Chikkaballapur: 5 ವರ್ಷದಲ್ಲಿ 514 ತಾಯಿ-ಮಗು ಸಾವಿನ ಪ್ರಕರಣ!

Team Udayavani, Dec 19, 2024, 5:19 PM IST

ಚಿಕ್ಕಬಳ್ಳಾಪುರ: ರಾಜ್ಯಾದ್ಯಂತ ತೀವ್ರ ಆತಂಕ, ಕಳವಳ ಸೃಷ್ಟಿಸಿರುವ ಬಾಣಂತಿಯರ ಸಾವಿನ ಪ್ರಕರಣಗಳ ಬೆನ್ನಲ್ಲೇ ಜಿಲ್ಲೆಯಲ್ಲಿ ಕೂಡ ನೂರಾರು ತಾಯಿ ಮಗು ಸಾವಿನ ಪ್ರಕರಣಗಳು ದಾಲಾಖಲಾಗಿರುವ ಅಘಾತಕಾರಿ ಮಾಹಿತಿ ಸಿಕ್ಕಿದೆ.

ಹೌದು, ಜಿಲ್ಲೆಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಅಧಿಕಾರಿಗಳು ನೀಡಿರುವ ಮಾಹಿತಿ ಪ್ರಕಾರ ಜಿಲ್ಲೆಯಲ್ಲಿ ಕಳೆದ 5 ವರ್ಷದಲ್ಲಿ 79 ಮಂದಿ ಬಾಣಂತಿಯರು ಹಾಗೂ 0-1 ವರ್ಷದೊಳಗಿನ 435 ನವಜಾತ ಶಶಿಗಳು ಕೊನೆಯಸಿರು ಎಳೆದಿರುವುದು ಆರೋಗ್ಯ ಇಲಾಖೆಯನ್ನು ಚಿಂತೆಗೀಡು ಮಾಡಿದೆ. ರಾಜ್ಯದ ರಾಯಚೂರು, ಕೊಪ್ಪಳ, ಬಾಗಲಕೋಟೆ ಮತ್ತಿತರ ಕಡೆಗಳಲ್ಲಿ ಬಾಣಂತಿಯರ ಸರಣಿ ಸಾವು ರಾಜ್ಯಾದ್ಯಂತ ತೀವ್ರ ಚರ್ಚೆ ಹಾಗೂ ಅಘಾತ ತಂದಿದೆ. ಆದರೆ ಬಯಲು ಸೀಮೆ ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲೂ ತಾಯಿ, ಮಗು ಸಾವಿನ ಪ್ರಕರಣಗಳು ದಾಖಲಾಗಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಆತಂಕ ಸೃಷ್ಟಿಸಿದೆ. ಬಹುತೇಕ ಬಾಣಂತಿಯರು ಹಾಗೂ ಮಕ್ಕಳು ಆಸ್ಪತ್ರೆಗಳಲ್ಲಿ ಅಸುನೀಗಿರುವುದು ದುರಂತವಾಗಿದೆ.

ಹೇಳಿ ಕೇಳಿ ಜಿಲ್ಲೆಯು ಇಂದಿಗೂ ಸಾಮಾಜಿಕವಾಗಿ, ಆರ್ಥಿಕವಾಗಿ, ಶೈಕ್ಷಣಿಕವಾಗಿ ಸಾಕಷ್ಟು ಹಿಂದುಳಿದಿದೆ. ಇದರ ಪರಿಣಾಮ ಜಿಲ್ಲೆಯಲ್ಲಿ ಕದ್ದುಮುಚ್ಚಿ ನಡೆಯುವ ಬಾಲ್ಯ ವಿವಾಹ ಪ್ರಕರಣಗಳು, ಪೋಕೊÕà ಪ್ರಕರಣಗಳು, ಬಡತನ, ಅನಕ್ಷರತೆ, ನಿರುದ್ಯೋಗದ ಪರಿಣಾಮ ಕೂಡ ತಾಯಿ, ಮಗು ಸಾವಿನ ಪ್ರಕರಣಗಳಿಗೆ ಮುಖ್ಯ ಕಾರಣವಾಗಿದೆ.

ತಾಯಿ, ಮಗು ಸಾವಿಗೆ ಕಾರಣಗಳೇನು?: ತಾಯಿ ಮಕ್ಕಳ ಸಾವಿನ ಬಗ್ಗೆ ಆರೋಗ್ಯ ಇಲಾಖೆ ಅಧಿಕಾರಿಗಳು ಹೇಳುವುದು ಹೀಗೆ. ಬಾಲ್ಯ ವಿವಾಹಗಳಿಂದ ಈ ರೀತಿಯ ಪ್ರಕರಣಗಳು ಹೆಚ್ಚಾಗುತ್ತಿವೆ. ಜೊತೆಗೆ ಅವಧಿಗೂ ಮೊದಲೇ 9 ತಿಂಗಳ ಬಳಿಕ ಆಗಬೇಕಾದ ಹೆರಿಗೆ 3, 4 ತಿಂಗಳ ಮೊದಲೇ ಹೆರಿಗೆ ಆಗುವುದರಿಂದ ಈ ರೀತಿಯ ಸಾವು ಸಂಭವಿಸಲು ಪ್ರಮುಖ ಕಾರಣ ಎನ್ನುತ್ತಾರೆ ಆರೋಗ್ಯ ಇಲಾಖೆಯ ಹಿರಿಯ ನುರಿತ ವೈದ್ಯರು. ಜೊತೆಗೆ ಅಪೌಷ್ಟಿಕತೆ ಕೊರತೆ, ಮಹಿಳೆಯರನ್ನು ಕಾಡುವ ರಕ್ತದ ಕೊರತೆ ಜೊತೆಗೆ ಕೆಲ ಹೃದಯ ಸಂಬಂಧಿ ಕಾಯಿಲೆಗಳಿಂದ ಕೂಡ ನವಜಾತ ಶಿಶುಗಳು ಸಾವಿಗೆ ಮುಖ್ಯ ಕಾರಣ. ಅಲ್ಲದೇ ಜನನವಾದ ಮಗು ಕನಿಷ್ಠ 1.8 ಕೆ.ಜಿ. ಇರಬೇಕು. ಆದರೆ , ಜನಿಸುವ ಮಕ್ಕಳು ತೂಕ ಕಡಿಮೆ ಇರುವುದರಿಂದ ಮಕ್ಕಳ ಸಾವು ಸಂಭವಿಸಲು ಇದು ಪ್ರಮುಖ ಕಾರಣವಾಗಿದೆ. ಒಟ್ಟಿನಲ್ಲಿ ಜಿಲ್ಲೆಯಲ್ಲಿ ಕೂಡ ತಾಯಿ ಮಗು ಸಾವಿನ ಪ್ರಕರಣಗಳು ಪ್ರತಿ ವರ್ಷ ಜಿಲ್ಲೆಯಲ್ಲಿ ದಾಖಲಾಗುತ್ತಿವೆ. ಕೆಲವೊಂದು ಪ್ರಕರಣಗಳು ಆರೋಗ್ಯ ಇಲಾಖೆ ಗಮನಕ್ಕೆ ಬಾರದೇ ಹೋಗುತ್ತಿವೆ. ಮತ್ತೆ ಕೆಲವು ವೈದ್ಯರ ನಿರ್ಲಕ್ಷ್ಯದಿಂದಲೂ ಕೂಡ ತಾಯಿ, ಮಗು ಸಾವಿನ ಪ್ರಕರಣದಲ್ಲಿ ಜಿಲ್ಲೆಯಲ್ಲಿ ದಾಖಲಾಗಿದ್ದು, ಇತ್ತೀಚೆಗೆ ಜಿಲ್ಲೆಯ ಶಿಡ್ಲಘಟ್ಟ, ಚಿಂತಾಮಣಿ ಹಾಗೂ ಚಿಕ್ಕಬಳ್ಳಾಪುರ ವೈದ್ಯರ ನಿರ್ಲಕ್ಯದದಿಂದ ಗರ್ಭಿಣಿಯರು ಮೃತಪಟ್ಟ ಬಗ್ಗೆ ಅವರ ಪೋಷಕರು ಪ್ರತಿಭಟನೆ ನಡೆಸಿದ್ದನ್ನು ನಾವು ಇಲ್ಲಿ ಸ್ಮರಿಸಬಹುದು.

ಆತಂಕ ಸೃಷ್ಟಿಸಿದ ನವಜಾಶು ಶಿಶುಗಳ ಮರಣ ಸಂಖ್ಯೆ: 

ಜಿಲ್ಲೆಯಲ್ಲಿ ಬಾಣಂತಿಯರ ಸಾವಿಗಿಂತ ನವಜಾಶು ಶಿಶುಗಳ ಮರಣದ ಸಂಖ್ಯೆ ತೀವ್ರವಾಗಿದೆ. ಕಳೆದ 5 ವರ್ಷದಲ್ಲಿ 435 0-1 ವರ್ಷದೊಳಗಿನ ನವಜಾತ ಶಿಶುಗಳು ಕೊನೆಯುಸಿರು ಎಳೆದಿವೆ. ಜಿಲ್ಲೆಯಲ್ಲಿ ಹುಟ್ಟುವ ಮಕ್ಕಳಲ್ಲಿ ತೀವ್ರ ಅಪೌಷ್ಟಿಕತೆ ಜೊತೆಗೆ ಕಡಿಮೆ ತೂಕ ಇರುವ ಮಕ್ಕಳು ಹೆಚ್ಚು ಮರಣ ಹೊಂದಿದ್ದಾರೆ. ಜೊತೆಗೆ ಹೃದಯ ಸಂಬಂಧಿ ಕಾಯಿಲೆಗಳಿಂದ ಹಾಗೂ ರಕ್ತದ ಕೊರತೆಯಿಂದ ಬಹಳಷ್ಟು ಮಕ್ಕಳು ಹುಟ್ಟಿದ ಕೂಡಲೇ ಸಾವಿನ ದಾರಿ ಕಂಡಿದ್ದಾರೆ.

ತಾಯಿ, ಮಗು ಮರಣ ತಡೆಗೆ ಏನು ಮಾಡಬೇಕು? :

ಹೆಣ್ಣು ಮಕ್ಕಳಿಗೆ ಬಾಲ್ಯದಲ್ಲಿಯೆ ವಿವಾಹ ಮಾಡುವುದನ್ನು ನಿಲ್ಲಿಸಬೇಕು. ಗರ್ಭಿಣಿಯರು ಕಾಲಕಾಲಕ್ಕೆ ಕಡ್ಡಾಯವಾಗಿ ವೈದ್ಯರ ಸಲಹೆ ಪಡೆಯುವುದರ ಜೊತೆಗೆ ಆರೋಗ್ಯ ತಪಾಸಣೆಗೆ ಒಳಪಡಬೇಕು, ಗರ್ಭದಲ್ಲಿರುವ ಮಗುವಿನ ತೂಕದ ಪ್ರಮಾಣದ ಬಗ್ಗೆ ವೈದ್ಯರಿಂದ ಮಾಹಿತಿ ಪಡೆಯಬೇಕು, ಗರ್ಭಿಣಿಯರು ಹೆಚ್ಚು ಪೌಷ್ಠಿಕಾಂಶವುಳ್ಳ ಆಹಾರ ಸೇವಿಸಬೇಕು, ಗರ್ಭೀಣಿಯರಿಗೆ ಸೂಕ್ತ ಆರೈಕೆ ಮಾಡಬೇಕು ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಜಿಲ್ಲೆಯಲ್ಲಿ ಕಳೆದ 5 ವರ್ಷದಲ್ಲಿ 79 ಬಾಣಂತಿಯರು ವಿವಿಧ ಕಾರಣಗಳಿಂದ ಮೃತಪಟ್ಟಿದ್ದಾರೆ. ಆ ಪೈಕಿ 30 ಬಾಣಂತಿಯರು ಜಿಲ್ಲೆಯಲ್ಲಿ ಮೃತಪಟ್ಟರೆ, ಉಳಿದ 49 ಬಾಣಂತಿಯರು ಬೆಂಗಳೂರು ಮತ್ತಿತರ ಕಡೆ ಆಸ್ಪತ್ರೆಗಳಿಗೆ ಸಾಗಿಸುವಾಗ ಹೊರ ಜಿಲ್ಲೆಗಳಲ್ಲಿ ಮೃತಪಟ್ಟಿದ್ದಾರೆ. ಇನ್ನೂ 435 ನವಜಾತ ಶಿಶುಗಳು ಕಳೆದ 5 ವರ್ಷಗಳಲ್ಲಿ ಮೃತಪಟ್ಟಿವೆ. ಹಿಂದಿನ ವರ್ಷಗಳಿಂದ ಹೋಲಿಸಿದರೆ ಈ ವರ್ಷದಲ್ಲಿ ಜಿಲ್ಲೆಯಲ್ಲಿ ತಾಯಿ, ಮಕ್ಕಳ ಸಾವಿನ ಪ್ರಕರಣ ಕಡಿಮೆ ಆಗಿದೆ. -ಡಾ.ಎಸ್‌.ಎಸ್‌.ಮಹೇಶ್‌ ಕುಮಾರ್‌, ಜಿಲ್ಲಾ ಆರೋಗ್ಯಾಧಿಕಾರಿಗಳು.

– ಕಾಗತಿ ನಾಗರಾಜಪ್ಪ