ದನಗಳ ವ್ಯಾಪಾರಿ ಕಾರು ಅಡ್ಡಗಟ್ಟಿ ಹಣ ದೋಚಿದ್ದ ಎಂಟು ಮಂದಿ ಕುಖ್ಯಾತ ದರೋಡೆಕೋರರ ಬಂಧನ

Team Udayavani, Feb 17, 2020, 1:15 PM IST

ಚಿಕ್ಕಬಳ್ಳಾಪುರ: ನೆರೆಯ ಅನಂತಪುರದ ದನಗಳ ಸಂತೆಯಲ್ಲಿ ದನಗಳ ಖರೀದಿಗೆ ಕಾರಿನಲ್ಲಿ ತೆರಳುತ್ತಿದ್ದ ಬೆಂಗಳೂರು ಶಿವಾಜಿ ನಗರದ ವ್ಯಾಪಾರಿಗಳನ್ನು ಅಡ್ಡಗಟ್ಟಿ ಲಕ್ಷಾಂತರ ರೂ ಮೌಲ್ಯದ ಹಣ ದೋಚಿ‌ ಪರಾರಿಯಾಗಿದ್ದ 8 ಮಂದಿ ಕುಖ್ಯಾತ ದರೋಡೆಕೋರರನ್ನು ಚಿಕ್ಕಬಳ್ಳಾಪುರ ಗ್ರಾಮಾಂತರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಚಿಕ್ಕಬಳ್ಳಾಪುರ ನಗರದ ಹೊರವಲಯದ ರಾಷ್ಟ್ರೀಯ ಹೆದ್ದಾರಿ 7ರ ಹಾರೋಬಂಡೆ ಸಮೀಪ ಕಳೆದ 26ರಂದು ಬೆಂಗಳೂರಿನ ದನಗಳ ವ್ಯಾಪಾರಿಗಳು ತೆರಳುತ್ತಿದ್ದ ವೇಳೆ ಆರೋಪಿಗಳು ಕಾರನ್ನು ಮಧ್ಯರಾತ್ರಿ ಎರಡು ಗಂಟೆ ಸಮಯದಲ್ಲಿ ಬಂಧಿತರು ಕಾರು ಅಡ್ಡಗಟ್ಟಿ ಚಾಕು ತೋರಿಸಿ ಮೂರು ಲಕ್ಷ ರೂ‌, ಹಣ ದೋಚಿ ಪರಾರಿಯಾಗಿದ್ದರು.

ಬಂಧಿತ ಆರೋಪಿಗಳನ್ನು ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ‌ ಹೊಸಕೋಟೆ ತಾಲೂಕಿನ ಗಿಡ್ನಪ್ಪನಹಳ್ಳಿಯ ಲಾರಿ ಚಾಲಕ ಜಿಯಾವುಲ್ಲಾ ಖಾನ್, ಹೊಸಕೋಟೆ ಕನಕನಗರ ನಿವಾಸಿ ಹಣ್ಣು ವ್ಯಾಪಾರಿ ಯಾರಬ್ ಬೇಗ್, ಸೂಲಿಬೆಲೆ ಹೋಬಳಿಯ ತಮ್ಮರಸನಹಳ್ಳಿ ಟೆಂಪೋ ಚಾಲಕ ಸೈಯದ್ ಪರೀಜ್, ಮತ್ತೊಬ್ಬ ಸಹೀಪ್ ಬೇಗ್, ಟಾಟಾ ಎಸ್ ಚಾಲಕ ಬೆಂಡಗಾನಹಳ್ಳಿಯ ನವಾಜ್ ಬೇಗ್, ಹೋಸಕೋಟೆ ನಗರದ ಜನತಾ ಕಾಲೋನಿಯ ಆಟೋ ಚಾಲಕ ಮಹಮದ್ ಶಾರೂಖ್,  ಶಿಡ್ಲಘಟ್ಟ ನಗರದ ಚಾಲಕ ಸುಹೇಲ್ ಪಾಷ ಹಾಗೂ ಬೆಂಗಳೂರು ನಗರದ ಸರ್ವದೋಯ ನಗರದ ಮಹೇಂದ್ರ ಜೈಲೋ ಕಾರು ಚಾಲಕ ನದೀಮ್ ಪಾಷ ಎಂದು ಗುರುತಿಸಲಾಗಿದೆ.

ಆರೋಪಿಗಳಿಂದ ಎರಡು ಕಾರು, ಒಂದು ಬೈಕ್, ಮೂರು ಮೊಬೈಲ್, ಒಟ್ಟು 1.11 ಲಕ್ಷ ರೂ ನಗದು ವಶಪಡಿಸಿಕೊಳ್ಳಾಗಿದೆ.