ವಿದ್ಯಾರ್ಥಿಗಳ ಬೈಕಿಗೆ ಬಸ್‌ ಢಿಕ್ಕಿ : ಓರ್ವ ಸಾವು

Team Udayavani, Aug 1, 2017, 2:33 PM IST

ಹಳೆಯಂಗಡಿ: ಇಲ್ಲಿನ ರಾಷ್ಟ್ರೀಯ ಹೆದ್ದಾರಿ ಹಳೆಯಂಗಡಿಯ ಸಾಗ್‌ ಬಳಿಯಲ್ಲಿ ಸೋಮವಾರ ಬೆಳಿಗ್ಗೆ  ಬಸ್ಸೊಂದು ಬೈಕ್‌ಗೆ ಢಿಕ್ಕಿ ಹೊಡೆದ ಪರಿಣಾಮ ಒರ್ವ ವಿದ್ಯಾರ್ಥಿ ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದು, ಮತ್ತೋರ್ವ ಗಂಭೀರ ಗಾಯಗೊಂಡ ಘಟನೆ ಸಂಭವಿಸಿದೆ. ಹಳೆಯಂಗಡಿ ಸಾಗ್‌ ನಿವಾಸಿ  ಶಿಯಾಲ್‌ ಹಸನ್‌ (16) ಮೃತಪಟ್ಟವರು.  ಅವರೊಂದಿಗಿದ್ದ ವಿದ್ಯಾರ್ಥಿಯಾಗಿದ್ದು, ಈತನೊಂದಿಗೆ ಬೈಕ್‌ ಚಲಾಯಿಸುತ್ತಿದ್ದ ಯೂಸಫ್‌ಗೆ ಗಂಭೀರ ಗಾಯವಾಗಿದ್ದು  ಅವರನ್ನು ಸುರತ್ಕಲ್‌ನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಹೆದ್ದಾರಿಯಲ್ಲಿ  ಖಾಸಗಿ ಎಕ್ಸ್‌ಪ್ರೆಸ್‌ ಬಸ್ಸು ಉಡುಪಿಯಿಂದ ಮಂಗಳೂರಿಗೆ ತೆರಳುತ್ತಿದ್ದಾಗ ಬೈಕ್‌ಗೆ ಡಿಕ್ಕಿ ಹೊಡೆಪಿತು. ಢಿಕ್ಕಿಯ  ಪರಿಣಾಮ ಬಸ್ಸಿನ ಮುಂಭಾಗದ ಚಕ್ರಕ್ಕೆ ಬೈಕ್‌ ಸಿಲುಕಿ ಹಿಂದೆ ಕುಳಿತಿದ್ದ ಶಿಯಾಲ್‌ ಸ್ಥಳದಲ್ಲಿಯೇ ಸಾವನ್ನಪ್ಪಿದರು. 

ಈತ ಮೂಡಬಿದಿರೆಯ ಕಾಲೇಜೊಂದರಲ್ಲಿ ತಾಂತ್ರಿಕ ಶಿಕ್ಷಣ ಪಡೆಯಲು ಒಂದು ತಿಂಗಳಿನ ಹಿಂದೆಯಷ್ಟೇ ದಾಖಲಾತಿಯನ್ನು ಪಡೆದಿದ್ದನು.
ಮಂಗಳೂರು ಉತ್ತರ ವಲಯ ಸಂಚಾರಿ ಠಾಣೆಯಲ್ಲಿ  ಬಸ್ಸು ಚಾಲಕನ ವಿರುದ್ಧ ಅಕ್ಮರ್‌ ಆಲಿ ಅವರು ನೀಡಿದ ದೂರಿನಂತೆ ಅಪಘಾತದ ಪ್ರಕರಣ ದಾಖಲಾಗಿದೆ. 

ಈ ಸಂಧರ್ಭದಲ್ಲಿ ಶಾಸಕರಾದ ಕೆ. ಅಭಯಚಂದ್ರ ಜೈನ್‌, ಮೊದಿನ್‌ ಬಾವಾ ಐವನ್‌ ಡಿ’ಸೋಜಾ, ಕಾಂಗ್ರೆಸ್‌ನ ಪ್ರಮುಖರಾದ ಧನಂಜಯ ಮಟ್ಟು, ವಸಂತ್‌ ಬೆರ್ನಾಡ್‌, ಸಾಹುಲ್‌ ಹಮೀದ್‌ ಕದಿಕೆ ಮತ್ತಿತರರು ಭೇಟಿ ನೀಡಿ ಮೃತಪಟ್ಟ ಬಾಲಕನ ಮನೆಯವರಿಗೆ ಸಾಂತ್ವನ ಹೇಳಿದ್ದಾರೆ.