ದಸರಾ ಸಡಗರಕ್ಕೆ ಟಿಕೆಟ್‌ ದರ ಶಾಕ್‌!

Team Udayavani, Sep 28, 2018, 10:19 AM IST

ಮಂಗಳೂರು: ಕರಾವಳಿಯಿಂದ ಬೆಂಗಳೂರು ಸಂಪರ್ಕಿಸುವ ಸಂಪಾಜೆ – ಶಿರಾಡಿ ಘಾಟಿಯಲ್ಲಿ ವಾಹನ ಸಂಚಾರ ನಿರ್ಬಂಧಿಸಿದ ಕಾರಣ ಸುತ್ತಿ ಬಳಸಿ ಸಂಚರಿಸಬೇಕು ಎಂಬುದನ್ನೇ ನೆಪ ಮಾಡಿ ಕೆಲವು ಖಾಸಗಿ ಬಸ್‌ನವರು ಪ್ರಯಾಣ ದರವನ್ನು ಏಕಾಏಕಿ ದುಪ್ಪಟ್ಟು ಮಾಡಿದ್ದಾರೆ. ದಸರಾ ರಜೆ ಸನಿಹವಿದ್ದು, ಇದು ಪ್ರಯಾಣಿಕರಿಗೆ ಶಾಕ್‌ ನೀಡಿದೆ.

ಮಂಗಳೂರು ದಸರಾ ಸಾಕಷ್ಟು ಪ್ರಸಿದ್ಧಿ ಪಡೆದಿದೆ. ದಸರಾ ಸಂದರ್ಭ ಬೆಂಗಳೂರು ಸಹಿತ ದೂರದ ಊರು  ಗಳಲ್ಲಿರುವ ಮಂದಿ ಊರಿಗೆ ಬರುತ್ತಾರೆ. ಈ ಬಾರಿ ಪ್ರಮುಖ ಹೆದ್ದಾರಿ ಗಳಲ್ಲಿ ಸಂಚಾರ ದುಸ್ತರವಾಗಿದ್ದು, ಹಿಂದೇಟು ಹಾಕುತ್ತಿದ್ದಾರೆ. ಈಗ ಕೆಲವು ಖಾಸಗಿ ಬಸ್‌ನವರು ಪ್ರಯಾಣ ದರವನ್ನು ಏಕಾಏಕಿ ಏರಿಸಿರುವುದು ಸಂಕಷ್ಟ ಹೆಚ್ಚಿಸಿದೆ. ಹೆಚ್ಚಿನ ಸೀಟುಗಳು ಮುಂಗಡ ಬುಕ್ಕಿಂಗ್‌ ಆಗಿರುವುದು ಮತ್ತಷ್ಟು ಚಿಂತೆಗೀಡು ಮಾಡಿದೆ.

ಸಾಮಾನ್ಯ ದಿನಗಳಲ್ಲಿ ಖಾಸಗಿ ಬಸ್‌ಗಳಲ್ಲಿ ಬೆಂಗಳೂರಿನಿಂದ ಮಂಗಳೂರಿಗೆ ಸುಮಾರು 650 ರೂ. ಟಿಕೆಟ್‌ ದರ ಇರುತ್ತದೆ. ಆದರೆ ಅ. 9ರಂದು ಬೆಂಗಳೂರಿನಿಂದ ಮಂಗಳೂರಿಗೆ ಆನ್‌ಲೈನ್‌ ಮೂಲಕ ಮುಂಗಡ ಟಿಕೆಟ್‌ ಬುಕ್ಕಿಂಗ್‌ ಮಾಡಲು 1,500 ರೂ. ನೀಡಬೇಕಿದೆ. 

ಅ. 10ರೊಳಗೆ ಸರಕಾರಿ ಬಸ್‌ ಬುಕ್‌ ಮಾಡಿ
ಬೆಂ. – ಮಂ. ಸರಕಾರಿ ಬಸ್‌ಗಳಲ್ಲಿ ವೀಕೆಂಡ್‌ ದಿನ ದರ ಹೆಚ್ಚಳವಿರುತ್ತದೆ. ಸಾಮಾನ್ಯ ದಿನಗಳಲ್ಲಿ ಮಾಮೂಲಿ ದರವಿದೆ. ಕೆಎಸ್ಸಾರ್ಟಿಸಿ ಅಧಿ ಕಾರಿ ಗಳು ಹೇಳುವ ಪ್ರಕಾರ ಸರಕಾರಿ ಬಸ್‌ಗಳಲ್ಲಿ ಹಬ್ಬಗಳ ದಿನಗಳ ದರ ಮತ್ತು ಸಾಮಾನ್ಯ ದಿನಗಳ ದರ ಎಂಬ ಎರಡು ದರಪಟ್ಟಿ ಇದೆ. ಅ.10ರಿಂದ ದಸರಾ ಹಬ್ಬಗಳ ದಿನದ ದರ ಜಾರಿಯಾಗುತ್ತದೆ.

ಸದ್ಯ ಕೆಎಸ್ಸಾರ್ಟಿಸಿ ಬಸ್‌ ದರದಲ್ಲಿ ಯಾವುದೇ ರೀತಿಯ ಹೆಚ್ಚಳವಾಗಿಲ್ಲ. ದಸರಾ ಹಬ್ಬದ ಹೆಚ್ಚುವರಿ ದರ ಅ.10ರಿಂದ ಜಾರಿಗೆ ಬರಲಿದೆ. ಆದಕ್ಕೂ ಮುನ್ನ ಸಾಮಾನ್ಯ ದರಗಳಲ್ಲಿಯೇ ಮುಂಗಡ ಟಿಕೆಟ್‌ ಕಾಯ್ದಿರಿಸಬಹುದು. 
– ದೀಪಕ್‌ ಕುಮಾರ್‌, ಕೆಎಸ್ಸಾರ್ಟಿಸಿ ವಿಭಾಗಾಧಿಕಾರಿ