ಜಾಂಬೂರಿ; ಆರ್ಥಿಕ ವಹಿವಾಟಿಗೆ ಚೈತನ್ಯ

Team Udayavani, Dec 26, 2022, 6:10 AM IST

ಮೂಡುಬಿದಿರೆ: ಜಾಂಬೂರಿ ಕೇವಲ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಸೀಮಿತವಾಗಿರದೆ ಕೋವಿಡ್‌ ಅನಂತರ ಆರ್ಥಿಕ ವಹಿವಾಟಿಗೆ ಚೇತರಿಕೆ ನೀಡುವಲ್ಲೂ ಪ್ರಮುಖ ಪಾತ್ರ ವಹಿಸಿದೆ.

ಜಾಂಬೂರಿಯ ಭಾಗವಾಗಿರುವ ಪ್ರದರ್ಶನ-ಮಾರಾಟ ಮೇಳಕ್ಕೆ ದ.ಕ. ಮಾತ್ರವಲ್ಲದೆ ರಾಜ್ಯದ ವಿವಿಧೆಡೆಗ ಳಿಂದ, ಹೊರ ರಾಜ್ಯಗಳಿಂದಲೂ ವ್ಯಾಪಾರ ವಹಿವಾಟುದಾರರು ಆಗಮಿ ಸಿದ್ದು, ವಿವಿಧ ವಸ್ತು-ಉತ್ಪನ್ನಗಳನ್ನು ಪ್ರದರ್ಶನ / ಮಾರಾಟಕ್ಕಿಟ್ಟಿದ್ದಾರೆ. ಜಿಲ್ಲೆಯಲ್ಲಿ ಕೋವಿಡ್‌ ಬಳಿಕ ನಡೆಯು ತ್ತಿರುವ ಬೃಹತ್‌ ಉತ್ಸವ ಇದಾಗಿದೆ. ಡಿ. 27ರ ತನಕ ಉತ್ಸವ ನಡೆಯಲಿದೆ.

ನೂರಕ್ಕೂ ಅಧಿಕ ಸ್ಟಾಲ್‌ಗ‌ಳು ಒಂದೆಡೆಯಾದರೆ, ನೂರಾರು ಸಂಖ್ಯೆಯಲ್ಲಿ ಸಂತೆ ವ್ಯಾಪಾರಿಗಳು ಇನ್ನೊಂದು ಕಡೆಯಿದ್ದಾರೆ. ತಿಂಡಿ, ತಿನಿಸುಗಳು, ಬಟ್ಟೆ, ಚಪ್ಪಲಿ, ಕೃಷಿ ಉತ್ಪನ್ನಗಳು, ಮಕ್ಕಳ ಆಟಿಕೆ, ನರ್ಸರಿ, ತರಕಾರಿ ಬೀಜಗಳು, ಫ್ಯಾನ್ಸಿ ಐಟಂಗಳು ಹೀಗೆ ದೊಡ್ಡ ಪಟ್ಟಿಯೇ ಇದೆ.

ಉತ್ತಮ ವಹಿವಾಟು
ಉದಯವಾಣಿ ಜತೆ ಮಾತನಾಡಿದ ಪುತ್ತೂರಿನ ಫ್ಯಾನ್ಸಿ ವ್ಯಾಪಾರಿ ರಾಮಚಂದ್ರ ಅವರು, ನುಡಿಸಿರಿ ವೇಳೆ ಮಾರಾಟ ಮೇಳದಲ್ಲಿ ಭಾಗವಹಿಸುತ್ತಿದ್ದೆ. ಎರಡು ವರ್ಷದ ಬಳಿಕ ಮೂಡುಬಿದಿರೆಗೆ ವ್ಯಾಪಾರಕ್ಕೆ ಬಂದಿದ್ದು, ಈವರೆಗೆ ವಹಿವಾಟು ಉತ್ತಮವಾಗಿಯೇ ಸಾಗಿದೆ. ದಿನಕ್ಕೆ 1,500-2,000 ರೂ. ವರೆಗೆ ವ್ಯಾಪಾರ ನಡೆಯುತ್ತಿದೆ. ಇದು ಕಳೆದರಡು ವರ್ಷಗಳ ಬಳಿಕ ಕಂಡು ಬಂದಿರುವ ಉತ್ತಮ ವಹಿವಾಟು ಎನ್ನುತ್ತಾರೆ.

ಸಂಚಾರ ವ್ಯವಸ್ಥೆಗೆ ಸಂಬಂಧಿಸಿದಂತೆ ಆಟೋ, ಟ್ಯಾಕ್ಸಿ, ಬಸ್‌ಗಳಲ್ಲಿಯೂ ಜನರು ಕುಟುಂಬ, ಸ್ನೇಹಿತರೊಂದಿಗೆ ಜಾಂಬೂರಿಗೆ ಆಗಮಿಸುತ್ತಿದ್ದಾರೆ. ಆಟೋ ಚಾಲಕರು ಬಿಡುವಿಲ್ಲದ ದುಡಿಮೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಬಸ್‌ಗಳೂ ತುಂಬಿ ತುಳುಕುತ್ತಿವೆ. ವಿದ್ಯಾಗಿರಿ ಮಾತ್ರವಲ್ಲದೆ, ಮೂಡುಬಿದಿರೆ ಆಸುಪಾಸಿನ ಅಂಗಡಿ, ಹೊಟೇಲ್‌ ಲಾಡ್ಜ್ ಗಳಿಗೂ ವಹಿವಾಟು ಹೆಚ್ಚಾಗಿದೆ.

ಡಿಜಿಟಲ್‌ ವ್ಯವಹಾರ
ಡಿಜಿಟಲ್‌ ವ್ಯವಹಾರಕ್ಕೂ ಜಾಂಬೂರಿ ವೇದಿಕೆಯಾಗಿದೆ. ಪ್ರತೀ ಮಳಿಗೆಯವರೂ ಕ್ಯುಆರ್‌ ಕೋಡ್‌ ಹೊಂದಿದ್ದು, ಡಿಜಿಟಲ್‌ ವ್ಯವಹಾರವೇ ಹೆಚ್ಚಾಗಿ ನಡೆಯುತ್ತಿದೆ. ಸಣ್ಣ ಟೀ ಸ್ಟಾಲ್‌ನಲ್ಲೂ, ಐಸ್‌ಕ್ಯಾಂಡಿ ಮಾರುವವ ಬಳಿಯಲ್ಲೂ ಸ್ಕ್ಯಾನರ್‌ಗಳು ಕಂಡು ಬಂದಿದೆ. ಪರ್ಸ್‌ನಲ್ಲಿ ನಗದು ಇಲ್ಲದಿದ್ದರೂ ಮೊಬೈಲ್‌ ಇದ್ದರೆ ಸಾಕು ಎನ್ನುವುದು ಇಲ್ಲಿಯೂ ಸಾಬೀತಾಗಿದೆ.

-ಭರತ್‌ ಶೆಟ್ಟಿಗಾರ್‌