ಕಾಡಬೆಟ್ಟು: ಸಂಪರ್ಕ ಸೇತುವೆಗೆ ಆಗ್ರಹ

Team Udayavani, Jul 9, 2018, 2:25 AM IST

ಪುಂಜಾಲಕಟ್ಟೆ: ಕಾವಳಪಡೂರು ಗ್ರಾ.ಪಂ. ವ್ಯಾಪ್ತಿಯ ಕಾಡಬೆಟ್ಟು ಗ್ರಾಮದ ಮಾರಿಬೆಟ್ಟು- ಜಾರಬೆಟ್ಟು ತೋಡಿನ ಸಂಪರ್ಕ ಸೇತುವೆ ನಿರ್ಮಾಣಕ್ಕೆ ಗ್ರಾಮಸ್ಥರು ಆಗ್ರಹಿಸಿದ್ದಾರೆ. ಈ ಸೇತುವೆಯು ಕಾಡಬೆಟ್ಟು ಗ್ರಾಮದ ಪಾದಚಾರಿಗಳಿಗೆ ತನ್ನ ದೈನಂದಿನ ವ್ಯವಹಾರಕ್ಕಾಗಿ ವಗ್ಗ ಪೇಟೆಗೆ ಹೋಗಲು ಮತ್ತು ಮಕ್ಕಳಿಗೆ ಶಾಲೆಗೆ ಹೋಗಲು ಅತೀ ಹತ್ತಿರದ ಸಂಪರ್ಕ ಸೇತುವೆಯಾಗಿದೆ. ಇಲ್ಲಿ ಈ ಹಿಂದೆ ಸ್ಥಳೀಯರಾದ ಜಾರಬೆಟ್ಟು ನಾರಾಯಣ ಮೂಲ್ಯಅವರು ವೈಯಕ್ತಿಕ ನೆಲೆಯಲ್ಲಿ ಗ್ರಾಮಸ್ಥರ ಆವಶ್ಯಕತೆ ಮನಗಂಡು ಮರದ ಸೇತುವೆ ನಿರ್ಮಿಸಿ ಅದರ ನಿರ್ವಹಣೆಯನ್ನೂ ನಡೆಸುತ್ತಿದ್ದರು. ಆದರೆ ಈ ಬಾರಿಯ ಪ್ರಥಮ ಮಳೆಗೆ ಈ ಮರದ ಸೇತುವೆ ಕೊಚ್ಚಿಕೊಂಡು ಹೋಗಿದ್ದು, ಜನರು ಸುತ್ತು ಬಳಸಿ ಹೋಗುವಂತಾಗಿತ್ತು.ಸ್ಥಳೀಯ ನಾಗರಿಕರು ಪಡುವ ಕಷ್ಟವನ್ನರಿತ ಸ್ಥಳೀಯ ಮನೆಯವರು ಹೊಸತಾಗಿ ಬಿದಿರಿನ ತಾತ್ಕಾಲಿಕ ಸೇತುವೆಯನ್ನು ನಿರ್ಮಿಸಿದ್ದರು. ಆದರೆ ಈ ಸೇತುವೆಯೂ ನೀರಿನ ರಭಸಕ್ಕೆ ಪುನಃ ಕೊಚ್ಚಿಕೊಂಡು ಹೋಗುವ ಭೀತಿಯಲ್ಲಿದೆ.

ಈ ಹಿಂದೆ ಇಲ್ಲಿಗೆ ಕಿಂಡಿ ಅಣೆಕಟ್ಟು ನಿರ್ಮಿಸುವ ವ್ಯವಸ್ಥೆಯಾಗಿತ್ತು. ಆದರೆ ರಾಜಕೀಯ ಮೇಲಾಟದಿಂದ ಅದು ಬೇರೆಡೆ ಸ್ಥಳಾಂತರಗೊಂಡಿದ್ದು, ಇಲ್ಲಿನ ಪರಿಸರದವರ ಬೇಡಿಕೆಯು ಕನಸಾಗಿ ಉಳಿದಿದೆ. ಆದುದರಿಂದ ಶೀಘ್ರ ಇಲ್ಲಿ ಕಾಂಕ್ರೀಟ್‌ ಸೇತುವೆ ನಿರ್ಮಿಸಬೇಕೆಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.