ಲಾರಿ ಅಡ್ಡಗಟ್ಟಿ ಗುಟ್ಕಾ ಕಳುವಿಗೆ ಯತ್ನ, ಪೊಲೀಸರನ್ನು ಕಂಡು ಪರಾರಿಯಾದ ಕಳ್ಳರು

Team Udayavani, Dec 1, 2019, 5:29 PM IST

ಚಿತ್ರದುರ್ಗ: ಗುಟ್ಕಾ ಸಾಗಿಸುತ್ತಿದ್ದ ಲಾರಿ ಚಾಲಕನನ್ನು ಡಾಬಾದಲ್ಲಿ ಕೂಡಿಟ್ಟು ಸುಮಾರು 30 ಲಕ್ಷ ರೂ ಮೌಲ್ಯದ ಗುಟ್ಕಾ ಕಳ್ಳತನ ಮಾಡುಲು ಯತ್ನಿಸಿರುವ ಘಟನೆ ನಡೆದಿದೆ.

ಹಿರಿಯೂರು ತಾಲೂಕಿನ ಗೊಲ್ಲಹಳ್ಳಿ ಬಳಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ವಿಮಲ್ ಪಾನ್ ಮಸಾಲ ತುಂಬಿದ್ದ ಲಾರಿಯನ್ನು ಕಾರಿನಲ್ಲಿ ಬಂದು ಅಡ್ಡಗಟ್ಟಿರುವ ದುಷ್ಕರ್ಮಿಗಳು ಚಾಲಕನನ್ನು ಇಳಿಸಿ ಪಕ್ಕದ ಡಾಬಾಗೆ ಕರೆದೊಯ್ದು ಸುಮಾರು ಒಂದು ಗಂಟೆ ಬಂಧಿಸಿಟ್ಟುಕೊಂಡಿದ್ದಾರೆ.

ತುಮಕೂರಿನಿಂದ ಬಳ್ಳಾರಿ ತಲುಪಬೇಕಿದ್ದ ಗುಟ್ಕಾ ಲಾರಿ ಬರುವುದು ವಿಳಂಭವಾದ ಹಿನ್ನೆಲೆಯಲ್ಲಿ ಕಂಪನಿಯವರು ಜಿಪಿಎಸ್ ಮೂಲಕ ಲಾರಿಯ‌ ಲೊಕೇಶನ್ ಪರಿಶೀಲಿಸಿದ್ದಾರೆ.

ಈ ವೇಳೆ ಸಾಣಿಕೆರೆ ಬಳಿ ಲಾರಿ ನಿಂತಿರುವುದು ಗೊತ್ತಾಗಿದೆ.‌ ಅನುಮಾನಗೊಂಡು ಚಳ್ಳಕೆರೆ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಡಿವೈಎಸ್.ಪಿ ರೊಷನ್ ಜಮೀರ್, ವೃತ್ತ ನಿರೀಕ್ಷಕ ಆನಂದ್ ಹಾಗೂ ಪಿಎಸ್ಐ ನೂರ್ ಅಹಮ್ಮದ್ ನೇತೃತ್ವದಲ್ಲಿ ತಂಡ ರಚಿಸಿ ಹೊರಟಾಗ ಪಾನ್ ಮಸಾಲ ಡಬ್ಬಿಗಳಿದ್ದ ಲಾರಿ ಹೆಗ್ಗೆರೆ ಸಮೀಪ ಕಾಪರಹಳ್ಳಿಗೆ ಹೊಗು‌ವ ರಸ್ತೆಯಲ್ಲಿ ಸಿಕ್ಕಿದೆ.

ಕಂಪನಿಯ ಲಾರಿಯಲ್ಲಿದ್ದ ಗುಟ್ಖಾವನ್ನು ಮತ್ತೊಂದು ಲಾರಿಗೆ ತುಂಬುತ್ತಿದ್ದ ದರೋಡೆಕೋರರು ಪೊಲೀಸರನ್ನು ಕಂಡು ಪರಾರಿಯಾಗಿದ್ದಾರೆ.

ಇತ್ತ ಲಾರಿ ಚಾಲಕನನ್ನು ಗೊಲ್ಲಹಳ್ಳಿ ಬಳಿ ಬಿಟ್ಟು ಹೋಗಿದ್ದು ಲಾರಿ ಹುಡುಕಾಡುತ್ತಿದ್ದ‌ ಎನ್ನಲಾಗಿದೆ. ಈ ಕುರಿತು ಲಾರಿ ಚಾಲಕನಿಂದ ದೂರು ದಾಖಲಿಸಿಕೊಂಡು ಕಳ್ಳರ ಗ್ಯಾಂಗ್ ಪತ್ತೆಗೆ ಬಲೆ ಬೀಸಲಾಗಿದೆ.