ಪಲ್ಸ್ ಪೋಲಿಯೋ ಕಾರ್ಯಕ್ರಮಕ್ಕೆ ಸಿದ್ಧರಾಗಿ

Team Udayavani, Jan 15, 2020, 4:55 PM IST

ಎನ್‌.ಆರ್‌.ಪುರ: ಜನವರಿ 19 ರಂದು ನಡೆಯುವ ಪಲ್ಸ್‌ ಪೋಲಿಯೋ ಕಾರ್ಯಕ್ರಮಕ್ಕೆ ಎಲ್ಲಾ ಸರ್ಕಾರಿ ವಾಹನ ಹಾಗೂ ಖಾಸಗಿ ವಾಹನ ನೀಡಬೇಕು ಎಂದು ತಹಶೀಲ್ದಾರ್‌ ನಾಗರಾಜ್‌ ಸೂಚಿಸಿದರು. ಮಂಗಳವಾರ ತಾಲೂಕು ಕಚೇರಿ ಆವರಣದಲ್ಲಿ ಜನವರಿ 19ರಂದು ನಡೆಯುವ ಪಲ್ಸ್‌ ಪೊಲೀಯೋ ಕಾರ್ಯಕ್ರಮದ ಪ್ರಯುಕ್ತ ಹಮ್ಮಿಕೊಂಡಿದ್ದ ಪೂರ್ವಭಾವಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಎಲ್ಲಾ ಶಾಲೆಗಳಲ್ಲಿ ಮಕ್ಕಳಿಗೆ ಜನವರಿ 19 ರಂದು ನಡೆಯುವ ಪಲ್ಸ್‌ ಪೋಲಿಯೋ ಬಗ್ಗೆ ಮಾಹಿತಿ ನೀಡಿದರೆ ಮಕ್ಕಳು ಪೋಷಕರಿಗೆ ತಿಳಿಸುತ್ತಾರೆ. ಇದರಿಂದ ಹೆಚ್ಚು ಪ್ರಚಾರವಾಗಲಿದೆ. ಜನವರಿ 19,20 ಹಾಗೂ 21 ರಂದು ಪಲ್ಸ್‌ ಪೋಲಿಯೋ ಕಾರ್ಯಕ್ರಮ ನಡೆಯುವುದರಿಂದ 3 ದಿನಗಳ ಕಾಲ ಊಟದ ವ್ಯವಸ್ಥೆ ಆಗಬೇಕಾಗಿದೆ. ಈ ಬಗ್ಗೆ ತಾಲೂಕಿನ 14 ಗ್ರಾಮ ಪಂಚಾಯ್ತಿಗಳ ಪಿಡಿಒಗಳಿಗೆ ಸೂಚಿಸಬೇಕು ಎಂದು ತಾಲೂಕು ಪಂಚಾಯ್ತಿ ಅಧಿಕಾರಿಗಳಿಗೆ ಸೂಚಿಸಿದರು.

ಅಧಿಕೃತವಾಗಿ ಸರ್ಕಾರಿ ಆಸ್ಪತ್ರೆಯಲ್ಲಿ ಉದ್ಘಾಟನೆ ನಡೆಯಲಿದೆ. ಈಗಾಗಲೇ ಆಸ್ಪತ್ರೆಗಳಿಗೆ ಲಸಿಕೆ ಬಂದಿರುವುದರಿಂದ ಇನ್ನು ಮುಂದೆ ನಿರಂತರವಾಗಿ ವಿದ್ಯುತ್‌ ನೀಡಲು ಕೆಇಬಿಗೆ ಪತ್ರ ಬರೆಯಲಾಗುವುದು ಎಂದರು. ತಾಲೂಕು ವೈದ್ಯಾಧಿಕಾರಿ ಡಾ| ವೀರಪ್ರಸಾದ್‌ ಪ್ರಾಸ್ತಾವಿಕವಾಗಿ ಮಾತನಾಡಿ, 1995ರಿಂದ
ನಿರಂತರವಾಗಿ ಪಲ್ಸ್‌ ಪೋಲಿಯೋ ಕಾರ್ಯಕ್ರಮ ನಡೆಯುತ್ತಾ ಬಂದಿದೆ. ಆರೋಗ್ಯ ಇಲಾಖೆಗೆ ಎಲ್ಲಾ ಇಲಾಖೆಯವರು ಸಹಕಾರ ನೀಡುತ್ತಾ ಬಂದಿದ್ದಾರೆ. ಜನವರಿ 19 ರಂದು ಹುಟ್ಟಿದ ಮಗುವಿನಿಂದ 5 ವರ್ಷದೊಳಗಿನ ಎಲ್ಲಾ ಮಕ್ಕಳಿಗೆ 2 ಹನಿ ಲಸಿಕೆ ಹಾಕಲಾಗುವುದು. 20 ರಂದು ಲಸಿಕೆ ಬಿಟ್ಟು ಹೋದ ಮಕ್ಕಳನ್ನು ಹುಡುಕಿ ಲಸಿಕೆ ಹಾಕಲಾಗುವುದು. 21 ರಂದು ಬಸ್ಸು ನಿಲ್ದಾಣ ಹಾಗೂ ಇತರೆ ಕಡೆಗಳಲ್ಲಿ ಮಕ್ಕಳಿಗೆ ಲಸಿಕೆ ಹಾಕಲಾಗುವುದು ಎಂದರು.

ತಾಲೂಕಿನ 95 ಪಲ್ಸ್‌ ಪೋಲಿಯೋ ಬೂತ್‌ ಗಳಿವೆ. ಪಟ್ಟಣ ವ್ಯಾಪ್ತಿಯಲ್ಲಿ ಬಸ್ಸು ನಿಲ್ದಾಣ, ಆಸ್ಪತ್ರೆ ಹಾಗೂ ಗಣಪತಿ ಪೆಂಡಾಲ್‌ ಸೇರಿ 3 ಲಸಿಕಾ ಕೇಂದ್ರಗಳಿವೆ. ಒಟ್ಟು 380 ವ್ಯಾಕ್ಸಿಲೀಟರ್‌ ಗಳಿದ್ದಾರೆ. 20 ಜನ ಮೇಲ್ವಿಚಾರಕರಿದ್ದಾರೆ. 5274 ಮಕ್ಕಳನ್ನು ಗುರುಸಲಾಗಿದೆ. ಪಲ್ಸ್‌ ಪೋಲಿಯೋ
ಕಾರ್ಯಕ್ರಮದಲ್ಲಿ 69 ಆಶಾ ಕಾರ್ಯಕರ್ತರು, 131 ಅಂಗನವಾಡಿ ಕಾರ್ಯಕರ್ತೆಯರು, 180 ಸೇವಾ ಕಾರ್ಯಕರ್ತರು ಪಾಲ್ಗೊಳ್ಳಲಿದ್ದಾರೆ. 15 ಸರ್ಕಾರಿವಾಹನಗಳನ್ನು ಬಳಸಿಕೊಳ್ಳುತ್ತೇವೆ ಎಂದರು.

ಸಭೆಯಲ್ಲಿ ಬಾಳೆಹೊನ್ನೂರು ಪ್ರಾಥಮಿಕ ಆರೋಗ್ಯ ಕೇಂದ್ರದ ಆಡಳಿತಾಧಿಕಾರಿ ಡಾ| ಎಲ್ದೋಸ್‌, ಮುತ್ತಿನಕೊಪ್ಪ ಪ್ರಾಥಮಿಕ ಆರೋಗ್ಯ ಕೇಂದ್ರದ ಆಡಳಿತಾಧಿಕಾರಿ ಡಾ| ಸುರೇಶ್‌, ಸಿ.ಡಿ.ಪಿ.ಓ. ಧನಂಜಯ ಮೇಧೂರ, ತಾಲೂಕು ಪಂಚಾಯ್ತಿಯ ಪ್ರೇಮ್‌ ಕುಮಾರ್‌, ಪಟ್ಟಣ ಪಂಚಾಯ್ತಿಯ ಅಧಿಕಾರಿ ಲಕ್ಷ್ಮಣಗೌಡ, ಶಿಕ್ಷಣ ಇಲಾಖೆಯ ಗುರುಮೂರ್ತಿ, ಕೃಷಿ ಇಲಾಖೆಯ ಪ್ರಕಾಶ್‌, ಹಿರಿಯ ಆರೋಗ್ಯ ನಿರೀಕ್ಷಿಕ ಪಿ.ಪ್ರಭಾಕರ್‌, ತಾಲೂಕು ಆರೋಗ್ಯ ಶಿಕ್ಷಣಾಧಿಕಾರಿ ಲಲಿತ, ಆರೋಗ್ಯ ಇಲಾಖೆಯ ಸಿಸ್ಟರ್‌ ಅಣ್ಣಮ್ಮ, ಸೋಷಿಯಲ್‌ ವೆಲ್‌ ಪೇರ್‌ ಸೊಸೈಟಿಯ ಪ್ರಭಾಕರ್‌, ಸಮಾಜ ಕಲ್ಯಾಣ ಇಲಾಖೆಯ ಶ್ರೀವಲ್ಲಿ ಮತ್ತಿತರರು ಪಾಲ್ಗೊಂಡಿದ್ದರು. ಹಿರಿಯ ಆರೋಗ್ಯ ನಿರಿಕ್ಷಿಕ ಪಿ.ಪಿ.ಬೇಬಿ ಸ್ವಾಗತಿಸಿ, ಪಿ.ಪ್ರಭಾಕರ್‌ ವಂದಿಸಿದರು.