ಮಂಗಳೂರು: ಮತ್ತೆ ಚಾಲೂ ಆದ ಕ್ಲಾಕ್‌ ಟವರ್‌ ಗಡಿಯಾರ

Team Udayavani, Jan 2, 2023, 6:45 AM IST

ಮಹಾನಗರ: ವಿದ್ಯುತ್‌ ಬಿಲ್‌ ಪಾವತಿಯಾ ಗದೆ ವಿದ್ಯುತ್‌ ಸಂಪರ್ಕ ಸ್ಥಗಿತಗೊಂಡು ನಿಂತು ಹೋಗಿದ್ದ ಕ್ಲಾಕ್‌ಟವರ್‌ನ ಗಡಿಯಾರ ಮತ್ತೆ ಚಾಲೂ ಆಗಿದೆ. ಮೆಸ್ಕಾಂ ಅಧಿಕಾರಿಗಳು ಮತ್ತೆ ವಿದ್ಯುತ್‌ ಪೂರೈಕೆ ಮಾಡಿದ್ದು, ಇದೀಗ ಕ್ಲಾಕ್‌ ಟವರ್‌ ಗಡಿಯಾರ ಮತ್ತೆ ಟಿಕ್‌.. ಟಿಕ್‌.. ಸದ್ದು ಮಾಡುತ್ತಿದೆ.

ಸ್ಮಾರ್ಟ್‌ಸಿಟಿ ಯೋಜನೆಯ ಮೂಲಕ ಹಂಪನಕಟ್ಟೆಯಲ್ಲಿ ಸುಮಾರು ಒಂದು ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಂಡ ಕ್ಲಾಕ್‌ಟವರ್‌ಗೆ ಕೆಲ ವರ್ಷಗಳ ಹಿಂದೆ ಗಡಿಯಾರ ಅಳವಡಿಸಲಾ ಗಿತ್ತು. ಕ್ಲಾಕ್‌ಟವರ್‌ ಉದ್ಘಾಟನೆಗೊಳ್ಳದಿದ್ದರೂ, ಗಡಿಯಾರ ಚಾಲು ಆಗುತ್ತಿತ್ತು. ಇದೇ ರಸ್ತೆಯಲ್ಲಿ ಸಂಚರಿಸುತ್ತಿದ್ದ ಮಂದಿಗೆ ಮತ್ತು ಹೊಸತಾಗಿ ಮಂಗಳೂರು ಪ್ರವೇಶಿಸುವವರಿಗೆ ಈ ಗಡಿಯಾರ ಗೋಪುರ ಆಕರ್ಷಣೀಯವಾಗಿತ್ತು.

ವಿದ್ಯುತ್‌ ಪೂರೈಕೆಯ ಮೂಲಕ ಚಾಲೂ ಆಗುವ ಗಡಿಯಾರ ಇದಾಗಿದ್ದು, ಸ್ಮಾರ್ಟ್‌ಸಿಟಿ ಕಳೆದ ಕೆಲ ತಿಂಗಳಿನಿಂದ ಮೆಸ್ಕಾಂ ವಿದ್ಯುತ್‌ ಶುಲ್ಕ ಕಟ್ಟಿರಲಿಲ್ಲ. ಇದೇ ಕಾರಣಕ್ಕೆ ಮೆಸ್ಕಾಂ ವಿದ್ಯುತ್‌ ಪೂರೈಕೆ ಸ್ಥಗಿತಗೊಳಿಸಿತ್ತು. ಈ ಕುರಿತು “ಮೆಸ್ಕಾಂ ಬಿಲ್‌ ಪಾವತಿಸದೆ ಸ್ಮಾರ್ಟ್‌ ಕ್ಲಾಕ್‌ ಬಂದ್‌ !’ ಎಂಬ ಶೀರ್ಷಿಕೆಯಲ್ಲಿ “ಉದಯವಾಣಿ ಸುದಿನ’ ಜ.1 ರಂದು ವಿಶೇಷ ವರದಿ ಪ್ರಕಟಿಸಿತ್ತು. ಇದೀಗ ಕ್ಲಾಕ್‌ಟವರ್‌ ಗಡಿಯಾರಕ್ಕೆ ಮತ್ತೆ ವಿದ್ಯುತ್‌ ಪೂರೈಕೆ ಆರಂಭಗೊಂಡಿದ್ದು, ನಿಂತು ಹೋಗಿದ್ದ ಗಡಿಯಾರದ ಮುಳ್ಳುಗಳು ಮತ್ತೆ ಚಾಲೂ ಆಗಿದೆ.