ಜಿಲ್ಲಾದ್ಯಂತ ಗೋವಿಂದ ಗೋವಿಂದ ನಾಮಸ್ಮರಣೆ

Team Udayavani, Aug 25, 2019, 3:00 AM IST

ಚಿಕ್ಕಬಳ್ಳಾಪುರ: ಜಿಲ್ಲಾದ್ಯಂತ ಶ್ರಾವಣ ಮಾಸದ ಕೊನೆ ಶನಿವಾರದ ಪ್ರಯುಕ್ತ ಜಿಲ್ಲೆಯ ದೇಗುಲಗಳಲ್ಲಿ ಭಕ್ತಸಾಗರವೇ ನೆರೆದು ಗೋವಿಂದ ಗೋವಿಂದಾ ನಾಮಸ್ಕರಣೆ ಮುಗಿಲು ಮುಟ್ಟಿತ್ತು. ಭಕ್ತರು, ಶ್ರೀವೆಂಕಟೇಶ್ವರನಿಗೆ ವಿಶೇಷ ಪೂಜೆ ಸಲ್ಲಿಸುವ ಮೂಲಕ ಶ್ರಾವಣ ಮಾಸದ ಕಡೆ ಶನಿವಾರವನ್ನು ಭಕ್ತಿಭಾವದಿಂದ ಆಚರಿಸಿದರು.

ಶ್ರಾವಣ ಮಾಸದ ಪ್ರಯುಕ್ತ ದೇವಾಲಯಗಳು ಆಕರ್ಷಕ ಪುಷ್ಪಲಂಕಾರ ಹಾಗೂ ವಿದ್ಯುತ್‌ ದೀಪಾಲಂಕಾರದೊಂದಿಗೆ ಕಂಗೊಳಿಸುತ್ತಿದ್ದವು. ಕುಟುಂಬ ಸಮೇತರಾಗಿ ಭಕ್ತರು ದೇಗುಲಗಳಿಗೆ ಆಗಮಿಸಿ ವಿಶೇಷ ಪೂಜೆ, ಅಭಿಷೇಕದ ಜೊತೆಗೆ ಹಲವು ಹರಿಕೆಗಳನ್ನು ಹೊತ್ತು ಕುಟುಂಬಸ್ಥರ ಹೆಸರಿನಲ್ಲಿ ಅರ್ಚನೆ, ಹೋಮ ನಡೆಸಿ ದೇವರ ಕೃಪೆಗೆ ಪಾತ್ರರಾದರು.

ಜಿಲ್ಲಾದ್ಯಂತ ನಿರೀಕ್ಷೆಗೂ ಮೀರಿ ದೇವಾಲಯಗಳಿಗೆ ಭ‌ಕ್ತ ಜನ ಸಾಗರವೇ ಹರಿದು ಬಂದು ವಿಶೇಷ ಪೂಜೆ ಕೈಂಕರ್ಯಗಳಲ್ಲಿ ತೊಡಗಿದ್ದರು. ಅದರಲ್ಲೂ ಮಹಿಳೆಯರು ಅತ್ಯಂತ ಶ್ರದ್ದಾ ಭಕ್ತಿಯಿಂದ ಆಚರಿಸಿದರು.

ಗೋಪೂಜೆ ಸೇವೆ: ಬೆಳಗ್ಗೆ ದೇವಾಲಯಗಳಲ್ಲಿ ಘಂಟಾನಾದ, ಸುಪ್ರಭಾತ ಸೇವೆ, ಪಂಚಾಮೃತ ಅಭಿಷೇಕ, ಗೋಪೂಜೆ ಸೇವೆ ನೇರವೇರಿಸಲಾಯಿತು. ಪಂಚಾಮೃತ ಅಭಿಷೇಕ ಸೇರಿದಂತೆ ಹಲವು ದೇವಾಲಯಗಳಲ್ಲಿ ವಾಡಿಕೆ ಹಾಗೂ ಸಂಪ್ರದಾಯದಂತೆ ನವನವೀನ ರೀತಿಯಲ್ಲಿ ಅಲಂಕಾರ ಮಾಡಿ ಭಕ್ತರ ಗಮನ ಸೆಳೆಯಲಾಯಿತು.

ದರ್ಶನ: ಜಿಲ್ಲೆಯ ಐತಿಹಾಸಿಕ ಶ್ರೀನಿವಾಸ ಸಾಗರ, ಜಿಲ್ಲಾ ಕೇಂದ್ರದ ಕಂದವಾರಪೇಟೆಯಲ್ಲಿರುವ ವೆಂಕಟೇಶ್ವರಸ್ವಾಮಿ, ಮುನಿಸಿಪಲ್‌ ಲೇಔಟ್‌ನ ಅಭಯಾಂಜನೇಸ್ವಾಮಿ, ನಂದಿಯ ಬೋಗನಂದೀಶ್ವರ, ರಂಗಸ್ಥಳದ ರಂಗನಾಥ ಸ್ವಾಮಿ ದೇವಾಲಯ ಸೇರಿದಂತೆ ಜಿಲ್ಲೆಯ ಹಲವು ಪುರಾತನ ದೇವಾಲಯಗಳಲ್ಲಿ ವೆಂಕಟರವಣಸ್ವಾಮಿ ದೇವರ ದರ್ಶನಕ್ಕೆ ಸಹಸ್ರಾರು ಸಂಖ್ಯೆಯಲ್ಲಿ ಭ‌ಕ್ತರು ಆಗಮಿಸಿದ್ದರು. ದೇವಾಲಯ ಸಮಿತಿಯಿಂದ ಭ‌ಕ್ತರಿಗೆ ಅನ್ನಸಂತರ್ಪಣೆ ಏರ್ಪಡಿಸಲಾಗಿತ್ತು.

ದೇವಾಲಯಗಳಿಗೆ ತಳಿರು ತೋರಣ: ಶ್ರಾವಣ ಮಾಸದ ಪ್ರಯುಕ್ತ ಶನಿವಾರ ಜಿಲ್ಲೆಯಲ್ಲಿ ಹಬ್ಬದ ವಾತಾವರಣ ಕಂಡು ಬಂತು. ದೇವಾಲಯಗಳು ತಳಿರು, ತೋರಣಗಳಿಂದ ಕಂಗೊಳಿಸಿದವು. ಭಕ್ತರನ್ನು ಕೈ ಬೀಸಿ ಕರೆಯುವ ಸ್ವಾಗತ ಫ‌ಲಕಗಳು ಅಲ್ಲಲ್ಲಿ ರಾರಾಜಿಸಿದವು. ದೇವಾಲಯಗಳಿಗೆ ಭಕ್ತರ ಆಗಮನಕ್ಕಾಗಿಯೇ ವಿಶೇಷ ವಾಹನ ಸೌಕರ್ಯಗಳನ್ನು ಮಾಡಲಾಗಿತ್ತು. ನಗರ ಹಾಗೂ ಗ್ರಾಮಾಂತರ ಪ್ರದೇಶದಲ್ಲಿ ಮಕ್ಕಳು ಸಂಪ್ರದಾಯಕವಾಗಿ ಮನೆ ಮನೆಗೆ ತೆರಳಿ ಗೋವಿಂದ ನಾಮಸ್ಮರಣೆ ಮಾಡಿ ಭಿಕ್ಷೆಯ ರೂಪದಲ್ಲಿ ಅಕ್ಕಿ, ಬೇಳೆ ಸಂಗ್ರಹಿಸಿದರು.