ಸಿದ್ದಪ್ಪಾಜಿ ಜಾತ್ರೆ: ಭಕ್ತರಿಂದ ಪಂಕ್ತಿ ಸೇವೆ

Team Udayavani, Jan 25, 2019, 6:44 AM IST

ಕೊಳ್ಳೇಗಾಲ: ತಾಲೂಕಿನ ಚಿಕ್ಕಲ್ಲೂರು ಜಾತ್ರೆಯ ಪ್ರಮುಖ ಆಚರಣೆಯಾದ ಪಂಕ್ತಿಸೇವೆ ನಾಲ್ಕನೇ ದಿನವಾದ ಗುರುವಾರ ಸಡಗರ ಸಂಭ್ರಮದಿಂದ ಜರುಗಿತು.

ಜಾತ್ರೆಗೆ ಲಕ್ಷಾಂತರ ಜನ ಭಕ್ತರು ಆಗಮಿಸಿ ಪವಾಡ ಪುರುಷ ಸಿದ್ದಪ್ಪಾಜಿ ಗದ್ದುಗೆಯ ದರ್ಶನ ಪಡೆದರು. ಗುಡಾರ ಹಾಕಿದ್ದವರು ಕಂಡಾಯಕ್ಕೆ ಪೂಜೆ ಸಲ್ಲಿಸಿದ ಬಳಿಕ ಹೊರಗಡೆಯಿಂದ ಸಿದ್ಧಪಡಿಸಿಕೊಂಡು ಬಂದಿದ್ದ ಮಾಂಸಾಹಾರವನ್ನು ಎಡೆ ಇಟ್ಟು ನೈವೇದ್ಯ ಮಾಡಿ ಸಮರ್ಪಿಸಿದರು. ಬಳಿಕ ಪದ್ಧತಿಯಂತೆ ಪಂಕ್ತಿ ಸೇವೆ ಮಾಡಿ ಹರಕೆ ತೀರಿಸಿದರು.

ಜಾತ್ರೆಯ ಆವರಣದಿಂದ ಸ್ವಲ್ಪ ದೂರ ಇರುವ ಖಾಸಗಿ ಜಮೀನುಗಳಲ್ಲಿ ಕುರಿ, ಮೇಕೆ, ಕೋಳಿಗಳನ್ನು ಕಡಿದು ಬಾಡೂಟ ತಯಾರಿಸಿ ಬಂಧು ಬಾಂಧವರ ಜತೆ ಊಟಮಾಡುವುದು ಪಂಕ್ತಿ ಸೇವೆ ಆಚರಣೆ.

ನಿರ್ಬಂಧ: ನ್ಯಾಯಾಲಯದ ಆದೇಶದ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ಪ್ರಾಣಿಗಳ ಸಾಗಾಣಿಕೆಗೆ ನಿರ್ಬಂಧ ಹೇರಿತ್ತು. ಆರು ಕಡೆಗಳಲ್ಲಿ ಚೆಕ್‌ಪೋಸ್ಟ್‌ಗಳನ್ನು ತೆರೆದು ಎಲ್ಲೆಡೆ ಬಂದೋಬಸ್ತ್ ಮಾಡಲಾಗಿತ್ತು. ಭಕ್ತಾದಿ ಗಳು ದೇವಸ್ಥಾನದ ಹೊರ ವಲಯದಲ್ಲಿರುವ ಆಜುಬಾಜಿನ ಜಮೀನುಗಳಲ್ಲಿ ತಾತ್ಕಾಲಿಕ ಬಿಡಾರಗಳನ್ನು ಹೂಡಿ ದೇವಸ್ಥಾನದಿಂದ ತೀರ್ಥವನ್ನು ತಂದು ಕುರಿ, ಕೋಳಿಗಳನ್ನು ಕತ್ತರಿಸಿ ಮಾಂಸಹಾರ ತಯಾರಿಸಿ ಫ‌ಂಕ್ತಿ ಭೋಜನ ನೆರವೇರಿಸಿದರು.

ಜಾತಿ, ಧರ್ಮ ಭೇದವಿಲ್ಲದೇ ಪಂಕ್ತಿ ಭೋಜನೆ ನಡೆಸುವುದೇ ಜಾತ್ರಾ ಮಹೋತ್ಸವದ ಪ್ರಮುಖ ಉದ್ದೇಶವಾಗಿದ್ದು, ಜಾತ್ರೆಯ ನಾಲ್ಕನೇ ದಿನ ಪಂಕ್ತಿ ಸೇವೆಗಾಗಿ ಲಕ್ಷಾಂತರ ಸಂಖ್ಯೆಯಲ್ಲಿ ಬಂದು ಪೂಜೆ ಸಲ್ಲಿಸಿ, ತಮ್ಮ ಹರಕೆ ತೀರಿಸಿದರು.

ಪೊಲೀಸ್‌, ಕಂದಾಯ, ಅಬಕಾರಿ ಇಲಾಖೆ ಅಧಿಕಾರಿಗಳು ಹರಕೆಗೆಂದು ತಂದಿದ್ದ 3 ಕುರಿ, 32 ಆಡು, 80 ಕೋಳಿಗಳನ್ನು ವಶಪಡಿಸಿ ಕೊಂಡರು.

ಪೂಜೆ: ವಿವಿಧ ಜಿಲ್ಲೆಗಳಿಂದ ಆಗಮಿಸಿದ ಭಕ್ತರು ದೇವಸ್ತಾನದ ಹಳೇಮಠ ಮತ್ತು ಹೊಸಮಠಗಳಲ್ಲಿ ಭಕ್ತರು ದೇವಸ್ಥಾನದ ಮುಂದೆ ದೂಪಹಾಕಿ, ಬಿಡಾರಗಳಲ್ಲಿ ತಯಾರಿಸಿದ್ದ ಫ‌ಂಕ್ತಿಭೋಜನ ನೆರವೇರಿಸಿ ತಮ್ಮ ಹರಕೆ ಪೂರೈಸಿಕೊಂಡರು.

ತಪಾಸಣೆ: ದೇವಸ್ಥಾನಕ್ಕೆ ತೆರಳುವ ಸುಮಾರು 6 ಕಡೆಗಳಿಂದ ಬರುವ ವಾಹನ ಗಳನ್ನು ತಪಾಸಣೆ ಮಾಡಿದ ಅಧಿಕಾರಿ ಗಳು ವಾಹನಗಳಲ್ಲಿ ಕುರಿ, ಕೋಳಿ ಕಂಡು ಬಂದ ಕೂಡಲೇ ವಶಕ್ಕೆ ಪಡೆಯುತ್ತಿದ್ದರು. ಸುದ್ದಿ ವ್ಯಾಪಕವಾಗಿ ಹರಡುತ್ತಿದ್ದಂತೆ ದೇವಸ್ಥಾನಕ್ಕೆ ಬರುತ್ತಿದ್ದ ಮತ್ತಷ್ಟು ಭಕ್ತರು ಜಾತ್ರೆಗೆ ಬರಲು ಹಿಂಜರಿಯುತ್ತಿದ್ದರು.

ಆದರೂ ಸಂಪ್ರದಾಯದಂತೆ ದೇವಾಲಯಕ್ಕೆ ಹೋಗಲೇ ಬೇಕು ಎಂದು ಹಲವಾರು ಭಕ್ತರು ಕತ್ತರಿಸಿದ ಮಾಂಸವನ್ನು ಬೇರೆಡೆಗಳಿಂದ ತಂದು ಹೊರ ವಲಯಗಳಲ್ಲಿ ಕದ್ದುಮುಚ್ಚಿ ಅಡುಗೆ ತಯಾರಿಸುತ್ತಿದ್ದರು. ಶುಕ್ರವಾರ ಮುತ್ತುರಾಯನ ಸೇವೆ ಯೊಂದಿಗೆ ಬೃಹತ್‌ 5 ದಿನದ ಜಾತ್ರಾ ಮಹೋತ್ಸವಕ್ಕೆ ತೆರೆ ಬೀಳಲಿದೆ.