ಮತ್ತೆ ಯರಗಂಬಳ್ಳಿ ಗ್ರಾಪಂಗೆ ಪುರಸ್ಕಾರ

Team Udayavani, Oct 2, 2020, 12:41 PM IST

ಯಳಂದೂರು ತಾಲೂಕಿನಯರಗಂಬಳ್ಳಿ ಗ್ರಾಮ ಪಂಚಾಯ್ತಿ.

ಯಳಂದೂರು: ತಾಲೂಕಿನ ಯರಗಂಬಳ್ಳಿ ಗ್ರಾಪಂಗೆ 2019-20 ನೇ ಸಾಲಿನ ಗಾಂಧಿ ಗ್ರಾಮ ಪುರಸ್ಕಾರ ಪ್ರಶಸ್ತಿ ಲಭ್ಯವಾಗಿದ್ದು ಸತತ 2 ನೇ ಬಾರಿ ಈ ಪುರಸ್ಕಾರ ಲಭಿಸಿದೆ ಎಂದು ಪಿಡಿಒ ವೆಂಕಟಾಚಲಮೂರ್ತಿ ಮಾಹಿತಿ ನೀಡಿದರು.

ಈ ಪಂಚಾಯ್ತಿ ಯರಗಂಬಳ್ಳಿ, ಗಂಗವಾಡಿ, ದಾಸನಹುಂಡಿ, ದೇವರಹಳ್ಳಿ ಗ್ರಾಮಗಳನ್ನು ಒಳಗೊಂಡಿದೆ. ಈ ಪ್ರಶಸ್ತಿ ರಾಜ್ಯಮಟ್ಟದ ಪ್ರಶಸ್ತಿಯಾಗಿದೆ. 2011ರ ಜನಗಣತಿ ಪ್ರಕಾರ ಪಂಚಾಯ್ತಿಯಲ್ಲಿ ಒಟ್ಟು 5345 ಸಾವಿರ ಜನಸಂಖ್ಯೆ ಇದೆ. ಮಹಾತ್ಮಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗಖಾತ್ರಿ ಯೋಜನೆಯಡಿ 2019-20 ನೇ ಸಾಲಿನಲ್ಲಿ 25,198 ಮಾನವ ದಿನ ಸೃಜಿಸಲಾಗಿದ್ದು, ಗುರಿಗಿಂತ ಹೆಚ್ಚಾಗಿ ಶೇ.128 ಪ್ರಗತಿ ಸಾಧಿಸಲಾಗಿದೆ.

ಹಸಿರೀಕರಣಕ್ಕೆ ಒತ್ತು: ವಿಶೇಷವಾಗಿ ಈ ಪಂಚಾಯ್ತಿ ಯಲ್ಲಿ ಕಳೆದ ವರ್ಷ ಹಾಕಲಾಗಿದ್ದ2100 ಗಿಡಗಳನ್ನು ಪೋಷಿಸಲಾಗಿದ್ದು. ಶೇ.98 ಗಿಡಗಳನ್ನು ಜೀವಂತವಾಗಿ ಕಾಯ್ದುಕೊಳ್ಳಲಾಗಿದೆ. ಜತೆಗೆ 138 ವೈಯುಕ್ತಿಕ ಹಾಗೂ 1 ಸಮುದಾಯ ಶೌಚಾಲಯ ನಿರ್ಮಿಸಲಾಗಿದೆ. ಈ ಸಾಲಿನಲ್ಲೇ ಶೇ.100 ಕಂದಾಯ ವಸೂಲಿ ಮಾಡಲಾಗಿದ್ದು ಒಟ್ಟು 44318 ರೂ.ಗಳ ಸಂಗ್ರಹಿಸಲಾಗಿದೆ. ಇದರಲ್ಲಿ ಪರಿಶಿಷ್ಟ ಜಾತಿ, ವರ್ಗದ ವಿದ್ಯಾರ್ಥಿಗಳಿಗೆ ವಿದ್ಯಾರ್ಥಿ ವೇತನ, ದಿವ್ಯಾಂಗರಿಗೆ ಸಹಾಯಧನ, ಕ್ರೀಡಾ ಸಾಮಗ್ರಿಗಳ ವಿತರಣೆಯನ್ನೂ ಮಾಡಲಾಗಿದೆ ಎಂದು ಹೇಳಿದರು.

ಭಾರತ್‌ ನಿರ್ಮಾಣ್‌ ರಾಜೀವ್‌ ಗಾಂಧಿ ಸೇವಾ ಕೇಂದ್ರದ ಕಾಮಗಾರಿ ಪೂರ್ಣಗೊಳಿಸಿ ಗ್ರಾಪಂ ಕಚೇರಿಯನ್ನು ಹೊಸಕಟ್ಟಡಕ್ಕೆ ಸ್ಥಳಾಂತರಿಸಲಾಗಿದೆ ಎಂದು ಮಾಹಿತಿ ನೀಡಿದರು. ಹಾಗೆಯೇಕುಡಿಯುವ ನೀರು, ಸುಗಮ ಆಡಳಿತದ ಸಾಧನೆ, ಗ್ರಾಮಸಭೆಗಳ ಆಯೋಜನೆ, ಸ್ವತ್ಛ ಭಾರತ್‌, ತೆರಿಗೆ ವಸೂಲಾತಿ, ಆರ್ಥಿಕ ಪ್ರಗತಿ, ವಿಶೇಷ ವಾರ್ಡ್‌, ಗ್ರಾಮ ಸಭೆ, ಜಮಾಬಂಧಿ, ಸಾಮಾಜಿಕ ಲೆಕ್ಕ ತಪಾಸಣೆ, ವಾರ್ಷಿಕ ವರದಿಯಲ್ಲಿ ಗ್ರಾಪಂ ಪ್ರಗತಿ ಸಾಧಿಸಿದೆ ಎಂದು ತಿಳಿಸಿದರು. ಪಂಚಾಯ್ತಿಯ ಈ ಸಾಧನೆಗೆ ಇಒ ಬಿ.ಎಸ್‌.ರಾಜು, ಆಡಳಿತಾಧಿಕಾರಿ ಎಸ್‌.ಎಚ್‌. ಶ್ರೀಧರ್‌ ಸೇರಿದಂತೆ ಸಾರ್ವಜನಿಕರು, ಗ್ರಾಮಸ್ಥರು ಅಭಿನಂದನೆ ಸಲ್ಲಿಸಿದ್ದಾರೆ.

6 ವಿಭಾಗಗಳಲ್ಲಿ 100 ಪ್ರಶ್ನೆ ಕೇಳಲಾಗಿತ್ತು :  ಈ ಬಾರಿ ಈ ಪುರಸ್ಕಾರಕ್ಕೆ ಜೀವನ ಗುಣಮಟ್ಟ, ಹಣಕಾಸಿನ ವಿಷಯ, ಮೂಲಸೌಕರ್ಯ, ಉತ್ತಮ ಆಡಳಿತ, ಗ್ರಾಪಂ ಸೇವೆ,ವಿನೂತನಪ್ರಯೋಗಸೇರಿದಂತೆ 6 ವಿಭಾಗಗಳಲ್ಲಿ 100 ಪ್ರಶ್ನೆ ಕೇಳಲಾಗಿತ್ತು. ಇದರಲ್ಲಿ ಬಹುತೇಕ ಮಾನದಂಡಗಳಲ್ಲಿ ಪಂಚಾಯ್ತಿ ಪ್ರಗತಿ ಸಾಧಿಸಿದೆ ಎಂದು ಗ್ರಾಪಂ ಪಿಡಿಒ ವೆಂಕಟಾಚಲಮೂರ್ತಿ ತಿಳಿಸಿದರು. ಕೇಂದ್ರ, ರಾಜ್ಯ ತಂಡಗಳು ಪರಿಶೀಲನೆ ನಡೆಸಿವೆ. ಕಳೆದ ಬಾರಿಯ ಗ್ರಾಮ ಪುರಸ್ಕಾರದ 5 ಲಕ್ಷ ರೂ. ಹಣದಲ್ಲಿ ಪಂಚಾಯ್ತಿಗೆ ಆದಾಯ  ಬರಲು 2 ಅಂಗಡಿ ಮಳಿಗೆ ನಿರ್ಮಾಣ ಮಾಡಲಾಗಿದೆ. ಇದಕ್ಕೆ ಸಹಕರಿಸಿದ ಎಲ್ಲಾ ಸದಸ್ಯರಿಗೆ ಅಭಿನಂದನೆ ಸಲ್ಲಿಸುತ್ತೇನೆ. ಈ ಪ್ರಶಸ್ತಿಯಿಂದ ಕೆಲಸ ಮಾಡಲು ಮತ್ತಷ್ಟು ಬಲ ಬಂದಂತಾಗಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಅಭಿವೃದ್ಧಿ ಸಾಧಿಸಲಾಗುವುದು ಎಂದು ಹೇಳಿದರು.