ಸಂತ ಅಲೋಶಿಯಸ್‌ ಕಾಲೇಜಿಗೆ ಬೆಲ್ಜಿಯಂ ವಿದ್ಯಾರ್ಥಿ ತಂಡದ ಆಗಮನ

Team Udayavani, Jul 14, 2019, 5:18 AM IST

ಮಹಾನಗರ: ಬೆಲ್ಜಿಯಂನ ಬೇರೆ ಬೇರೆ ವಿಶ್ವವಿದ್ಯಾನಿಲಯಗಳ 14 ವಿದ್ಯಾರ್ಥಿಗಳನ್ನೊಳಗೊಂಡ “ಒಲಿವೆಂಟ್‌ ಎಂಬ ಹೆಸರಿನ ತಂಡ ಇಲ್ಲಿನ ಪ್ರತಿಷ್ಠಿತ ಕಾಲೇಜುಗಳಲ್ಲೊಂದಾದ ಸಂತ ಅಲೋಶಿ ಯಸ್‌ ಕಾಲೇಜಿಗೆ ಆಗಮಿಸಿದೆ.

ವಿಜ್ಞಾನ, ಕಾನೂನು, ಆರ್ಥಿಕತೆ, ಎಂಜಿನಿಯರಿಂಗ್‌ ಮತ್ತು ವೈದ್ಯಕೀಯ ಮೊದಲಾದ ಕ್ಷೇತ್ರಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು, ಅಧ್ಯಯನಶೀಲರಾಗಿರುವ ಈ “ಒಲಿವೆಂಟ್‌ ತಂಡ, ವಿದೇಶಗಳಿಗೆ ಭೇಟಿ ನೀಡಿ ಅಲ್ಲಿನ ಸಂಸ್ಕೃತಿ, ಆಚಾರ -ವಿಚಾರ, ನಂಬಿಕೆ ಆಚರಣೆ, ವಾತಾವರಣಗಳನ್ನು ತಿಳಿದುಕೊಳ್ಳುವ ಉದ್ದೇಶದಿಂದ ವಿದೇಶ ಪ್ರವಾಸವನ್ನು ಕೈಗೊಳ್ಳುತ್ತಿದೆ. ಈ ಹಿನ್ನೆಲೆಯಲ್ಲಿ ಮಂಗಳೂರಿಗೆ ಆಗಮಿಸಿದ ಈ ತಂಡ ಒಂದು ವಾರದ ಅವಧಿಯ ಪ್ರವಾಸದಲ್ಲಿ ಸಂತ ಅಲೋಶಿಯಸ್‌ ಕಾಲೇಜು ಆವರಣ ಮತ್ತು ಇಲ್ಲಿನ ವೈವಿಧ್ಯಮಯ ಸಕಲ ಸೌಲಭ್ಯಗಳನ್ನು ವೀಕ್ಷಿಸಿ, ಕಾಲೇಜಿನ ಬೇರೆ ಬೇರೆ ಪ್ರಾಧ್ಯಾಪಕರ ವಿಭಿನ್ನ ವಿಷಯಗಳ ಮೇಲಿನ ಉಪನ್ಯಾಸ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿತು.

ಮಾತ್ರವಲ್ಲದೆ ಈ ವಿದ್ಯಾರ್ಥಿಗಳು ನಗರದ ಆಸುಪಾಸಿನಲ್ಲಿರುವ ಕಂಪೆನಿಗಳು ಮತ್ತು ಕೈಗಾರಿಕಾ ಕೇಂದ್ರಗಳಿಗೆ ಭೇಟಿ ನೀಡಿದರು. ವಿದೇಶದಲ್ಲಿರುವ ತಮ್ಮ ದೇಶದ ಜನರ ರಕ್ಷಣೆಯನ್ನು ನೋಡಿಕೊಳ್ಳಲು ಬೆಲ್ಜಿಯಂ ಸರಕಾರ ನಿಯೋಜಿಸಿದ ಅಧಿಕಾರಿ ಜನರಲ್‌ ವ್ಯಾನ್‌ದೆ ವೆÅಕನ್‌ ಮಾರ್ಕ್‌ ಅವರು ಚೆನ್ನೈಯಿಂದ ಆಗಮಿಸಿ ಈ ತಂಡವನ್ನು ಸೇರಿಕೊಂಡು ಸಂತ ಅಲೋಶಿಯಸ್‌ ಚಾಪೆಲ್‌ನಲ್ಲಿ ನಡೆದ ಪೂಜಾ ಕಾರ್ಯ ಕ್ರಮದಲ್ಲಿ ಭಾಗವಹಿಸಿದರು. ಅಲೋಶಿಯಸ್‌ ಕಾಲೇಜಿನ ವಿದೇಶಿ ಸಹಯೋಗ ಘಟಕದ ಡೀನ್‌ ಆಗಿರುವ ಡಾ| ವಿನ್ಸೆಂಟ್‌ ಮಸ್ಕರೇನ್ಹಸ್‌ ಈ ಕಾರ್ಯಕ್ರಮದ ಸಂಯೋಜಕರಾಗಿದ್ದಾರೆ. ಈ ತಿಂಗಳ 8 ರಂದು ನಗರಕ್ಕೆ ಆಗಮಿಸಿದ ಈ ತಂಡ ದ.ಕ. ಜಿಲ್ಲಾಧಿಕಾರಿ ಮತ್ತು ಮುಖ್ಯ ಕಾರ್ಯನಿರ್ವಹಣಾಧಿ ಕಾರಿ ಯವರ ಜತೆ ಸಂವಾದ ನಡೆಸಿತ್ತು.