ಮೊಳಕಾಲ್ಮೂರು: ಹೊರ ರಾಜ್ಯದಿಂದ ಬಂದ 6 ಜನರಿಗೆ ಸಾಂಸ್ಥಿಕ ಕ್ವಾರಂಟೈನ್‌

Team Udayavani, May 18, 2020, 12:58 PM IST

ಸಾಂದರ್ಭಿಕ ಚಿತ್ರ

ಮೊಳಕಾಲ್ಮೂರು: ತಾಲೂಕಿಗೆ ಹೊರ ರಾಜ್ಯಗಳಿಂದ ಆಗಮಿಸಿದ್ದ 6 ಜನ ಸ್ಥಳೀಯರನ್ನು ತಾಲೂಕು ಆಡಳಿತ ಪಟ್ಟಣದ ಆರ್‌.ಎಂ.ಎಸ್‌.ಎ ಬಾಲಕಿಯರ ವಸತಿನಿಲಯದಲ್ಲಿ ಸಾಂಸ್ಥಿಕ ಕ್ವಾರಂಟೈನ್‌ನಲ್ಲಿಟ್ಟಿದೆ.

ಚಳ್ಳಕೆರೆ ತಾಲೂಕು ಕೋಡಿಹಳ್ಳಿಯಲ್ಲಿ ಪತ್ತೆಯಾಗಿರುವ ಸೋಂಕಿತ ವ್ಯಕ್ತಿ, ತಾಲೂಕಿನ ವಿವಿಧ ಗ್ರಾಮಗಳಿಗೆ ಬಂದಿರುವ ಭೀತಿಯ ಬೆನ್ನಲ್ಲೇ ಹೊರ ರಾಜ್ಯಗಳಿಂದ ಬಂದ 6 ಜನ ಸ್ಥಳೀಯರನ್ನು ತಾಲೂಕು ಆಡಳಿತ ಪತ್ತೆ ಹಚ್ಚಿ ಸಾಂಸ್ಥಿಕ ಕ್ವಾರಂಟೈನ್‌ನಲ್ಲಿಟ್ಟಿದೆ. ಆಂಧ್ರಪ್ರದೇಶದ ಧರ್ಮವರಂನಿಂದ ಮಹಿಳೆ, ಪೆರಗುಪಾಳ್ಯದಿಂದ ಒಬ್ಬ ಪುರುಷ, ಹೈದರಾಬಾದ್‌ ನಿಂದ ಒಬ್ಬ ಪುರುಷ, ದೆಹಲಿಯಿಂದ ಇಬ್ಬರು ಪುರುಷರು ಹಾಗೂ ಚೆನ್ನೈನಿಂದ ಒಬ್ಬ ಪುರುಷ ಸೇರಿದಂತೆ ಒಟ್ಟು 6 ಜನರು ಮೇ 16 ರಂದು ಆಗಮಿಸಿದ್ದರು. ಈ ಮಾಹಿತಿ ಆಧರಿಸಿ ತಹಶೀಲ್ದಾರ್‌ ಎಂ. ಬಸವರಾಜ್‌ ಹಾಗೂ ಸಿಬ್ಬಂದಿ ಪೊಲೀಸರ ಸಹಕಾರದೊಂದಿಗೆ ಅವರೆಲ್ಲರನ್ನೂ ಸಾಂಸ್ಥಿಕ ಕ್ವಾರಂಟೈನ್‌ನಲ್ಲಿ ಇಟ್ಟಿದ್ದಾರೆ. ತಾಲೂಕು ಆರೋಗ್ಯಾಧಿಕಾರಿ ಡಾ| ಪದ್ಮಾವತಿ, ಜಿಲ್ಲಾ ಕ್ಷೇತ್ರ ಶಿಕ್ಷಣಾಧಿಕಾರಿ ಡಿ. ಚಿದಾನಂದಪ್ಪ, ಕ್ಷೇತ್ರ ಶಿಕ್ಷಣಾ ಧಿಕಾರಿ ಎನ್‌. ಸೋಮಶೇಖರ್‌, ಅಕ್ಷರ ದಾಸೋಹದ ಪಾತಲಿಂಗಪ್ಪ, ಕೆ.ಎಚ್‌. ಸಣ್ಣಯಲ್ಲಪ್ಪ, ಜಿಲ್ಲಾ ಆರೋಗ್ಯ ಮೇಲ್ವಿಚಾರಕರಾದ ಶ್ರೀನಿವಾಸ್‌, ತಿಪ್ಪೇಶ್‌ ಇತರರು ಇದ್ದರು.