ಜಿಲ್ಲೆಯ ಗ್ರಂಥಾಲಯಗಳಿಗೆ 43 ಲಕ್ಷ ಕರ ಬಾಕಿ!

Team Udayavani, Jul 13, 2023, 3:16 PM IST

ಚಿಕ್ಕಬಳ್ಳಾಪುರ: ಜಿಲ್ಲೆಯ ನಗರ, ಸ್ಥಳೀಯ ಸಂಸ್ಥೆಗಳು ವಾರ್ಷಿಕ ಕೋಟ್ಯಂತರ ರೂ. ಆಸ್ತಿ ತೆರಿಗೆಯನ್ನು ಸಾರ್ವಜನಿಕರಿಂದ ವಸೂಲಿ ಮಾಡುತ್ತದೆ. ಆದರೆ ಗ್ರಂಥಾಲಯಗಳಿಗೆ ಪಾವತಿಸಬೇಕಾದ ಕರವನ್ನೇ ಸಮರ್ಪಕವಾಗಿ ಪಾವತಿಸದೇ ಲಕ್ಷಾಂತರ ರೂ. ಬಾಕಿ ಉಳಿಸಿಕೊಂಡಿರುವುದು ಸಾರ್ವ ಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಹೌದು, ಜಿಲ್ಲೆಯಲ್ಲಿನ ನಗರ, ಪಟ್ಟಣಗಳ ವ್ಯಾಪ್ತಿಯಲ್ಲಿ ಓದುಗರಿಗೆ ಜ್ಞಾನ ದೇಗುಲಗಳಾಗಿ ಕಾರ್ಯನಿರ್ವಹಿಸುವ ಸಾರ್ವಜನಿಕ ಗ್ರಂಥಾಲಯಗಳ ನಿರ್ವಹಣೆ ಸಂಪೂರ್ಣ ಸ್ಥಳೀಯ ಸಂಸ್ಥೆಗಳು ಪಾವತಿಸುವ ಕರ ಪಾವತಿ ಮೇಲೆ ನಿಂತಿದ್ದರೂ ಜಿಲ್ಲೆಯಲ್ಲಿ ಮಾತ್ರ ಬರೋಬ್ಬರಿ 43.64 ಲಕ್ಷ ರೂ. ಸೆಸ್‌ನ್ನು ನಗರಸಭೆ, ಪುರಸಭೆ, ಪಪಂಗಳು ಬಾಕಿ ಉಳಿಸಿಕೊಂಡಿರುವುದು ಕಂಡು ಬಂದಿದೆ.

9 ಗ್ರಂಥಾಲಯಗಳು: ಜಿಲ್ಲೆಯಲ್ಲಿ ಗ್ರಾಪಂಗಳ ವ್ಯಾಪ್ತಿಯಲ್ಲಿರುವ ಗ್ರಂಥಾಲಯಗಳನ್ನು ಹೊರತು ಪಡಿಸಿ ಉಳಿದಂತೆ ಪ್ರತಿ ನಗರಸಭೆ, ಪುರಸಭೆ ಹಾಗೂ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿ ತಲಾ ಒಂದೊಂದು ಸಾರ್ವಜನಿಕ ಗ್ರಂಥಾಲಯ ಇದ್ದರೆ, ಜಿಲ್ಲಾಡಳಿತ ಭವನದಲ್ಲಿ ಒಂದು ವಾಚನಾಲಯ ಇದೆ. ಅದೇ ರೀತಿ ಜಿಲ್ಲಾ ಕೇಂದ್ರದ ಕಾರಾಗೃಹ ಹಾಗೂ ಗೌರಿಬಿದನೂರಲ್ಲಿ ತಲಾ ಒಂದು ಸೇವಾ ಗ್ರಂಥಾಲಯಗಳಿದ್ದು ದಿನಪತ್ರಿಕೆ, ವಿದ್ಯುತ್‌ ಬಿಲ್‌, ಕುಡಿಯುವ ನೀರು, ಪುಸ್ತಕ ಖರೀದಿ ಸೇರಿದಂತೆ ವಾರ್ಷಿಕ ಲಕ್ಷಾಂತರ ರೂ. ಅನುದಾನ ಗ್ರಂಥಾಲಯಗಳ ನಿರ್ವಹಣೆಗೆ ಬೇಕಿದೆ.

ನಿರ್ವಹಣೆಗೆ ಹಣಕಾಸಿನ ಸಂಕಷ್ಟ: ಸರ್ಕಾರ ಗ್ರಂಥಾಲಯಗಳ ಅಧಿಕಾರಿ, ಸಿಬ್ಬಂದಿಗೆ ವೇತನ ಕೊಡುವುದು ಬಿಟ್ಟರೆ ಗ್ರಂಥಾಲಯಗಳ ನಿರ್ವಹಣೆಗೆ ನಗರ ಸ್ಥಳೀಯ ಸಂಸ್ಥೆಗಳು ಪಾವತಿಸುವ ಸೆಸ್‌ ಮೇಲೆ ನಿಂತಿದೆ. ಆದರೆ, ನಗರ ಸ್ಥಳೀಯ ಸಂಸ್ಥೆಗಳು ಗ್ರಂಥಾಲಯಗಳಿಗೆ ಸಮರ್ಪಕವಾಗಿ ಸೆಸ್‌ ಪಾವತಿಸದೇ ಇರುವುದು ಜಿಲ್ಲೆಯ ಗ್ರಂಥಾಲಯಗಳ ನಿರ್ವಹಣೆಗೆ ಹಣಕಾಸಿನ ಸಂಕಷ್ಟ ಎದುರಾಗಿದೆ. ಹಲವು ಬಾರಿ ಗ್ರಂಥಾಲಯಗಳ ಅಧಿಕಾರಿಗಳು, ಸಿಬ್ಬಂದಿಗೆ ತಮ್ಮ ಗ್ರಂಥಾಲಯಗಳಿಗೆ ಬರಬೇಕಾದ ಸೆಸ್‌ ಬಿಡುಗಡೆಗಾಗಿ ಸುತ್ತಾಡಿದರೂ ಪ್ರಯೋಜನ ಇಲ್ಲದಂತಾಗಿದೆ.

ನಿರ್ವಹಣೆಗೆ ಬೇಕು ಲಕ್ಷ ಲಕ್ಷ ಹಣ: ಜಿಲ್ಲೆಯಲ್ಲಿ ಸಾರ್ವಜನಿಕ ಗ್ರಂಥಾಲಯಗಳಲ್ಲಿ ಓದುಗರ ಸಂಖ್ಯೆ ವಿಪರೀತವಾಗಿದೆ. ನಿತ್ಯ ಸಾವಿರಾರು ಸಂಖ್ಯೆಯಲ್ಲಿ ಓದುಗರು ಗ್ರಂಥಾಲಯಗಳಿಗೆ ಭೇಟಿ ನೀಡುತ್ತಾರೆ. ಅದರಲ್ಲೂ ನಾಗರಿಕ ಸೇವಾ ಪರೀಕ್ಷೆಗಳಿಗೆ ಸಿದ್ಧರಾಗುವ ಓದುಗರ ಪಡೆ ಜಿಲ್ಲೆಯಲ್ಲಿ ದೊಡ್ಡದಾಗಿದೆ. ಅದಕ್ಕಾಗಿ ಜಿಲ್ಲಾ ಹಾಗೂ ತಾಲೂಕು ಮಟ್ಟದ ಗ್ರಂಥಾಲಯಗಳನ್ನು ಓದುಗರು ನೆಚ್ಚಿಕೊಂಡಿದ್ದಾರೆ. ಆದರೆ, ಗ್ರಂಥಾಲಯಗಳಿಗೆ ದಿನಪತ್ರಿಕೆ, ವಾರ ಪತ್ರಿಕೆಗಳನ್ನು ತರಿಸುವುದರ ಜೊತೆಗೆ ಓದುಗರಿಗೆ ಉಚಿತ ಇಂಟರ್‌ನೆಟ್‌ ಸೌಲಭ್ಯ ಕಲ್ಪಿಸುವುದು, ಇ-ಲೈಬ್ರರಿ ಸೌಲಭ್ಯ, ಪ್ರಚಲಿತ ವಿದ್ಯಮಾನಗಳಿಗೆ ಸಂಬಂಧಿಸಿದ ವಿವಿಧ ವಾರದ ಪುಸ್ತಕಗಳನ್ನು ತರಿಸಲು ಗ್ರಂಥಾಲಯಕ್ಕೆ ಸಾವಿರಾರು ಹಣ ಬೇಕಾಗುತ್ತದೆ. ಜೊತೆಗೆ ಗ್ರಂಥಾಲಯಕ್ಕೆ ಬರುವ ಓದುಗರಿಗೆ ಕುಡಿಯುವ ನೀರಿನ ಸೌಲಭ್ಯ, ವಿದ್ಯುತ್‌ ಬೆಳಕು ಕೊಡಲು ಮಾಸಿಕ ಸಾವಿರಾರು ಹಣ ಬೇಕಾಗುತ್ತದೆ. ‌

ಗ್ರಂಥಾಲಯಗಳಿಗೆ ಕೊಡಬೇಕು ಶೇ.6 ರಷ್ಟು ಸೆಸ್‌: ಜಿಲ್ಲೆಯ ನಗರ ಸ್ಥಳೀಯ ಸಂಸ್ಥೆಗಳು ತನ್ನ ವ್ಯಾಪ್ತಿಯಲ್ಲಿ ಸಾರ್ವಜನಿಕರಿಂದ ವಸೂಲಿ ಮಾಡುವ ಆಸ್ತಿ, ವಾಣಿಜ್ಯ, ಕುಡಿಯುವ ನೀರು ತೆರಿಗೆ ಸೇರಿದಂತೆ ವಿವಿಧ ತೆರಿಗೆಗಳ ವಸೂಲಿಯಲ್ಲಿ ಶೇ.6 ರಷ್ಟು ಕರವನ್ನು ಗ್ರಂಥಾಲಯಗಳಿಗೆಂದು ಕಡ್ಡಾಯವಾಗಿ ಪಾವತಿಸಬೇಕೆಂದು ಸರ್ಕಾರದ ಆದೇಶದಲ್ಲಿ ಸ್ಪಷ್ಟವಾಗಿ ತಿಳಿಸಿದೆ. ಆದರೆ, ಜಿಲ್ಲೆಯ ನಗರ ಸ್ಥಳೀಯ ಸಂಸ್ಥೆಗಳು ಮಾತ್ರ ಸಾರ್ವಜನಿಕರಿಂದ ಕರ ವಸೂಲಿ ಮಾಡಿದರೂ ಗ್ರಂಥಾಲಯಗಳಿಗೆ ಪಾವತಿಸಬೇಕಾದ ಕರದ ವಿಚಾರದಲ್ಲಿ ಮೀನಾಮೇಷ ಎಣಿಸುತ್ತಿವೆ. ಚಿಕ್ಕಬಳ್ಳಾಪುರ ನಗರಸಭೆ ಒಂದೇ ಬರೋಬ್ಬರಿ 12.81 ಲಕ್ಷ ಕರವನ್ನು ಗ್ರಂಥಾಲಯಕ್ಕೆ ಪಾವತಿಸುವುದು ಬಾಕಿ ಉಳಿಸಿಕೊಂಡಿದ್ದರೆ, ಗೌರಿಬಿದನೂರು ನಗರಸಭೆ ಒಟ್ಟು 10.21 ಲಕ್ಷ ರೂ. ಸೆಸ್‌ ಬಾಕಿ ಉಳಿಸಿಕೊಂಡಿದೆ.

ಹಲವು ಗ್ರಂಥಾಲಯಗಳಲ್ಲಿ ಮೂಲ ಸೌಕರ್ಯ ಕೊರತೆ!: ಹಲವು ಗ್ರಂಥಾಲಯಗಳಲ್ಲಿ ಓದುಗರಿಗೆ ಮೂಲ ಸೌಕರ್ಯ ಕೊರತೆ ಎದುರಾಗಿದೆ. ಓದುಗರಿಗೆ ಸೂಕ್ತ ಕುರ್ಚಿ, ಟೇಬಲ್‌ಗ‌ಳ ವ್ಯವಸ್ಥೆ ಆಗಬೇಕು, ಇರುವ ಕೆಲವು ಈಗಾಗಲೇ ಶಿಥಿಲಗೊಂಡಿ ರಿಪೇರಿಗೆ ಎದುರು ನೋಡುತ್ತಿವೆ. ಮತ್ತೆ ಕೆಲವು ಮುರಿದು ಮೂಲೆ ಸೇರಿವೆ. ಕನಿಷ್ಠ ಓದುಗರಿಗೆ ಬೇಕಾದ ಅಗತ್ಯ ಮೂಲ ಸೌಕರ್ಯ ಒದಗಿಸಬೇಕಾದರೆ ನಗರ ಸ್ಥಳೀಯ ಸಂಸ್ಥೆಗಳು ನೀಡುವ ಸೆಸ್‌ನಿಂದ ಅಷ್ಟೇ ಒದಗಿಸಲು ಸಾಧ್ಯ. ಕೆಲವು ಗ್ರಂಥಾಲಯಗಳಲ್ಲಿ ಕನಿಷ್ಠ ಕುಡಿಯುವ ನೀರು ಇಲ್ಲ ಎಂಬ ಆರೋಪ ಗ್ರಂಥಾಲಯ ಓದುಗರಿಂದ ಕೇಳಿ ಬರುತ್ತಿದೆ.

ನಗರ ಸ್ಥಳೀಯ ಸಂಸ್ಥೆಗಳು ನೀಡುವ ಸೆಸ್‌ನಿಂದ ಜಿಲ್ಲೆಯಲ್ಲಿನ ಸಾರ್ವಜನಿಕ ಗ್ರಂಥಾಲಯಗಳನ್ನು ಸಂಪೂರ್ಣವಾಗಿ ನಿರ್ವಹಿಸಬೇಕಿದೆ. ಜಿಲ್ಲೆಯಲ್ಲಿ ಒಟ್ಟು 43.61 ಲಕ್ಷ ರೂ. ಸೆಸ್‌ ಜಿಲ್ಲೆಯ ನಗರ ಸ್ಥಳೀಯ ಸಂಸ್ಥೆಗಳಿಂದ ಗ್ರಂಥಾಲಯ ಇಲಾಖೆಗೆ ಬರಬೇಕಿದೆ. ನಗರ ಸ್ಥಳೀಯ ಸಂಸ್ಥೆಗಳು ವಸೂಲಾತಿ ಮಾಡುವ ಕರದಲ್ಲಿ ಶೇ.6 ರಷ್ಟು ಗ್ರಂಥಾಲಯಗಳಿಗೆ ನೀಡಬೇಕು. ಹಲವು ನಗರಸಭೆಗಳಿಗೆ ಬಾಕಿ ಸೆಸ್‌ ಪಾವತಿಸುವಂತೆ ಪತ್ರ ಬರೆಯಲಾಗಿದೆ. ● ಶಂಕರಪ್ಪ, ಜಿಲ್ಲಾ ಗ್ರಂಥಾಲಯ ಅಧಿಕಾರಿ, ಚಿಕ್ಕಬಳ್ಳಾಪುರ

– ಕಾಗತಿ ನಾಗರಾಜಪ್ಪ