ಜನರಿಕ್‌ ಔಷಧ ಮಳಿಗೆ ಬಂದ್‌ಗೆ ಸೂಚನೆ

Team Udayavani, Sep 15, 2017, 12:27 PM IST

ಚಿಕ್ಕಮಗಳೂರು: ನಗರದ ಜಿಲ್ಲಾ ಆಸ್ಪತ್ರೆ ಆವರಣದಲ್ಲಿ ತೆರೆಯಲಾಗಿರುವ ಜನರಿಕ್‌ ಔಷಧ ಮಳಿಗೆಯನ್ನು ಮುಚ್ಚಿಸಲು ಕೂಡಲೆ ಕ್ರಮ ಕೈಗೊಳ್ಳುವಂತೆ ಜಿಲ್ಲಾ ಉಸ್ತುವಾರಿ ಸಚಿವ ರೋಷನ್‌ ಬೇಗ್‌ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿಗೆ ಸೂಚಿಸಿದರು.ಶುಕ್ರವಾರ ಮಧ್ಯಾಹ್ನ ದಿಢೀರನೆ ಜಿಲ್ಲಾಸ್ಪತ್ರೆಗೆ ಭೇಟಿ ನೀಡಿದ ಸಚಿವರು, ಜನರಿಕ್‌ ಔಷಧ ಮಳಿಗೆಗೆ ಭೇಟಿ ನೀಡಿ ಪರಿಶೀಲಿಸಿದರು. 

ಅಲ್ಲಿ ಜನರಿಕ್‌ ಔಷಧಗಳಿಗಿಂತಲೂ ಹೆಚ್ಚಾಗಿ ಪ್ರಮುಖ ಕಂಪನಿಗಳ ಔಷಧಗಳ ದಾಸ್ತಾನು ಇರುವುದನ್ನು ಕಂಡು ಈ ಬಗ್ಗೆ ಔಷಧ ಮಳಿಗೆಯವರನ್ನು ವಿಚಾರಿಸಿದರು. ಇಲ್ಲಿಗೆ ಬರುವವರು ಪ್ರಮುಖ ಕಂಪನಿಗಳ ಔಷಧಗಳೇಬೇಕೆಂದು ಕೇಳುವುದರಿಂದ ಪ್ರಮುಖ ಔಷಧ ಕಂಪನಿಗಳ ಕೆಲವೊಂದು ಔಷಧಗಳನ್ನು ಇಟ್ಟಿರುವುದಾಗಿ ಅಂಗಡಿಯವರು ತಿಳಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಶಾಸಕ ಸಿ.ಟಿ.ರವಿ, ಜನರಿಕ್‌ ಔಷಧ ಮಳಿಗೆಗಳನ್ನು ಸರ್ಕಾರ ತೆರೆದಿರುವುದೇ ಬಡ ಜನತೆಗೆ ಕಡಿಮೆ ಹಣದಲ್ಲಿ ಗುಣಮಟ್ಟದ ಔಷಧಗಳು ದೊರೆಯಲಿ ಎಂದು. ಇಂತಹ ಕಡೆ ದುಬಾರಿ ಬೆಲೆಯ ಔಷಧಗಳನ್ನು
ಮಾರಾಟ ಮಾಡಿದರೆ ಸರ್ಕಾರದ ಯೋಜನೆ ಯಶಸ್ವಿಯಾಗಲು ಹೇಗೆ ಸಾಧ್ಯ ಎಂದು ಪ್ರಶ್ನಿಸಿದರು.

ಇವುಗಳನ್ನು ಶಾಸಕರು, ಸಚಿವರು ಬಂದು ನೋಡಿ ಹೇಳಬೇಕೆ, ನೀವೇನು ಮಾಡುತ್ತಿದ್ದೀರಿ ಎಂದು ಸಚಿವರು ಜಿಲ್ಲಾ ಸರ್ಜನ್‌ ಡಾ| ದೊಡ್ಡಮಲ್ಲಪ್ಪ ಅವರನ್ನು ಪ್ರಶ್ನಿಸಿದರು. ತಾವು ಸಹ ಈ ಬಗ್ಗೆ ನೋಡಿ ಕ್ರಮ ಕೈಗೊಳ್ಳುವಂತೆ ಡಿಎಚ್‌
ಒಗೆ ಪತ್ರ ಬರೆದಿರುವುದಾಗಿ ಜಿಲ್ಲಾ ಸರ್ಜನ್‌ ತಿಳಿಸಿದರು.

ಕೂಡಲೇ ಸ್ಥಳಕ್ಕೆ ಡಿಎಚ್‌ಒ ಅವರನ್ನು ಕರೆಸಿದ ಸಚಿವರು, ಜನರಿಕ್‌ ಔಷಧ ಮಳಿಗೆಯಲ್ಲಿ ಪ್ರಮುಖ ಕಂಪನಿಗಳ ದುಬಾರಿ ಬೆಲೆಯ ಔಷಧಗಳನ್ನು ಮಾರಾಟ ಮಾಡುತ್ತಿರುವುದರಿಂದ ಕೂಡಲೇ ಈ ಮಳಿಗೆಯನ್ನು ಮುಚ್ಚಿಸಿ ಬೇರೆಯವರಿಗೆ ವಹಿಸಲು ಕ್ರಮ ಕೈಗೊಳ್ಳುವಂತೆ ಸೂಚಿಸಿದರು.

ಶೌಚಾಲಯದಲ್ಲಿ ನೀರಿಲ್ಲ: ಜಿಲ್ಲಾಆಸ್ಪತ್ರೆಯ ಹೊರರೋಗಿಗಳ ವಿಭಾಗದ ಶೌಚಾಲಯಕ್ಕೆ ಭೇಟಿ ನೀಡಿ ಪರಿಶೀಲಿಸಿದಾಗ, ಶೌಚಾಲಯದಲ್ಲಿ ನೀರು ಇಲ್ಲದಿರುವುದು ಕಂಡು ಬಂದಿತು. ಈ ಬಗ್ಗೆ ಜಿಲ್ಲಾ ಸರ್ಜನ್‌ ಅವರನ್ನು ವಿಚಾರಿಸುತ್ತಿದ್ದ ಸಂದರ್ಭದಲ್ಲಿಯೇ ಪಕ್ಕದ ಮತ್ತೂಂದು ಶೌಚಾಲಯದಿಂದ ಯುವಕನೋರ್ವ ಹೊರಗೆ ಬಂದನು. ಅಲ್ಲಿ ನೀರು ಇದೆಯೇ ಎಂದು ಸಚಿವರು ಆ ಯುವಕನನ್ನು ಪ್ರಶ್ನಿಸಿದಾಗ, ಆತ ಇಲ್ಲ ಸಾರ್‌ ಇಲ್ಲಿಯೂ ನೀರಿಲ್ಲ ಎಂಬ ಉತ್ತರ ನೀಡಿದರು.

ತುರ್ತು ಚಿಕಿತ್ಸಾ ಘಟಕಕ್ಕೆ ಭೇಟಿ ನೀಡಿದ ಸಚಿವರು, ಅಲ್ಲಿ ದಾಖಲಾಗಿದ್ದ ಪ್ರತಿಯೊಬ್ಬ ರೋಗಿಯನ್ನೂ ಮಾತನಾಡಿಸಿದರು. ಆಸ್ಪತ್ರೆಗೆ ದಾಖಲಾಗಿದ್ದು ಯಾವಾಗ, ಸರಿಯಾಗಿ ನೋಡಿಕೊಳ್ಳುತ್ತಿರುವರೆ, ಔಷಧವನ್ನು ಇಲ್ಲಿಯೇ
ಕೊಡುತ್ತಿದ್ದಾರೊ ಅಥವಾ ಹೊರಗಡೆಯಿಂದ ತರಲು ಚೀಟಿ ಬರೆದುಕೊಡುತ್ತಿರುವರೋ ಎಂಬ ಪ್ರಶ್ನೆಗಳನ್ನು ಪ್ರತಿಯೊಬ್ಬರಲ್ಲಿಯೂ ಕೇಳಿ ಉತ್ತರ ಪಡೆದುಕೊಂಡರು.

ಧೈರ್ಯದಿಂದ ಎದುರಿಸು: ತುರ್ತು ಚಿಕಿತ್ಸಾ ಘಟಕದಲ್ಲಿ ದಾಖಲಾಗಿದ್ದ ಓರ್ವ ಯುವಕನು ಇಲಿ ಪಾಶಾಣ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾನೆ ಎಂಬುದನ್ನು ತಿಳಿದು ಬೇಸರ ವ್ಯಕ್ತಪಡಿಸಿದ ಸಚಿವರು, ಜೀವನದಲ್ಲಿ ಕೆಟ್ಟದ್ದು, ಒಳ್ಳೆಯದು
ಎಲ್ಲವೂ ಆಗುತ್ತದೆ. ಅದಕ್ಕೆ ಧೃತಿಗೆಡಬಾರದು. ಏನೇ ಬಂದರೂ ಅದನ್ನು ಧೈರ್ಯದಿಂದ ಎದುರಿಸಬೇಕು.ಎಲ್ಲದಕ್ಕೂ ಆತ್ಮಹತ್ಯೆಯೇ ಪರಿಹಾರವಲ್ಲ ಎಂದು ಯುವಕನಿಗೆ ತಿಳಿ ಹೇಳಿದರು. ಆಸ್ಪತ್ರೆಯಲ್ಲಿ ವೆಂಟಿಲೇಟರ್‌ ಇದ್ದರೂ ಪ್ರಯೋಜನವಾಗುತ್ತಿಲ್ಲ. ಸಿಟಿ ಸ್ಕ್ಯಾನ್  ಇಲ್ಲ, ಎಂ.ಆರ್‌.ಐ. ಸ್ಕ್ಯಾನಿಂಗ್ ಇಲ್ಲ ಎಂಬ ಮಾಹಿತಿ ಪಡೆದ ಸಚಿವರು, ವೆಂಟಿಲೇಟರ್‌ ಬಳಕೆಯಾಗದ ಬಗ್ಗೆ ಜಿಲ್ಲಾ ಸರ್ಜನ್‌ ಅವರನ್ನು ಪ್ರಶ್ನಿಸಿದಾಗ, ಅವರು ಆಸ್ಪತ್ರೆಯಲ್ಲಿ ವೈದ್ಯರ ಹುದ್ದೆ ಸಾಕಷ್ಟು ಖಾಲಿ ಇದೆ. ಇದರಿಂದ ವೆಂಟಿಲೇಟರ್‌ ನೋಡಿಕೊಳ್ಳಲು ಆಗುತ್ತಿಲ್ಲ ಎಂದು ಉತ್ತರಿಸಿದರು.

ಆಸ್ಪತ್ರೆಯಲ್ಲಿ ಖಾಲಿ ಇರುವ ಹುದ್ದೆಗಳ ವಿವರ, ಆಸ್ಪತ್ರೆಗೆ ಅವಶ್ಯಕವಿರುವ ಪದಾರ್ಥಗಳು, ಸೌಲಭ್ಯಗಳ ಸಮಗ್ರ ವರದಿ ನೀಡಿ, ತಾವು ಆರೋಗ್ಯ ಸಚಿವರೊಂದಿಗೆ ಚರ್ಚಿಸಿ ಸೂಕ್ತ ಕ್ರಮ ಕೈಗೊಳ್ಳುವುದಾಗಿ ಹೇಳಿದರು.

ಮಾಜಿ ಶಾಸಕಿ ಎ.ವಿ. ಗಾಯತ್ರಿಶಾಂತೇಗೌಡ, ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಡಾ| ಡಿ.ಎಲ್‌. ವಿಜಯ್‌ಕುಮಾರ್‌, ಜಿಲ್ಲಾಧಿಕಾರಿ ಜಿ. ಸತ್ಯವತಿ, ಜಿಲ್ಲಾ ರಕ್ಷಣಾಧಿಕಾರಿ ಕೆ. ಅಣ್ಣಾಮಲೈ ಇದ್ದರು.