ಮಳೆಗಾಗಿ ಪ್ರಾರ್ಥಿಸಿ ಹೋಳಿಗೆ ಅಮ್ಮನ ಹಬ್ಬ ಆಚರಣೆ

Team Udayavani, Jul 27, 2017, 11:31 AM IST

ಚಿತ್ರದುರ್ಗ: ಬುಡಕಟ್ಟು ಸಂಸ್ಕೃತಿ ಜಿಲ್ಲೆಯಲ್ಲಿ ಪ್ರತಿಯೊಂದು ಹಬ್ಬ, ಆಚರಣೆಗೆ ಇಲ್ಲಿ ಅದರದ್ದೇ ಆದ ಪರಂಪರೆ, ನಂಬಿಕೆ ಮತ್ತು ಸಂಸ್ಕೃತಿ ನೆಲೆಯಿದೆ. ಇದರ ಭಾಗವಾಗಿ ಹೋಳಿಗೆ ಅಮ್ಮನ ವಿಶೇಷ ಹಬ್ಬವನ್ನು ಆಚರಿಸಲಾಯಿತು.

ನಗರದ ಕರುವಿನಕಟ್ಟೆ ಸರ್ಕಲ್‌ ನಲ್ಲಿ ಹೋಳಿಗೆಮ್ಮ ದೇವಿಗೆ ಮೊರೆ ಹೋಗಿ ಸತತ ಬರದಿಂದ ತತ್ತರಿಸಿರುವ ಜಿಲ್ಲೆಗೆ ಉತ್ತಮ ಮಳೆ ಬಂದು ರೈತರ ಬದುಕು ಹಸನಾಗಲಿ, ಡೆಂಘೀ ಜ್ವರ ಸೇರಿದಂತೆ ಮತ್ತಿತರ ಯಾವುದೇ ರೀತಿಯ ರೋಗ ರುಜಿನ ಮಕ್ಕಳಿಗೆ ಕಾಡದಿರಲಿ ಎಂದು ನಗರದ ಮಳೆಯರು
ಮನೆಗಳಲ್ಲಿ ಮಾಡಿಟ್ಟುಕೊಂಡಿದ್ದ ಹೋಳಿಗೆಗಳನ್ನು ಹೋಳಿಗೆಮ್ಮನವರಿಗೆ ಅರ್ಪಿಸಿ ಕೃಪೆ ತೋರುವಂತೆ ಮನವಿ ಮಾಡಿಕೊಂಡರು. ಪ್ರತಿ ವರ್ಷವು ಆಷಾಢ ಮಾಸದಲ್ಲಿ ನಗರದ ಬಹುತೇಕ ನಿವಾಸಿಗಳು ಯಾವುದೇ ಜಾತಿ, ಬೇಧವಿಲ್ಲದೆ ಹೋಳಿಗೆ ಅಮ್ಮನವರಿಗೆ ವಿಶೇಷವಾಗಿ ಹೋಳಿಗೆ ಮಾಡಿಕೊಂಡು ಬಂದು ಅರ್ಪಿಸಲಾಗುತ್ತದೆ. ಭಕ್ತರು ಮೀಸಲು ನೀರಿನಿಂದ ಮಾಡಿದ ಹೋಳಿಗೆಯನ್ನು ಮೊದಲು ದೇವಿಗೆ ಎಡೆಯಾಗಿ ಅರ್ಪಿಸಿದರು. ದೇವರಿಗೆ ಹೋಳಿಗೆ ಅರ್ಪಿಸಿ ಊರಿನ ಹೊರಗಡೆ ದೇವಿಯನ್ನು ಸಾಗಾಕಿ (ದಾಟಿಸಿ) ನಮ್ಮಲ್ಲಿರುವ ಬರ, ರೋಗ, ಮತ್ತಿತರ ಸಮಸ್ಯೆಗಳನ್ನು ತೊಲಗಿಸು ಎಂದು ಹೋಳಿಗೆ ಅಮ್ಮನ ಜೊತೆಯಲ್ಲಿ ತೊಲಗಾಚೆ ಎಂದು ಗ್ರಾಮಸ್ಥರು ಬೇಡಿಕೊಂಡರು.

ಏನಿದು ಹೋಳಿಗೆ ಅಮ್ಮ: ಹೋಳಿಗೆ ಅಮ್ಮ ಅಂದರೆ ಈಕೆ ಮಾರಿದೇವಿ. ಊರಿಗೆ ಅಂಟಿದ ನಾನಾ ರೀತಿಯ ಪೀಡೆ, ರೋಗ, ರುಜಿನಗಳನ್ನು ಆಕೆಯೊಂದಿಗೆ ಊರಾಚೆ ತೊಲಗಿಸಿ ಬರುವುದೇ ಹೋಳಿಗೆ ಅಮ್ಮನ ಹಬ್ಬದ ವೈಶಿಷ್ಟ . ಹಿಂದೆ ಪ್ಲೇಗ್‌, ಕಾಲರ, ಮಲೇರಿಯಾ ಮುಂತಾದ ರೋಗಗಳು ಕಾಣಿಸಿಕೊಂಡು ಊರಿಗೆ ಊರೇ ಸ್ಮಶಾನವಾಗುತ್ತಿತ್ತು. ಹಾಗಾಗಿ ಇಂಥಹ ಪೀಡೆ ಮತ್ತು ಮಹಾಮಾರಿ ರೋಗಗಳಿಂದು ಜನತೆಯನ್ನು ರಕ್ಷಿಸಲು ಹುಟ್ಟಿಕೊಂಡಿದ್ದೇ ಈ ಹೋಳಿಗೆ ಅಮ್ಮನ ಹಬ್ಬ.