Bajpe: ತಂಗುದಾಣ ತೆರವು, ಪ್ರಯಾಣಿಕರು ಅನಾಥ!

ರಸ್ತೆ ವಿಸ್ತರಣೆಗೆ ತಂಗುದಾಣ ತೆರವಾಗಿ 50 ದಿನಗಳೇ ಕಳೆದಿವೆ!; ಈಗ ನಿಲ್ದಾಣವೂ ಇಲ್ಲ, ಕಾಂಕ್ರೀಟೂ ಇಲ

Team Udayavani, Dec 26, 2024, 1:15 PM IST

ಬಜಪೆ: ಬಜಪೆ ಪೇಟೆಯಲ್ಲಿರುವ ಎರಡು ಬಸ್‌ ತಂದುಗಾಣಗಳನ್ನು ರಸ್ತೆ ಕಾಮಗಾರಿಗಾಗಿ ತೆರವುಗೊಳಿಸಿ 50 ದಿನಗಳೇ ಕಳೆದಿವೆ. ಆದರೆ ಇದುವರೆಗೂ ರಸ್ತೆ ವಿಸ್ತರಣೆ, ಕಾಂಕ್ರೀಟ್‌ ಕಾಮಗಾರಿಯೇ ಆರಂಭವಾಗಿಲ್ಲ. ಬಸ್‌ ತಂಗುದಾಣ ತೆರವು ಮಾಡಲು ಅವಸರ ಮಾಡಿದವರು ಈಗ ತಣ್ಣಗಿದ್ದಾರೆ. ಆದರೆ ತಂಗುದಾಣವಿಲ್ಲದೆ ಪ್ರಯಾಣಿಕರು ಮಾತ್ರ ಬಿಸಿಲಿನಲ್ಲಿ ಬೇಯುತ್ತಿದ್ದಾರೆ.

ಬಜಪೆ ಪೇಟೆಯಲ್ಲಿನ ಅದ್ಯಪಾಡಿ, ಮುಚ್ಚಾರು ಹಾಗೂ ಮಂಗಳೂರು, ಸುರತ್ಕಲ್‌ ಕಡೆಗೆ ಹೋಗುವ ಬಸ್‌ಗಳು ನಿಲ್ಲುವ ಭಾಗದಲ್ಲಿದ್ದ ಎರಡು ತಂಗುದಾಣವನ್ನು ಬಜಪೆ ಪಟ್ಟಣ ಪಂಚಾಯತ್‌ ಅಕ್ಟೋಬರ್‌ 31ರಂದು ತೆರವು ಮಾಡಿದೆ. ಬಜಪೆ ಪೇಟೆಯಲ್ಲಿ ನಡೆಯುತ್ತಿರುವ ರಸ್ತೆ ವಿಸ್ತರಣೆ ಹಾಗೂ ಕಾಂಕ್ರೀಟ್‌ ಕಾಮಗಾರಿಗಾಗಿ ಇವುಗಳನ್ನು ತೆರವು ಮಾಡಬೇಕು ಎಂದು ಲೋಕೋಪಯೋಗಿ ಇಲಾಖೆಯು ಬಜಪೆ ಪಟ್ಟಣ ಪಂಚಾಯತ್‌ಗೆ ಸೆ.11ರಂದು ಮನವಿ ಮಾಡಿತ್ತು. ಇದನ್ನು ಪರಿಗಣಿಸಿ ಪಟ್ಟಣ ಪಂಚಾಯತ್‌ ತನ್ನ ಕೆಲಸವನ್ನೇನೋ ಮಾಡಿತ್ತು.

ಬಸ್‌ ತಂಗುದಾಣಗಳನ್ನು ತೆರವುಗೊಳಿಸಿದ ಬಗ್ಗೆ ನ. 4ರಂದು ಬಜಪೆ ಪಟ್ಟಣ ಪಂಚಾಯತ್‌ನಿಂದ ಲೋಕೋಪಯೋಗಿ ಇಲಾಖೆಯ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ ಕಚೇರಿಗೆ ಪತ್ರ ಬರೆದು ತಿಳಿಸಲಾಗಿತ್ತು. ಆದರೆ ತಂಗುದಾಣ ತೆರವುಗೊಳಿಸಿ 50 ದಿನಗಳಾದರೂ ಲೋಕೋಪಯೋಗಿ ಇಲಾಖೆ ಯಾವುದೇ ರಸ್ತೆ ವಿಸ್ತರಣೆ ಕಾಮಗಾರಿಯನ್ನು ಕೈಗೊಳ್ಳದೇ ಇರುವುದು ಇಲ್ಲಿನ ಜನರ ಸಂಕಷ್ಟಕ್ಕೆ ಕಾರಣವಾಗಿದೆ.

ನಿಂತ ಬಸ್‌ಗಳೇ ಪ್ರಯಾಣಿಕ ತಂಗುದಾಣ!
ಬಸ್‌ ತಂಗುದಾಣ ಇಲ್ಲದೆ ಇರುವುದರಿಂದ ಜನರು ಈಗ ನೆರಳಿಗಾಗಿ ಪರಿತಪಿಸಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಮಧ್ಯಾಹ್ನದ ಹೊತ್ತಂತೂ ಇಲ್ಲಿ ನಿಲ್ಲುವುದಕ್ಕೆ ಸಾಧ್ಯವೇ ಇಲ್ಲದ ಸ್ಥಿತಿ ಇದೆ. ಜನರು ಅಂಗಡಿಗಳ ಮುಂಗಟ್ಟು, ಮರದ ನೆರಳಿನಲ್ಲಿ ನಿಂತು ಬಸ್‌ ಬರುವಾಗ ಓಡಿಕೊಂಡು ಬರಬೇಕಾಗಿದೆ. ಅಚ್ಚರಿ ಎಂದರೆ ಈಗ ಕೆಲವು ಬಸ್‌ಗಳೇ ಪ್ರಯಾಣಿಕರಿಗೆ ತಂಗುದಾಣವಾಗಿದೆ. ಮಂಗಳೂರು, ಸುರತ್ಕಲ್‌, ಪಣಂಬೂರು, ಅದ್ಯಪಾಡಿ, ಮುಚ್ಚಾರಿಗೆ ಹೋಗುವ ಬಸ್‌ಗಳಲ್ಲಿ ಕೆಲವು ಅರ್ಧ ಗಂಟೆ ಹೊತ್ತು ನಿಲ್ದಾಣದಲ್ಲಿ ನಿಲ್ಲುತ್ತವೆ. ಜನರು ಅದರಲ್ಲಿ ಹೋಗಿ ಕುಳಿತು ಬಿಸಿಲಿನಿಂದ ತಪ್ಪಿಸಿಕೊಳ್ಳುವುದೂ ಇದೆ. ಆದರೆ, ನಿಂತ ಬಸ್‌ಗಳಲ್ಲಿ ನೆರಳೇನೋ ಇರುತ್ತದೆ. ಆದರೆ, ಬಿಸಿಲಿನ ಝಳ ಹೊಡೆಯುತ್ತಿರುತ್ತದೆ! ಇನ್ನೊಂದು ಕಡೆ ಬಸ್‌ ಬರುವಾಗ ಬೇರೆ ಕಡೆಯಿಂದ ಓಡಿ ಬರುವುದೂ ಇದೆ. ಇದರಿಂದ ಅಪಾಯವೂ ಹೆಚ್ಚಾಗಿದೆ.

ಕಾಮಗಾರಿ ಯಾಕೆ ವಿಳಂಬ?
ಆವತ್ತು ರಸ್ತೆ ವಿಸ್ತರಣೆಗೆ ಬಸ್‌ ತಂಗುದಾನ ತೆರವು ಅನಿವಾರ್ಯ ಎಂದು ಲೋಕೋಪಯೋಗಿ ಇಲಾಖೆ ಮಾಡಿದ ಅವಸರವನ್ನು ನೋಡಿದರೆ ನಾಳೆಯೇ ಕಾಮಗಾರಿ ಆರಂಭದಂತೆ ಕಾಣುತ್ತಿತ್ತು. ಆದರೆ, 50 ದಿನ ಕಳೆದರೂ ಇನ್ನೂ ಕೆಲಸ ಶುರುವಾಗಿಲ್ಲ ಯಾಕೆ ಎನ್ನುವ ಪ್ರಶ್ನೆಗೆ ಯಾರಲ್ಲೂ ಉತ್ತರವಿಲ್ಲ. ಕಾಮಗಾರಿ ಸದ್ಯಕ್ಕೆ ಆರಂಭವಾಗುವುದಿಲ್ಲ ಎಂದಾದರೆ ತಾತ್ಕಾಲಿಕ ತಂಗುದಾಣವಾದರೂ ನಿರ್ಮಿಸಿಕೊಡಿ ಎಂದು ಪ್ರಯಾಣಿಕರು ಆಗ್ರಹಿಸುತ್ತಿದ್ದಾರೆ.

-ಸುಬ್ರಾಯ ನಾಯಕ್‌ ಎಕ್ಕಾರು