ತಪೋರಾಜ್ಯದ ಯುವರಾಜ

Team Udayavani, Feb 4, 2019, 5:38 AM IST

ಅಣ್ಣ ಭರತ- ತಮ್ಮ ಬಾಹುಬಲಿ ಈರ್ವರ ಕಣ್ಣುಗಳಿಗೂ ಮಸುಕಿದ ಪೊರೆ ಹರಿದುದಕ್ಕೆ ಮೆಚ್ಚುಗೆಯೋ ಎಂಬಂತೆ ಆಕಾಶದಿಂದ ದೇವತೆಗಳ ಪುಷ್ಪವೃಷ್ಟಿಯಾಯಿತು. ಬಾಹುಬಲಿಯ ದೃಢ ನಿಶ್ಚಯದೆದುರು ಭರತ ಸೋತನು; ಅವನ ತಪಶ್ಚರ್ಯೆಯ ನಿರ್ಧಾರವನ್ನು ಭರತ ಒಪ್ಪಿಕೊಳ್ಳಲೇ ಬೇಕಾಯಿತು. ಬಾಹುಬಲಿ ತನ್ನ ಮಗ ಮಹಾಬಲಿಗೆ ತನ್ನ ರಾಜ್ಯವನ್ನು ವಹಿಸಿಕೊಟ್ಟನು. ಬಳಿಕ ಸಮಸ್ತ ಭೂಮಂಡಲವನ್ನು ಗೆದ್ದವರನ್ನೂ ಮಣಿಸಬಲ್ಲ ಇಹದ ವ್ಯಾಮೋಹವನ್ನು ಗೆದ್ದ ಧೀರೋದಾತ್ತ ನಡಿಗೆಯಿಂದ ಬಾಹುಬಲಿಯು ಆದಿದೇವನ ಪುಣ್ಯ ಸನ್ನಿಧಾನದತ್ತ ನಡೆದನು. 

ಬಾಹುಬಲಿಯ ಆಗಮನವಾಗುತ್ತಿದ್ದಂತೆ ತಂಗಾಳಿಯು ಮಂದಾರಪುಷ್ಪಗಳ ಸುವಾಸನೆಯನ್ನು ಹೊತ್ತುತಂದು ಆದಿನಾಥನ ಸಮವಸರಣವು ತಂಪಾಯಿತು. ದೇವ ದುಂದುಭಿಯಾಯಿತು. ಆದಿತೀರ್ಥಂಕರನ ಪದತಲದಲ್ಲಿ ಬಾಹುಬಲಿ ದೀರ್ಘ‌ದಂಡ ನಮಸ್ಕಾರ ಮಾಡಿದನು. ಹಿಂದೆ ನೀವು ಪ್ರಜಾಜನರ ಉದ್ಧಾರಕ್ಕಾಗಿ ಯುವರಾಜ ಪದವಿಯನ್ನು ಅನುಗ್ರಹಿಸಿದ್ದಿರಿ. ಈಗ ನನ್ನದೇ ಏಳಿಗೆಯ ಊರುಗೋಲಾಗಿ ತಪೋರಾಜ್ಯದಲ್ಲಿ ಯುವರಾಜ ಪದವಿಯನ್ನು ಅನುಗ್ರಹಿಸಿ ಎಂದು ಪ್ರಾರ್ಥಿಸಿದನು.

ಮಂಗಳಪಾದೆಯ ಶ್ರೇಷ್ಠತೆ‌
ಎಲ್ಲಿ ನೋಡಿದರೂ ಬೃಹತ್‌ ಕಡುಕಪ್ಪು ಬಂಡೆಕಲ್ಲುಗಳು. ಏರಿದಷ್ಟು ಎದುರಾಗುವ ಎತ್ತರದ ಕಲ್ಲು ಗಳಲ್ಲಿ ಅಲ್ಲಲ್ಲಿ  ಅದೇನೋ ಕೆತ್ತಿರುವ‌, ಕತ್ತಲು ಗುರುತಿಸಿರುವ ಕುರುಹುಗಳು. ಇನ್ನಷ್ಟು ಮೂರ್ತಿಗಳ ಮೂರ್ತರೂಪಕ್ಕಾಗಿ ಹಂಬಲಿಸಿ ಕಾಯುತ್ತಿವೆಯೇನೋ ಎಂಬಂತಹ ಕಲ್ಲುಮಯ ಸ್ಥಳ ಕಾರ್ಕಳದ ಮಂಗಲಪಾದೆ. ಭುವನೇಂದ್ರ ಕಾಲೇಜಿನ ಸಮೀಪ ಇರುವ ಈ ಸ್ಥಳ ಜಗತ್ತಿನ ಅನ್ಯಾನ್ಯ ಕಡೆಗಳಿಗೆ ಮೂರ್ತಿನಿರ್ಮಾಣಕ್ಕೆ ಕಲ್ಲುಗಳನ್ನು ನೀಡಿದ ಕೀರ್ತಿ ಹೊಂದಿದೆ.

ಗುಡ್ಡದ ಆರಂಭದಲ್ಲಿ ಸಿಗುವ ಅರ್ಧರೂಪ ತಳೆದಿರುವ ಮಹಾವೀರ ಸ್ವಾಮಿಯ ವಿಗ್ರಹ, ಕಲ್ಲುಗಳ ಮೇಲೆ ಬಿಡಿಸಿರುವ ಚಿತ್ರಗಳು, ಉಳಿಯ ಪೆಟ್ಟಿನ ಕುರುಹುಗಳು ಮೂರ್ತಿ ಕೆತ್ತನೆೆಯ ಇತಿಹಾಸವನ್ನು ಹೇಳುತ್ತವೆ. ಇಂತಹ ಐತಿಹಾಸಿಕ ತಾಣದಿಂದಲೇ ಧರ್ಮಸ್ಥಳದ ಬಾಹುಬಲಿ ಮೂರ್ತಿ ನಿರ್ಮಾಣಕ್ಕೆ ಅರ್ಹವಾದ ಶಿಲೆ ಲಭಿಸಿತ್ತು.