ರಸ್ತೆಗೆ ಹಾಲು ಚೆಲ್ಲಿ ರೈತರ ಆಕ್ರೋಶ

Team Udayavani, May 29, 2020, 8:10 AM IST

ಚಳ್ಳಕೆರೆ: ತಾಲೂಕಿನ ಕೋಡಿಹಳ್ಳಿ ಮತ್ತು ಚಿಕ್ಕಹಳ್ಳಿ ಗ್ರಾಮಗಳನ್ನು ಮೇ 15ರಿಂದಲೇ ಸೀಲ್‌ಡೌನ್‌ ಮಾಡಲಾಗಿದೆ. ಗ್ರಾಮಸ್ಥರಿಗೆ ಯಾವುದೇ ಕೆಲಸ ಕಾರ್ಯಗಳಿಲ್ಲದೆ, ಜಮೀನುಗಳಲ್ಲಿ ಉಳುಮೆ ಮಾಡಲು ಸಾಧ್ಯವಾಗುತ್ತಿಲ್ಲ. ಗ್ರಾಮದ ಕೆಲವು ರೈತರು ಹೈನುಗಾರಿಕೆ ಮೂಲಕ ಬದುಕು ರೂಪಿಸಿಕೊಂಡಿದ್ದಾರೆ.

ಗ್ರಾಮದ ಸುಮಾರು 100ಕ್ಕೂ ಹೆಚ್ಚು ರೈತರು ಪ್ರತಿನಿತ್ಯ 300 ರಿಂದ 400 ಲೀಟರ್‌ ಹಾಲನ್ನು ಗ್ರಾಮದ ಡೈರಿಗೆ ಪ್ರತಿನಿತ್ಯ ನೀಡುತ್ತಿದ್ದರು. ಗುರುವಾರ 20ಕ್ಕೂ ಹೆಚ್ಚು ರೈತರು 200ಕ್ಕೂ ಹೆಚ್ಚು ಲೀಟರ್‌ ಹಾಲನ್ನು ಡೈರಿಗೆ ನೀಡಲು ಹೋದಾಗ ಹಾಲು ಖರೀದಿಸಲು ಡೈರಿಯವರು ನಿರಾಕರಿಸಿದರು. ಇದರಿಂದ ಬೇಸರಗೊಂಡ ರೈತರಾದ ತಿಪ್ಪಾರೆಡ್ಡಿ, ಮಂಜುನಾಥ, ಹರೀಶ್‌, ತಿಪ್ಪೇಸ್ವಾಮಿ, ಭೀಮಣ್ಣ ರೆಡ್ಡಿ ಇತರರು ಹಾಲನ್ನು ರಸ್ತೆಗೆ ಚೆಲ್ಲಿದರು. ಪಕ್ಕದ ಚಿಕ್ಕಹಳ್ಳಿ ಸೀಲ್‌ಡೌನ್‌ ಆಗಿದ್ದರೂ ಅಲ್ಲಿನ ಹಾಲು ಖರೀದಿಸಲಾಗುತ್ತಿದೆ. ಆದರೆ ನಾವು ತಂದ ಹಾಲನ್ನು ನಿರಾಕರಿಸಲಾಗಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು