ಗ್ರಾಮಗಳ ಸಮಸ್ಯೆ ಬಗೆಹರಿಸಿ

Team Udayavani, Jul 27, 2019, 12:44 PM IST

ಚಿಂಚೋಳಿ: ಚಿಮ್ಮನಚೋಡ ಗ್ರಾಮದಲ್ಲಿ ದಲಿತ ಸೇನೆ ಕಾರ್ಯಕರ್ತರು ವಿವಿಧ ಬೇಡಿಕೆಗಳ ಈಡೇರಿಕೆಗೆ ಒತ್ತಾಯಿಸಿ ರಸ್ತೆ ತಡೆ ನಡೆಸಿದರು. ಬಂಡಪ್ಪ ಯಂಗನೋರ, ಜಗದೇವ ಗೌತಮ, ಬಸವರಾಜ ಇದಲಾಯಿ ಇನ್ನಿತರರಿದ್ದರು.

ಚಿಂಚೋಳಿ: ತಾಲೂಕಿನ ಚಿಮ್ಮನಚೋಡ ಜಿಪಂ ವ್ಯಾಪ್ತಿಯಲ್ಲಿ ಬರುವ ಗ್ರಾಮಗಳು ಎದುರಿಸುತ್ತಿರುವ ಸಮಸ್ಯೆಗಳನ್ನು ಬಗೆಹರಿಸಲು ಹಾಗೂ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಒತ್ತಾಯಿಸಿ ತಾಲೂಕು ದಲಿತ ಸೇನೆ ಮುಖಂಡರು ಚಿಂಚೋಳಿ-ಹುಮನಾಬಾದ ರಾಜ್ಯ ಹೆದ್ದಾರಿ ಮೇಲೆ ರಸ್ತೆ ತಡೆ ನಡೆಸಿ ಸರಕಾರಕ್ಕೆ ಮನವಿ ಪತ್ರ ಸಲ್ಲಿಸಿದರು.

ದಲಿತ ಮುಖಂಡ ಜಿಲ್ಲಾ ಉಪಾಧ್ಯಕ್ಷ ಜಗದೇವ ಗೌತಮ ಮಾತನಾಡಿ, ಚಿಮ್ಮನಚೋಡ ವಲಯದಲ್ಲಿ ವಿದ್ಯುತ್‌ ಸಂಪರ್ಕದಲ್ಲಿ ಆಗುತ್ತಿರುವ ತೊಂದರೆಯಿಂದಾಗಿ ಗ್ರಾಮಗಳು ಕತ್ತಲೆಯಲ್ಲಿ ಕಾಲ ಕಲೆಯುವಂತಾಗಿದೆ. ಅಲ್ಲದೇ ಜನರಿಗೆ ಕುಡಿಯಲು ನೀರು ಪೂರೈಕೆ ಆಗುತ್ತಿಲ್ಲ. ಇಲ್ಲಿ 33 ಕೆ.ವಿ ಉಪ ಕೇಂದ್ರ ಇದ್ದರೂ ಇಲ್ಲದಂತಾಗಿದೆ. ಕೆಳದಂಡೆ ಮುಲ್ಲಾಮಾರಿ ನೀರಾವರಿ ಯೋಜನೆ ಅಡಿಯಲ್ಲಿ ಜಮೀನು ಕಳೆದುಕೊಂಡ ನಿರಾಶ್ರಿತರ ಜಮೀನುಗಳಲ್ಲಿ ಎಸ್‌.ಸಿ.ಪಿ ಮತ್ತು ಟಿಎಸ್‌ಪಿ ಯೋಜನೆ ಅಡಿಯಲ್ಲಿ ಕೊಳವೆ ಬಾವಿ ಕೊರೆಯಲಾಗಿದೆ. ಆದರೆ ಕೊಳವೆ ಬಾವಿಗಳು ವಿಫಲ ಆಗಿರುವುದರಿಂದ ರೈತರಿಗೆ ಯಾವುದೇ ಪ್ರಯೋಜನ ಆಗಿಲ್ಲ ಎಂದರು.

ಗ್ರಾಮದಲ್ಲಿದ್ದ ಪ್ರಾಥಮಿಕ ಆರೋಗ್ಯ ಕೇಂದ್ದ ರೋಗಗ್ರಸ್ಥವಾಗಿದೆ. ಇಲ್ಲಿ ರೋಗಿಗಳಿಗೆ ಸೂಕ್ತ ಚಿಕಿತ್ಸೆ ಸಿಗುತ್ತಿಲ್ಲ. ವೈದ್ಯರ ನಿರ್ಲಕ್ಷ್ಯತನ, ಸಿಬ್ಬಂದಿಗಳ ಬೇಜವಾದ್ದಾರಿತನದಿಂದ ಹಳ್ಳಿಯ ರೋಗಿಗಳು ತೊಂದರೆ ಪಡಬೇಕಾಗಿದೆ. ಬಿಸಿಎಂ ಹಾಸ್ಟೆಲ್ದಲ್ಲಿ ಮಕ್ಕಳಿಗೆ ಕಳಪೆ ಮಟ್ಟದ ಊಟ ನೀಡಲಾಗುತ್ತಿದೆ. ಅಲ್ಲದೇ ಶುದ್ಧ ನೀರು ಮತ್ತು ಶೌಚಾಲಯ ಇಲ್ಲದೇ ಇರುವುದರಿಂದ ಮಕ್ಕಳು ತೊಂದರೆ ಪಡುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ತಾಲೂಕು ಅಧ್ಯಕ್ಷ ಬಂಡೆಪ್ಪ ಯಂಗನೋರ ಮಾತನಾಡಿ, ಚಿಮ್ಮನಚೋಡ ಗ್ರಾಮದಲ್ಲಿ ಕೈಗೊಂಡಿರುವ ಮುಖ್ಯಮಂತ್ರಿಗಳ ಗ್ರಾಮ ವಿಕಾಸ ಯೋಜನೆ ಮತ್ತು ದೋಟಿಕೋಳ ಗ್ರಾಮದಲ್ಲಿ ಕೃಷಿ ಇಲಾಖೆಯಿಂದ ನಡೆದ ಸುಜಲಾ ಯೋಜನೆ ಅಡಿಯಲ್ಲಿ ಮಾಡಲಾದ ಕಾಮಗಾರಿಗಳು ಸಂಪೂರ್ಣ ಕಳಪೆಮಟ್ಟದ್ದಾಗಿವೆ. ಹಳೆ ಕಾಮಗಾರಿಗಳನ್ನೇ ಹೊಸ ಕಾಮಗಾರಿಗಳೆಂದು ಬಿಲ್ ಸೃಷ್ಟಿಸಿ ಕೃಷಿ ಇಲಾಖೆ ಅಧಿಕಾರಿಗಳು ಕೋಟ್ಯಂತರ ರೂ. ಗುಳುಂ ಮಾಡಿದ್ದಾರೆ ಎಂದು ದೂರಿದರು.

ಬಸವರಾಜ ಚಿಮ್ಮಾಇದಲಾಯಿ, ಜಗನ್ನಾಥ ರೇವಣೋರ, ಸುರೇಶ ರಾಣಾಪುರ, ಬಾಬುರಾವ್‌ ಮಾಲೆ ಮಾತನಾಡಿದರು.

ದಲಿತ ಸೇನೆ 18 ಬೇಡಿಕೆಗಳ ಮನವಿ ಪತ್ರವನ್ನು ತಹಶೀಲ್ದಾರ್‌ ಪಂಡಿತ ಬಿರಾದಾರಗೆ ಸಲ್ಲಿಸಲಾಯಿತು. ಆರೋಗ್ಯಾಧಿಕಾರಿ ಡಾ| ಮಹಮ್ಮದ ಗಫಾರ, ಸಿಪಿಐ ಎಚ್.ಎಂ. ಇಂಗಳೇಶ್ವರ, ಸಾರಿಗೆ ವ್ಯವಸ್ಥಾಪಕ ವಿಜಯಕುಮಾರ ಹೊಸಮನಿ, ಕೃಷಿ ಅಧಿಕಾರಿ ಶ್ರೀಮಂತ ಮೋತಕಪಳ್ಳಿ ಹಾಜರಿದ್ದರು.

ದಲಿತ ಸೇನೆ ಮುಖಂಡರಾದ ಸಂಜೀವಕುಮಾರ ಕಟ್ಟಿಮನಿ, ಸಾಗರ ಕಟ್ಟಿಮನಿ, ಸತೀಶ ಮೇಲ್ಕರ, ರಾಹುಲ್, ಶ್ರೀಧರ ವಗ್ಗಿ, ರವಿ, ನಿಂಗಪ್ಪ ರಾಜನೋರ, ಪ್ರಕಾಶ ನೂಲಕರ, ಭೀಮಶಾ ಯಂಗನೋರ, ಯಲ್ಲಾಲಿಂಗ ಕೊಡಂಬಲ ಇನ್ನಿತರರಿದ್ದರು. ಚಿಂಚೋಳಿ ಪಿಎಸ್‌ಐ ಸಂತೋಷ ರಾಠೊಡ ಸೂಕ್ತ ಬಂದೊಬಸ್ತ್ ಮಾಡಿದ್ದರು.