ಕನ್ನಡ ಹುಡುಗನಿಗೆ ಮಲಯಾಳ ಚಿತ್ರದಿಂದ ಆಫರ್‌!

Team Udayavani, Apr 1, 2018, 11:16 AM IST

ಮಹಾನಗರ: ಈಗಾಗಲೇ ಹಲವಾರು ಸೌಂದರ್ಯ ಸ್ಪರ್ಧೆಗಳಲ್ಲಿ ಪ್ರಶಸ್ತಿಗಳನ್ನು ಪಡೆದುಕೊಂಡು ಯಶಸ್ವಿಯಾಗಿರುವ ಮಂಗಳೂರಿನವಿದ್ಯಾರ್ಥಿಯೊಬ್ಬನಿಗೆ ಇದೀಗ ಎರಡು ಮಲಯಾಳ ಚಿತ್ರಗಳಿಂದ ಆಫರ್‌ ಬಂದಿದೆ. ಬೆಂಗಳೂರಿನಲ್ಲಿ ನಡೆದ ಸೌಂದರ್ಯ ಸ್ಪರ್ಧೆಯಲ್ಲಿ ಈ ಹುಡುಗನ ಪ್ರತಿಭೆಯನ್ನು ಗಮನಿಸಿ ಚಿತ್ರ ತಂಡ ಆಫರ್‌ ನೀಡಿದೆ!

ನಗರದ ಶ್ರೀದೇವಿ ಕಾಲೇಜಿನ ವಿದ್ಯಾರ್ಥಿ ಸೌರಭ್‌ ಶೆಟ್ಟಿ ಅವರೇ ಈ ಆಫರ್‌ ಪಡೆದ ಪ್ರತಿಭೆ. ಅವರು ವಿದ್ಯಾರ್ಥಿಯಾಗಿರುವ ಕಾರಣ ಅವರ ರಜೆಗಳು ಖಚಿತವಾಗದ ಹಿನ್ನೆಲೆಯಲ್ಲಿ ಚಿತ್ರದ ಶೂಟಿಂಗ್‌ ಸಮಯ ಇನ್ನೂ ನಿಗದಿಯಾಗಿಲ್ಲ. ಹೀಗಾಗಿ ರಜೆಗಳು ಖಚಿತವಾದ ಬಳಿಕವೇ ತನ್ನ ಆಫರ್‌ ಸ್ವೀಕರಿಸುವುದಾಗಿ ಸೌರಭ್‌ ಹೇಳುತ್ತಾರೆ.

ಮಲಯಾಳದ ಅರ್ಜುನ ಹಾಗೂ ಬಿಲಾಲ್‌-2 ಚಿತ್ರಗಳಿಂದ ಆಫರ್‌ ಬಂದಿದೆ. ಅರ್ಜುನ ಚಿತ್ರದಲ್ಲಿ ಅವರೇ ಮುಖ್ಯ ಪಾತ್ರದಲ್ಲಿ ನಟಿಸಲಿದ್ದು, ಅದರ ಚಿತ್ರೀಕರಣ ಆರಂಭಕ್ಕೆ ಇನ್ನೂ ಸಮಯವಿದೆ. ಆದರೆ ಬಿಲಾಲ್‌-2 ಚಿತ್ರದಲ್ಲಿ ಖ್ಯಾತ ನಟ ಮಮ್ಮುಟ್ಟಿ ಅವರ ಪುತ್ರ ದುಲ್ಹಾರ್‌ ಸಲ್ಮಾನ್‌ ಅವರು ನಾಯಕನಾಗಿ ನಟಿಸುತ್ತಿದ್ದು, ನಾಯಕನ ಸಹೋದರನ ಪಾತ್ರದಲ್ಲಿ ಸೌರಭ್‌ ನಟಿಸಲಿದ್ದಾರೆ. ಬಿಲಾಲ್‌-2 ಚಿತ್ರದ ಚಿತ್ರೀಕರಣ ಈಗಾಗಲೇ ಆರಂಭಗೊಂಡಿದ್ದು, ಇವರ ಚಿತ್ರೀಕರಣಕ್ಕೆ ಕನಿಷ್ಠ 4 ವಾರಗಳ ರಜೆ ಬೇಕಾಗಲಿವೆ.

ಸೌಂದರ್ಯ ಸ್ಪರ್ಧೆಯಲ್ಲಿ ರನ್ನರಪ್‌
ಬೆಂಗಳೂರಿನಲ್ಲಿ ನಡೆದ ಮಿಸ್ಟರ್‌ ಇಂಡಿಯಾ ಸೌಂದರ್ಯ ಸ್ಪರ್ಧೆಯಲ್ಲಿ ಸೌರಭ್‌ ಶೆಟ್ಟಿ ಅವರು ಪ್ರಥಮ ರನ್ನರಪ್‌ ಪ್ರಶಸ್ತಿ ಪಡೆದುಕೊಂಡಿದ್ದರು. ಇದರ ನಿರ್ವಹಣೆಯಿಂದಲೇ ಅವರಿಗೆ ಈ ಆಫರ್‌ಗಳು ಬಂದಿರುತ್ತದೆ. 4 ವರ್ಷಗಳಿಂದ ಫ್ಯಾಶನ್‌ ಕ್ಷೇತ್ರದಲ್ಲಿ ತೊಡಗಿಕೊಂಡಿರುವ ಅವರು, ಫ್ಯಾಶನ್‌ ಬ್ಲಾಗ್‌ ವೊಂದನ್ನೂ ನಡೆಸುತ್ತಿದ್ದಾರೆ. ಜತೆಗೆ ನೈಕ್‌, ಜ್ಯಾಕ್‌ ಆ್ಯಂಡ್‌ ಜೀನ್ಸ್‌, ಬ್ಲೂ ಸೈಂಟ್‌ ಮೊದಲಾದ ಪ್ರತಿಷ್ಠಿತ ಬ್ರ್ಯಾಂಡ್ ಗಳಿಗೆ ವಾಕ್‌  ‍‍ರ‍್ಯಾಂಪ್ ನ್ನೂ ನಡೆಸಿದ್ದಾರೆ.

ನಗರದ ವಿಶ್ವನಾಥ ಶೆಟ್ಟಿ ಹಾಗೂ ಸುಮಿತ್ರಾ ಶೆಟ್ಟಿ ದಂಪತಿಯ ಪುತ್ರ ಸೌರಭ್‌ ಶೆಟ್ಟಿ ಅವರು, ತನ್ನ ತಂದೆ ತಾಯಿಯರ ಪ್ರೋತ್ಸಾಹದ ಜತೆಗೆ ಸಹೋದರ ಸಂಮ್ರಿತ್‌ ಶೆಟ್ಟಿ, ಚಿಕ್ಕಪ್ಪ ಬಾಲಚಂದ್ರ ಶೆಟ್ಟಿ ಹಾಗೂ ಚಿಕ್ಕಮ್ಮ ಇಂದ್ರಾ ಶೆಟ್ಟಿ ಅವರ ಪ್ರೋತ್ಸಾಹದಿಂದಲೇ ಇಷ್ಟೆಲ್ಲ ಸಾಧನೆ ಸಾಧ್ಯವಾಯಿತು ಎಂದು ವಿವರಿಸುತ್ತಾರೆ. 

ವಿನ್ನರ್‌ಗೆ ಕನ್ನಡದಲ್ಲಿ ಆಫ‌ರ್‌
ಮಿಸ್ಟರ್‌ ಇಂಡಿಯಾ ಸೌಂದರ್ಯ ಸ್ಪರ್ಧೆಯಲ್ಲಿ ವಿನ್ನರ್‌ ಆಗಿರುವ ಮೂಡಬಿದಿರೆ ತೋಡಾರ್‌ ಮೂಲದ ದೀಪಕ್‌ ಶೆಟ್ಟಿ ಅವರಿಗೆ ಕನ್ನಡದ ವಿಕ್ರಮ್‌ ರಾಥೋಡ್‌ ಎಂಬ ಚಿತ್ರದಿಂದ ಆಫರ್‌ ಬಂದಿದೆ. ದೀಪಕ್‌ ಶೆಟ್ಟಿ ಅವರ ದುಬಾೖನಲ್ಲಿ ಪ್ರೊಜೆಕ್ಟ್ ಎಂಜಿನಿಯರ್‌ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ದೀಪಕ್‌ ಅವರು ವಿದೇಶದಲ್ಲೂ ನಡೆದ ಹಲವು ಸ್ಪರ್ಧೆಗಳನ್ನು ಬಹುಮಾನಗಳನ್ನು ಪಡೆದುಕೊಂಡಿದ್ದರು.