ವಿಧಾನಸಭಾ ಚುನಾವಣೆ: ಶಾರದಾ ಪೀಠಕ್ಕೆ ವಿವಿಧ ರಾಜಕೀಯ ನಾಯಕರ ಭೇಟಿ

Team Udayavani, Apr 14, 2023, 8:20 AM IST

ಶೃಂಗೇರಿ: ವಿಧಾನಸಭಾ ಚುನಾವಣೆಗೆ ಟಿಕೆಟ್‌ ಘೋಷಣೆಯಾಗುತ್ತಿದ್ದಂತೆ ಶ್ರೀ ಶಾರದಾ ಪೀಠಕ್ಕೆ ರಾಜಕೀಯ ನಾಯಕರು ಬೆನ್ನುಬೆನ್ನಿಗೆ ಆಗಮಿಸಿ, ಪೂಜೆ ಸಲ್ಲಿಸುತ್ತಿದ್ದಾರೆ.

ಬುಧವಾರ ಮಾಜಿ ಸಚಿವ ಎಚ್‌.ಡಿ. ರೇವಣ್ಣ ಆಗಮಿಸಿ ಪೂಜೆ ಸಲ್ಲಿಸಿದ್ದರು. ಗುರುವಾರ ಗೃಹ ಸಚಿವ ಆರಗ ಜ್ಞಾನೇಂದ್ರ ಗ್ರಾಮೀಣ ಭಾಗದ ಮಕ್ಕಿಮನೆ ಶ್ರೀ ಬನಶಂಕರಿ ದೇವಸ್ಥಾನಕ್ಕೆ ಸಂಜೆ ಆಗಮಿಸಿ, ಪೂಜೆ ಸಲ್ಲಿಸಿದರು. ಗುರುವಾರ ರಾತ್ರಿ ಶ್ರೀಮಠದಲ್ಲಿ ವಾಸ್ತವ್ಯ ಹೂಡಲಿರುವ ಸಚಿವರು ಶುಕ್ರವಾರ ವಿಶೇಷ ಪೂಜೆ, ಹೋಮ- ಹವನಾದಿಯಲ್ಲಿ ಭಾಗವಹಿಸಲಿದ್ದಾರೆ.

ದೇವಸ್ಥಾನದಲ್ಲಿ ಸಚಿವರನ್ನು ಅರ್ಚಕ ವೆಂಕಟೇಶಮೂರ್ತಿ ಭಟ್ಟರು ಗೌರವಿಸಿದರು. ಬಿಜೆಪಿ ಮುಖಂಡರಾದ ಹಂಚಲಿ ಕೃಷ್ಣಮೂರ್ತಿ ರಾವ್‌, ರಾಘವೇಂದ್ರ, ನಾಗೇಶ್‌, ಕೆ.ಆರ್‌. ನಾಗೇಂದ್ರ ಮೊದಲಾದವರು ಇದ್ದರು.

ರಾಜ್ಯದ ವಿವಿಧ ಭಾಗದಿಂದ ಸ್ಪರ್ಧೆಗೆ ಇಳಿದಿರುವ ಅಭ್ಯರ್ಥಿಗಳು ಶ್ರೀಮಠಕ್ಕೆ ಆಗಮಿಸಲಿದ್ದಾರೆ.