ಸ್ಕೂಟರ್‌ಗೆ ಬೈಕ್‌ ಢಿಕ್ಕಿ: ಎಂಜಿನಿಯರಿಂಗ್‌ ವಿದ್ಯಾರ್ಥಿ ಸಾವು

Team Udayavani, Jul 20, 2023, 5:08 AM IST

ಮಂಗಳೂರು: ಮಂಗಳೂರು -ಬಿ.ಸಿರೋಡ್‌ ರಾಷ್ಟ್ರೀಯ ಹೆದ್ದಾರಿ 73ರ ಅಡ್ಯಾರ್‌ ಸಹ್ಯಾದ್ರಿ ಕಾಲೇಜಿನ ಮುಂಭಾಗ ಬುಧವಾರ ಸಂಭವಿಸಿದ ಬೈಕ್‌ ಅಪಘಾತದಲ್ಲಿ ನಗರದ ವಳಚ್ಚಿಲ್‌ನ ಎಂಜಿನಿಯರಿಂಗ್‌ ಕಾಲೇಜಿನ ವಿದ್ಯಾರ್ಥಿ, ಮೂಲತಃ ಉಪ್ಪಳದ ನಿವಾಸಿ ಮಹಮ್ಮದ್‌ ನಶತ್‌ (21) ಮೃತಪಟ್ಟಿದ್ದಾರೆ.

ಪಡೀಲ್‌ನಿಂದ ವಳಚ್ಚಿಲ್‌ ಕಾಲೇಜು ಕಡೆಗೆ ಹೋಗುವಾಗ ಬೆಳಗ್ಗೆ 11.30 ಸುಮಾರಿಗೆ ಮಹಮ್ಮದ್‌ ನಶತ್‌ ಚಲಾಯಿಸುತ್ತಿದ್ದ ಬೈಕ್‌ ಎದುರಿನಲ್ಲಿ ಹೋಗುತ್ತಿದ್ದ ಸ್ಕೂಟರ್‌ಗೆ ಢಿಕ್ಕಿಯಾಗಿ ಬಳಿಕ ಡಿವೈಡರ್‌ಗೆ ಢಿಕ್ಕಿ ಹೊಡೆಯಿತು. ನಶತ್‌ ಅವರು ಮೇಲಕ್ಕೆ ಎಸೆಯಲ್ಪಟ್ಟು ಅವರ ತಲೆ ವಿದ್ಯುತ್‌ ಕಂಬಕ್ಕೆ ಬಡಿದು ಗಂಭೀರ ಗಾಯಗೊಂಡು ಮೃತಪಟ್ಟಿದ್ದಾರೆ. ಸ್ಕೂಟರ್‌ ಸವಾರ ಮತ್ತು ಸಹಸವಾರನಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಮಂಗಳೂರು ಸಂಚಾರ ದಕ್ಷಿಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಪೊಲೀಸ್‌ ಸಿಬಂದಿ ಎದುರೇ ಘಟನೆ
ಈ ಸ್ಥಳದಲ್ಲಿ ಸಂಚಾರಿ ಪೊಲೀಸ್‌ ಸಿಬಂದಿಯೋರ್ವರು ಕರ್ತವ್ಯದಲ್ಲಿದ್ದರು. ಅವರ ಎದುರೇ ಈ ಘಟನೆ ಸಂಭವಿಸಿದೆ.