣ ಸಮುದಾಯದ ಮುಖಂಡರ ಸಭೆ

Team Udayavani, Jul 26, 2020, 12:53 PM IST

ಹನೂರು(ಚಾಮರಾಜನಗರ): ಶ್ರೀಕ್ಷೇತ್ರ ಮಲೆ ಮಹದೇಶ್ವರ ಬೆಟ್ಟದ ಸಾಲೂರು ಮಠಕ್ಕೂ ಬೇಡಗಂಪಣ ಸಮುದಾಯಕ್ಕೂ ಅವಿನಾಭಾವ ಸಂಬಂಧವಿದೆ. ಈ ನಿಟ್ಟಿನಲ್ಲಿ ಸಾಲೂರು ಮಠದ ಉತ್ತರಾಧಿಕಾರಿ ಆಯ್ಕೆಯಲ್ಲಿ ಸುತ್ತೂರು ಶ್ರೀಗಳು, ಸಿದ್ಧಗಂಗಾ ಶ್ರೀಗಳು, ಕನಕಪುರ ಶ್ರೀಗಳು ಮತ್ತು ಪಟ್ಟದ ಗುರುಸ್ವಾಮಿಗಳು ಕೈಗೊಳ್ಳುವ ಒಮ್ಮತದ ನಿರ್ಧಾರಕ್ಕೆ ತಮ್ಮ ಬೆಂಬಲವಿದೆ ಎಂದು ಬೇಡಗಂಪಣ ಸಮುದಾಯದ ಮುಖಂಡರು ತೀರ್ಮಾನ ಕೈಗೊಂಡಿದ್ದಾರೆ.

ಈ ವೇಳೆ ಮಾತನಾಡಿದ ಬೇಡಗಂಪಣ ಮುಖಂಡರು ಮಲೆ ಮಹದೇಶ್ವರ ಸ್ವಾಮಿ, ಸಾಲೂರು ಮಠ ಮತ್ತು ಬೇಡಗಂಪಣ ಸಮುದಾಯದ ಅವಿನಾಭಾವ ಸಂಬಂಧ ಉತ್ತಮವಾದುದಾಗಿದೆ. ಆದರೆ ಇದೀಗ ಸಾಲೂರು ಮಠಕ್ಕೆ ಉತ್ತರಾಧಿಕಾರಿ ಆಯ್ಕೆಗಾಗಿ ಕಳೆದ ಒಂದು ವರ್ಷದಿಂದ ಪ್ರಯತ್ನಗಳು ನಡೆಯುತ್ತಿವೆ. ಈ ನಿಟ್ಟಿನಲ್ಲಿ ಕೆಲ ಭಕ್ತರು ಸುಳ್ವಾಡಿ ವಿಷ ಪ್ರಸಾದ ಪ್ರಕರಣದಲ್ಲಿ ಜೈಲು ಪಾಲಾಗಿರುವ ಇಮ್ಮಡಿ ಮಹದೇವಸ್ವಾಮಿ ಮತ್ತು ಪಟ್ಟದ ಗುರುಸ್ವಾಮಿಗಳ ರಕ್ತಸಂಬಂಧಿಗಳನ್ನು ಹೊರತುಪಡಿಸಿ ಮಠದ ಶ್ರೇಯೋಭಿವೃದ್ಧಿಗಾಗಿ ಶ್ರಮಿಸುವವರನ್ನು ಆಯ್ಕೆ ಮಾಡಬೇಕು ಎಂಬ ನಿರ್ಧಾರವನ್ನು ಕೈಗೊಂಡಿದ್ದಾರೆ.

ಈ ದಿಸೆಯಲ್ಲಿ ಸುತ್ತೂರು ಶ್ರೀಗಳು, ಕನಕಪುರದ ಶ್ರೀಗಳು ಒಂದು ಶೋಧನಾ ಸಮಿತಿಯನ್ನೂ ಸಹ ರಚನೆ ಮಾಡಿದ್ದಾರೆ. ಆದುದರಿಂದ ಮಠದ ಹಿತದೃಷ್ಠಿಯಿಂದ ಸುತ್ತೂರು ಜಗದ್ಗುರುದೇಶಿಕೇಂದ್ರ ಶಿವರಾತ್ರಿ ಮಹಾಸ್ವಾಮಿಗಳು, ಕನಕಪುರದ ಮುಮ್ಮಡಿ ಮಹಾಸ್ವಾಮಿಗಳು, ಸಿದ್ಧಗಂಗಾ ಶ್ರೀಗಳು ಹಾಗೂ ಪಟ್ಟದ ಗುರುಸ್ವಾಮಿಗಳು ಆಯ್ಕೆ ಮಾಡುವ ಉತ್ತರಾಧಿಕಾರಿಯನ್ನು ಒಮ್ಮತದಿಂದ ಮನಃಪೂರ್ವಕವಾಗಿ ಸ್ವೀಕರಿಸುವುದಾಗಿ ಸಭೆಯಲ್ಲಿ ತೀರ್ಮಾನ ಕೈಗೊಂಡರು.

ಸಭೆಯಲ್ಲಿ ಪುಟ್ಟಣ್ಣ, ಹಲಗ ತಂಬಡಿ, ಚೇಳು ಮಾದತಂಬಡಿ, ಮುರುಗೇಶ್, ಉಮೇಶ್, ಮಾಜಿ ಧರ್ಮದರ್ಶಿ ನಾಗಪ್ಪ, ಪುಟ್ಟಮಾದ ತಂಬಡಿ ಇನ್ನಿತರರು ಭಾಗವಹಿಸಿದ್ದರು.